နေပျဳတဝ် ၊ ဖေဖဝ်ဝါရဳ ၂၆
ဒပ်ပၞာန်သီအဝဵုတံ ပံက်အလဵုအသဳတၟိ ၜိုန်ရပြံင်လှာဲခတိုပ်မုက်ကီုလေဝ် သွက်အမှုရာဇဝတ်ကၠောန်လဝ်တံဂှ် ဒးဆက်ဒုၚ်အာ တာလျိုၚ်ရောၚ် ညးအုပ်ကာကံၚ်သဳပရိုၚ်မဳဒဳယာဗမာဗၠးၜး ဥူတိုဝ်ဇြဝ်လာတ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
နူကဵုဒပ်ပၞာန်ဗမာ ကၠောန်ကၠုၚ်လဝ်ပေါဲရုဲမာဲဏံ သွက်ဂွံပံက်အာအလဵုအသဳဂှ် စနူဂိတုမာတ်သတ္တဟတတိယတုဲ ကဝ်မယှေန်ပၞာန် ကော်လဝ်စၠတ်ဓဝ်ရောၚ်။
ခြာဟွံလံမ္ဂး ကော်အာကောံဓရီုစၠတ်ဓဝ်တုဲ ဖန်ဇန်မံၚ် သွက်လၟေၚ်ကမၠောန်အလဵုအသဳ၊ ရးဒေသဇၞော်ကဵုတွဵုရးဂှ် ပလေဝ်စမံၚ်ရောၚ် ဒုဂဥုပ်သ္ကိုပ်ပၞာန်ဇၞော် သဵုဝေန် ဟီုရ။
ပ္ဍဲဖေဖဝ်ဝါရဳ ၂၄ အခိၚ် ညးအာဆဵုဂဗလဝ် ညးတာလျိုၚ်ဒပ်ပၞာန် ကောန်ပၞာန် သ္ၚိကၟိန်အိန်ထံၚ်ရဲပၞာန်တံ ပ္ဍဲကဵုတွဵုရးသေံသၠုၚ်ကျာ ဒၞာဲဒေသဒပ်ပၞာန် နံၚ်ဝိုဝ်၊ ကျိုၚ်ခါန်ကေုာံ မါၚ်ပျေၚ်တံဗွဲတၞဟ်ခြာဂှ် ဟီုဂးလဝ်ရောၚ်။
ကော်အာစၠတ်ဓဝ်အလန်တတိယ ကၠောန်ကောံဓရီုလၟေၚ်ဍာံ ပထမဝါ တုဲ ပ္ဍဲဂိတုအေဗရာမံက်ဏံ ပံက်အလဵုအသဳတၟိမွဲဂှ် သၠောဲပြံၚ်အပ်ကဵုအဝဵုရောၚ် ဒုဂဥုပ်သ္ကိုပ်ပၞာန်ဇၞော် သ္ဂးလဝ်ရ။
အခိၚ်ဒပ်ပၞာန်သီလဝ်အဝဵု ပွိုၚ် ၅ သၞာံဏံ လ္တူဒပ်ပၞာန်ဗမာကၠောန်လဝ် အမှုရာဇဝတ်ပၞာန်ကီု လ္တူဖန်လဝ် ရာဇဝတ် လ္တူဂကူမၞိဟ်တံဂှ် ဍုၚ်ဂၠးကဝ်ဂမၠိုၚ် ကေတ်အရေဝ်ကၠောန်လဝ်ဒဏ် ပရေၚ်မာတ်ဆိုအ်တံရ။
ပ္ဍဲအကာဲအရာဏံ က္ဍိုပ်သ္ကိုပ်ကၟိန်ဍုၚ် Head of State သမ္မတ အာက္ဍိုပ်ဂကောံအလဵုအသဳ ပြံၚ်လဝ် ခတိုပ်မုက်တံ ဒးကေတ်လျိုၚ်ဒုၚ်လျိုၚ် စပ်ကဵုပဋိပက္ခပၞာန်အပ္ဍဲဍုၚ်ဒှ်လဝ် ဟိုတ်နူသီလဝ်အဝဵု ဂှ်ရောၚ်။
