ဗြဝတဳ၊ ဖေဖဝ်ဝါရဳ ၂၆
တွဵုရးကရေၚ် ပွိုၚ်ဍုၚ်ဗြဝတဳ ပ္ဍဲကဵုဂၠံၚ်ကွာန်ဆက်လဝ်မွဲဒၞာဲ ဂိတုဖေဖဝ်ဝါရဳ ၂၄ အခိၚ်ဒေါဝ်တ္ၚဲဂှ် ဟိုတ်နူဒပ်ပၞာန်ဗမာ ဗတိုက်လဝ်ကဵုဒရုၚ်ဂှ်ရ ကောန်ကွာန်ကဵု ကောန်ဒပ် DKBA တံမပါလုပ် ချိုတ်လဝ် ၅ တၠရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲပွိုၚ်ဍုၚ်ဗြဝတဳ နူကဵုကွာန်မေဝ်ကနေဝ် အပ္ဍဲ ဂၠံၚ်အာလပါ်ကွာန် ဖလူ မွဲဒၞာဲဂှ် ကွဳစက်ကောန်ကွာန်မွဲမကဵု ကွဳစက်ဒပ် DKBA မွဲမ ဒးဒုၚ်ကြဳဖျေံဗုမ်ဒရုၚ် မဒှ်ရ။
အတိုၚ်ညးဒေသတံဟီုမ္ဂး ကွဳစက်ကောန်ကွာန်တံ အဃောစဴကၠုၚ်နူဂူယာ လီုအာလ္တူဂၠံၚ် မေဝ်ကနေဝ် အပ္ဍဲ-ဖလူမွဲဒၞာဲဂှ် ဆဵုဂဗကဵု ကွဳစက် DKBA တုဲ အာတ်အရီုဗၚ်၊ အခိၚ်ကောန်ပၞာန် DKBA တံ ပလေဝ်မံၚ်ကွဳစက်ဂှ် ဒပ်ပၞာန်ဗမာကြဳဖျေံဗုမ်ဒရုၚ်ရောၚ် သ္ဂးရ။
ဟိုတ်နူဒပ်ကဝ်မယှေန်ပၞာန် ကြဳဗုမ်ဗတိုက်လဝ်ဏံ ကောန်ပၞာန် DKBA ၂ တၠကဵု ကောန်ကွာန် ၃ တၠချိုတ်အာ၊ ၅ တၠဒးလဝ်ဝပ်ရ။
တုဲပၠန် နူကဵုကွာန်မေဝ်ကနေဝ် အပ္ဍဲဂၠံၚ်အာလပါ် ကွာန်ဖလူ ကရပ်ဂှ်လေဝ် ဒပ်ကဝ်မယှေန်တံ ထပက်ကရောၚ်ပၞာန် တြးလဝ်ဒပ်နွံတုဲ ဒှ်မံၚ်ပေါဲဗတိုက် ဂကောံဇြဟတ်ပၠန်ဂတးတံဂှ် ဒပ်ကဝ်မယှေန်ပၞာန် စကာဇြဟတ်ဒရုၚ် ၜက်အာနူသၞောတ်ကီုရ။
ဒပ်ကရေၚ် DKBA ထပက်လဝ် လိက်ကသုက် NCA တုဲတိုန်မံၚ် ကောံဓရီုပရေၚ်ၜိုဟ်လလမ်ကီုလေဝ် ပ္ဍဲသၞာံအာတေံ ပ္ဍဲကဵုဒၞာဲဌာန်ဂအုပ် DKBA ဇြုၚ်သဳမျာင်ဂှ် ၜၚ်ကျာဒပ်ကဝ်မယှေန်ပၞာန် အာကြဳဖျေံလဝ်ဗုမ်ကီုရ။
ပရိုၚ်-သြၚ်လောန်တိုၚ်မ်
Photo – DKBA