မတ်မလီု ၊ ဖေဖဝ်ဝါရဳ ၂၆
ပ္ဍဲတွဵုရးမန် ဒပ်ပၞာန်ဗမာကဵုဒပ်ဗၠာဲသၟိၚ်တံ ထ္ၜးဟိုတ်နာနာသာ်တုဲ ရပ်ဂွံလဝ်သၟတ်တံဂှ် သွက်ဂွံယိုက်ဝန်ပၞာန် ကလေၚ်သွံစမံၚ်ရောၚ် ရဲကြပ်ကဵုဒပ်ပၞာန်ဗမာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုတွဵုရး သွက်ဂွံပံက်အာဘာပၞာန် ယိုက်ဝန်ညးဍုၚ်ကွာန် လၟေၚ်ဂိတုမာန်ဂှ် ကဝ်မယှေန်ပၞာန်ကဵုမံၚ် ဇြဟတ်ဟရိုဟ်ကဵု ဌာနပရေၚ်အုပ်ဓုပ်တံ နာနာသာ်ရောၚ်။
ဗွဲကြဴဏံ ရဲဒပ်ပၞာန်ကဵုဒပ်ဗၠာဲသၟိၚ်တံ သၟတ်အဝဲလုပ်အဝေါၚ် ယိုက်ဝန်ပၞာန်တံဂှ် ရပ်ကေတ်မံၚ်နဲကဲစုၚ်စုၚ်တုဲ ပကောံကေတ်မံၚ် သွက်ကောန်ပၞာန်တၟိ ယိုက်ဝန်ညးဍုၚ်ကွာန် မဒှ်ရ။
ဒပ်ပၞာန်ဗမာကဵု ဒပ်ဗၠာဲသၟိၚ် ရပ်ဂွံလဝ်သၟတ်တံမ္ဂး ကလေၚ်သွံစမံၚ်ကဵုသ္ကိုပ်အုပ်ဓုပ်ဆေၚ်စပ်တံ မွဲတၠတှ်ေ သြန်နူ ၅၀ ကိုတ်ဒကေဝ် အကြာ ၈၀ ကိုတ်ရောၚ် သ္ဂးရ။
“ဗွဲကြဴဏံ မိက်ဂွံဂွံသၟတ်ယိုက်ဝန်ပၞာန်တှ်ေ ကေတ်အဆက် ပၞာန်ကဵုဗၠာဲသၟိၚ် ဂွံရ။ သၟတ်ဍေံတံရပ်ထိၚ်လဝ်ဂှ် သ္ကိုပ်ပရေၚ်အုပ်ဓုပ်တံ ကလေၚ်ရာန်ကေတ်မံၚ်။ ဒှ်မံၚ်ဗွဝ်ဖျာ ပရေၚ်သွံရာန်စမွဲဏောၚ်” သာ်ဝွံ ညးကြပ်ကဵု ကဝ်မယှေန်ပၞာန်ဗမာ မွဲတၠ ဟီုရ။
သွက်ဂွံပံက်အာဘာပၞာန် ယိုက်ဝန်ညးဍုၚ်ကွာန်လၟေၚ်ဂိတုမာန်ဂှ် ဒပ်ပၞာန်ဗမာကဵု ဒပ်ဗၠာဲသၟိၚ်တံ ရပ်ကေတ်သၟတ်တံတုဲ ဒစးဒုၚ် ပကောံကဵုလဝ် မဒှ်ရောၚ်။
အတိုၚ် ညးကြပ်ကဵုကဝ်မယှေန်ပၞာန်ဗမာမွဲတၠ ဟီုမ္ဂး တမ်ဒပ်မွဲမွဲ၊ ဗ္ဒိုပ်ဗၠာဲသၟိၚ်မွဲမွဲဂှ် ဒစးဒုၚ်ပကောံလဝ်သၟတ် နူကဵု ၄ တၠ ဒဵုကဵု ၁၀ တၠ သွက်ဂွံတိုန်ဘာပၞာန် ယိုက်ဝန်ညးဍုၚ်ကွာန်ရောၚ် ဂွံတီရ။
ပ္ဍဲတွဵုရးမန် ကဝ်မယှေန်ပၞာန် ပံက်လဝ်ဘာပၞာန် ယိုက်ဝန်ပၞာန် နူလၟေၚ် ၁ ဒဵုလၟေၚ် ၂၂ သၟတ်ဟွံအောန်နူကဵု ၄၅၀၀ ဒးဒုၚ်ပကောံ လဝ်ကောန်ပၞာန်တၟိရောၚ် နူကဵုတင်နၚ်ဌာန်ပရိုၚ်သြၚ်လောန်တိုၚ် ထမံက်ထ္ၜးလဝ်ရောၚ်။
ပရိုၚ်-သြၚ်လောန်တိုၚ်မ်
Photo – MOI