အလဵုအသဳ ဗီုလဵုပြံၚ်ၚ်အာ ကၠောန်လဝ်ပရေၚ်ရာဇဝတ် ကၠးကၠးမးမးတံဂှ် ပါဲတိတ်အာဂွံဟွံမာန်ပုဟ် ညးအုပ်ကာ ကံၚ်သဳပရိုၚ်မဳဒဳယာဗမာဗၠးၜး ဥူတိုဝ်ဇြဝ်လာတ် ဟီုရ။
“ဍေံတံ (ဒပ်ပၞာန်) အလဵုအသဳ ဗီုလဵုပြံၚ်ၚ် ပရေၚ်ဏံ ဒးကေတ်အာတာလျိုၚ် ပေၚ်ၚ်ဏောၚ်။ ၜးဗၠးတိတ်အာမာန် ဟွံထေၚ်ပုဟ်။ အလန်ဏံ ဒှ်အကာဲအရာအပြံၚ်အလှာဲတၟေၚ် သွက်ဍုၚ်ဗမာရ။ ဟိုတ်ဂှ်ရ လ္ၚဵုတံဟီုမံၚ် တုပ်မံၚ်ကဵုလက်ထက်ဥူတိၚ်သိၚ် ၂၀၁၀ တေံဟာဂှ် အကာဲအရာဟွံတုပ်တုဲ သွက်ပရေၚ်တံဏံ ဗၠးတိတ်အာပေၚ်ၚ် ဒှ်ဟွံမာန်ပုဟ်” သာ်ဝွံ သ္ဂးရ။
အခိၚ်သီလဝ်အဝဵုဏံ ဒပ်ပၞာန်ဗမာ ကၠောန်လဝ်အမှုရာဇဝတ် ၅ အမှု ပ္ဍဲတွဵုရးချေၚ်ဂှ် သွက်ဂွံကေတ်အရေဝ် ဂကောံအခေါၚ်အရာမၞိဟ် ချေၚ် တေၚ်လဝ်ကဵုအလဵုအသဳဍုၚ်တဳမဝ် ကောန်ဂကောံ အာသဳယာန် တံရ။
လ္တူဂကူမၞိဟ်ဂမၠိုၚ် ကၠောန်လဝ်ရာဇဝတ်ပၞာန်တံတုဲ စောဲလဝ်အမှုကဵု ဂဥုပ်သ္ကိုပ်ပၞာန်ဇၞော်ကီု သီုကဵုညးတာလျိုၚ်ပၞာန် ၁၀ တၠတံဂှ် ဍုၚ်တဳမဝ် ဒုၚ်တဲပံက်ကဵုလဝ်အမှုရောၚ်။
ကၠောန်လဝ်အမှုရာဇဝတ်ပၞာန် အခိၚ်သီအဝဵုဏံဂှ် ဂွံစောဲအာအမှု ပ္ဍဲကဵုရုၚ်သၞောဝ်ဓဝ်ဂၠးကဝ်မာန် ပကောံဂွံလဝ်တၚ်နၚ် မွဲကိုတ်ပြၚ် သီုကဵုသက်သဳတံနွံမံၚ်ရောၚ် နူကဵုယန္တရာပရေၚ်စၟဳစၟတ်သၠးပွး ဍုၚ်ဗမာ IIMM လလောၚ်တြးလဝ် ကီုရ။
ပ္ဍဲတၚ်နၚ်တံမ္ဂး ပရေၚ်ၜၚ်ကျာဒပ်ပၞာန်ဗမာဗတိုက်လဝ်ဂှ်ကီု၊ ရပ်ထိၚ်လဝ်မၞိဟ်ဟွံကေတ်သၞောဝ် ကၠောန်လဝ်ပကီုပရာတ်လိၚ်တံကဵု ပရေၚ်ပျံပျာံဓဇန်လဝ်တံ ပါလုပ်ရ။
ပြဟ်ဟ်ဏံ ပေါဲရုဲမာဲဒပ်ပၞာန်ဗမာဂှ် ပါဲနူကဵု ဍုၚ်ကြုက်၊ ရတ်ယှာကဵု ဗာလာရုသ်တံတုဲ ဍုၚ်အာသဳယာန်ကီု ကုလသမဂ္ဂကဵု အလဵုအသဳဍုