နေပျဳတဝ် ၊ ဖေဖဝ်ဝါရဳ ၂၅
နူကဵုပရေၚ်သီလဝ်အဝဵု ပရေၚ်ဍုၚ်ကွာန်လုပ်သၞောဝ် ဂွံဒှ်အာမာန်ဂှ်ရုဲစှ်သမ္မတကၟိန်ဍုၚ်တုဲ ပံက်အလဵုအသဳ၊ လ္တူဂၠံၚ်တရဴကော်စၠတ်ဓဝ်ဂှ် ဒပ်ပၞာန်ဗမာ စဂါံကွာ်မံၚ်ယျ။
စနူဂိတုမာတ်သတ္တဟတတိယဂှ် သွက်ဂွံကော်အာ ကောံဓရီုစၠတ်ထဝ်မွဲတုဲမွဲဂှ် နူကဵုကံၚ်သဳဂီုကၠီုကောန်ဂကူ ကေုာံ ပရေၚ်ဂီုကၠီု လလောၚ်တြးလဝ် ပ္ဍဲဖေဖဝ်ဝါရဳ ၂၃ ဂှ်ရ။
ဟိုတ်ဂှ်ရ နူကဵုစၠတ်ဓဝ်ဏံ သွက်ဂွံရုဲစှ်အာသမ္မတ၊ သ္ကိုပ်ဝန်ဇၞော်ရးဒေသဇၞော်ကဵု တွဵုရးတံမဒှ်တုဲ ပ္ဍဲဂိတုအေဗရာဏံ ဒက်ပတန်အာအလဵုအသဳမွဲရောၚ်။
လ္တူဏံ နကဵုပရေၚ်ဍုၚ်ကွာန်၊ ပရေၚ်ပၞာန် ဂကောံပၠန်ဂတးတံ နူကဵုဗတိုက်မံၚ်ကံၚ်သဳပၞာန်၊ ကဝ်မယှေန်ပၞာန်တံဂှ် လၟုဟ်မ္ဂး ပေါဲဗတိုက် သွက်ဂွံဇီုကပိုက်အာ စၠတ်ထဝ်ကဵုအလဵုအသဳ ညးဍုၚ်ကွာန်တံရုဲစှ်လဝ်ကဵုမာဲဂှ်ရောၚ်။
လ္တူပၠန်ဂတးဂှ် အောန်ကဵုဂၠိုၚ် ပရေၚ်ဇီုကပိုက်ဒှ်ကၠုၚ်မာန်တုဲ ပလေဝ်စပရေၚ်အပြံၚ်အလှာဲဂှ် ဆက်လုပ်အာပေါဲဗတိုက်ရောၚ် နာဲတၠနာဲ သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC ဟီုကဵု ဌာန်ပရိုၚ်သြၚ်လောန်တိုၚ်မ်ရောၚ်။
“နူကဵုပေါဲရုဲမာဲအလီ အလဵုအသဳပတောအ် တိုန်ကၠုၚ်ဏောၚ်။ လ္တူဂကောံဇြဟတ်ပၠန်ဂတးပိုဲတံ ပရေၚ်ဇီုကပိုက် အောန်ကဵုဂၠိုၚ် ဒှ်ကၠုၚ်မာန်။ တင်ကော်ဆောတံဏံ ညံၚ်ဂွံဆဵုဂဗအာ လပါ်ပရေၚ်ဍုၚ်ကွာန်ကီု ပရေၚ်ပၞာန်ကီု ရဲပၠန်ဂတးပိုဲ ဗီုလဵုဆက်အာရောၚ် ညံၚ်ဂွံခိုင်ကၠိုက်အာ ဗီုလဵုပိုဲပလေဝ်ပလေတ်စတုဲ ဆက်လုပ်အာပေါဲဗတိုက်ဏောင် သ္ၚဳဂၠိပ်ဂွံ” သာ်ဝွံ သ္ဂးရ။
ညးဍုၚ်ကွာန် ဒးဒုၚ်အုပ်ဓုပ်တံဂှ် နွံမံၚ်လပါ်ဂကောံဇြဟတ်ပၠန်ဂတးတံတုဲ ဟွံဒးဂွိၚ်မွဲသာ် ကမၠောန်ဒးကၠောန်ထေက်ဂှ် ညံၚ်ဂွံခိုဟ်အိုတ်ကၠောန်အာရောၚ် ညးဟီုလဝ်ရ။
ကောံဓရီုလၟေၚ်ဍာံ ပထမဝါ စၠတ်ဓဝ်ညးဍုၚ်ကွာန် အလန်တတိယဂှ်စကော်လဝ် ပ္ဍဲဂိတုမာတ် ၁၆ ရောၚ် ဥက္ကဌစၠတ်ဓဝ်ညးဍုၚ်ကွာန် ဥူတဳခေါၚ်မျာတ် ထပက်စၟတ်တဲတုဲ လလောၚ်တြးလဝ်ရ။
ကောံဓရီုစၠတ်ဓဝ်ကောန်ဂကူဂှ် ဂိတုမာတ် ၁၈၊ ကောံဓရီုစၠတ်ထဝ် ရးဒေသဇၞော်ကဵု တွဵုရးတံဂှ် မာတ် ၂၀ ဏံ စကၠောန်ဗ္ဒျ်အာရောၚ် ဂဥုပ်ကေၚ်ကာ အံၚ်လေၚ်ဒွေဝ် ကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီု ထပက်စၟတ်တဲလလောၚ်တြးလဝ် ရောၚ်။
ဒပ်ပၞာန်သီလဝ်အဝဵုတုဲ ကြပ်ပွိုၚ် ၅ သၞာံဂှ် နကဵုပၞော်တိတ်ပရေၚ်ဍုၚ်ကွာန် ပါ်လဝ်ပိသ္ကုတ်တုဲ ကၠောန်လဝ်ပေါဲရုဲမာဲရောၚ်။
နူကဵု ဓယံက်ဒပ်ပၞာန် ဗော်ပျဳခိုၚ်ဖျိုဝ်တံ ပ္ဍဲဒၞာဲစၠတ်ဓဝ်ပိတၚ်ဂှ် ဇၞးလဝ်မာဲ ဂွံလဝ်အမာတ်ညးစၞး ၇၃၉ တုဲ ပံက်အလဵုအသဳ မာန်ရောၚ်။
ဟိုတ်ဂှ်တုဲ အတိုၚ်သ္ဇိုၚ်သၞောဝ် ၂၀၀၈ မ္ဂး ပ္ဍဲကဵုစၠတ်ထဝ်ဒပ်ပၞာန်ကဵု ရဲဗော်ပျဳခိုၚ်ဖျိုဝ်တံ အုပ်လဝ်ဂတာတဲဏံ အလဵုအသဳအရာပ်ကောန်ညးဍုၚ်ကွာန်ဂှ် ဒှ်ကၠုၚ်ဟွံမာန်၊ အလဵုအသဳဒပ်ပၞာန် မွဲသ္ကုတ်ရဒှ်မာန် ပရေၚ်ပါ်ပါဲတံ နွံမံၚ်ပၠန်ရ။
နူကဵုပေါဲရုဲမာဲအလီဏံ ဒှ်ကၠုၚ်လဝ်စၠတ်ဓဝ်ကဵု အလဵုအသဳတံဂှ် ဟွံဒုၚ်တဲကီုလေဝ် နူကဵုဂကောံပၞာန်တံဂှ် ကဵုအာဖျုန်နာနာသာ်တုဲ စန်ဒက်အာဍုၚ်ဂၠးကဝ်ကဵု ညးဍုၚ်ကွာန်တံရောၚ် ညးအခေါၚ်ဟီုဂးနွံ မုက်ဒပ်ကောန်ဂကူချေၚ် CNF သလိုၚ်ထက်နဳ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပရေၚ်ပၞာန်တံဂှ် အတိုၚ်လၟေၚ်ကမၠောန်ဍေံတံ ရပ်လဝ်ဂၠံၚ်တြေံ NCA တုဲ စန်ဒက်အာဂကောံရပ်လွဟ်တံဏောၚ်။ အလဵုအသဳဂှ် တက်ကျာပရေၚ်ဍုၚ်ကွာန် သဳကၠဳအာမွဲမွဲဂကောံရောၚ်။ တက်ကျာအံၚ်ဇၞးအာ မွဲၜါဂကောံအံၚ်ဇၞးအာမ္ဂး ဍေံတံဇၞော်တိုန်ကမၠောန်တုဲ ဍေံတံဒှ်မံၚ်အလဵုအသဳလုပ်သၞောဝ်ရောၚ်” သာ်ဝွံ သ္ဂးရ။
သွက်ပၠန်ဂတးဇြဟတ်ဂွံခိုဟ်အာကေုာံ ညံၚ်ဂွံအံၚ်ဇၞးမာန်ဂှ် ဂကောံဇြဟတ်ပၠန်ဂတးဂမၠိုၚ်တံ ပံၚ်တောဲအာနကဵုပရေၚ်ပၞာန် ပရေၚ်ဍုၚ်ကွာန်တုဲ သွက်ဂွံဒက်ပတန်အာ ပရေၚ်ပံၚ်ကောံအာက္ဍိုပ်မွဲဂှ် ကိစ္စဇၞော်ရ။
အလဵုအသဳညဳသၟဟ်ကောန်ဂကူ NUGကဵု K3C တံ ညံၚ်ဂွံပံၚ်ကောံအာက္ဍိုပ်မာန် သဳကၠဳမံၚ်ရောၚ် ဒုသ္ကိုပ်ပၞာန်ဇၞော် ဂေါန်မဝ် ကဵုကၠုၚ်လဝ်သမ္တီနွံတုဲ သ္ကိုပ်ဝန်ဇၞော် NUG လေဝ် ပံၚ်ကောံတုဲဇက်အာမာန်မ္ဂး ပဵုတုဲစိုပ်တရဴမာန်ရောၚ် ဟီုလဝ်ရ။
နကဵုပရေၚ်ဍုၚ်ကွာန်ဂှ် က္ဍိုပ်သ္ကိုပ်မဟာမိတ်တံကဵု ဂကောံဇြဟတ်ပၠန်ဂတးတံ ဆဵုဂဗတုဲ သွက်ဂွံသၠုၚ်ပတိုန်အာကဏ္ဍပရေၚ်ပၞာန်ဂှ် ဂစာန်ကၠောန်အာရောၚ် သ္ကိုပ်ဝန်ဇၞော် မာန်ဝေၚ်ခိုၚ်တာန် ဟီုလဝ် ပ္ဍဲဖေဖဝ်ဝါရဳ ၁၂ ရ။
အတိုၚ်ရန်တၟံ ညံၚ်ဂွံအံၚ်ဇၞး ဗတိုက်ပၞာန်ရောၚ် လိက်ဒုၚ်စဳရေၚ် ဌာနပရေၚ်စဵုဒၞာ NUG နူကဵုဂိတုဂျာန်နဝါရဳမံက်ဂှ် ကြဴဇာလလောၚ်တြးလဝ်ကီုလေဝ် ပြဟ်ဟ်ဏံ ပရေၚ်လဝေၚ်ပၞာန်ဗျူဟာစှ်ေစှ်ေ ဟွံဂွံဆဵုညာတ်ပုဟ်။
မွဲလပါ်ပၠန် အကြာသီလဝ်အဝဵု ၅ သၞာံဏံ ဒပ်ပံၚ်ကောံ မဟာမိတ်ပၠန်ဂတးတမ်ကညၚ် SRA မွဲဂှ် လောန်ကၠုၚ် ဂိတုဒဳဇြမ်ပါတေံ ဒက်ပတန်လဝ်ရ။
ဂကောံပၠန်ဂတးရပ်လွဟ် နူကဵု ၁၉ ဂကောံတံ ဒက်ပတန်လဝ် SRA ဂှ် အတိုၚ်လၟေၚ်ကမၠောန် တင်ပတဝ်က္ဍိုပ်၊ တင်ရန်တၟံ ပရေၚ်ဍုၚ်ကွာန်၊ ပရေၚ်ပၞာန်တံ ထမံက်အာရုပ်ရဴရောၚ် စွံလဝ်ဂတိတံရောၚ်။
ပ္ဍဲကဵုသၞောတ်ထ္ၜတ်အခိၚ်မွဲမွဲဏံ နကဵုပရေၚ်ညဳသာပံၚ်ကောံဂှ် ဂကောံဇြဟတ်ပၠန်ဂတးတံ ထမံက်အာရုပ်ရဴဟွံမာန်မ္ဂး အပ္ဍဲကဵုတၠုၚ်လအာ အပြံၚ်အလှာဲဒပ်ပၞာန်ဏံ သွက်ဂွံဒးဇီုကပိုက်အာကဵု ဇြဟတ်ဟရိုဟ်ဇၞော်ဇၞော် ဒှ်ကၠုၚ်မာန်ရောၚ် ရဲခါတ်အကာဲပရေၚ်ပၞာန်တံ ဟီုထံက်ထ္ၜးလဝ်ရောၚ်။
ပရိုၚ်-သြၚ်လောန်တိုၚ်မ်
Photo – PDF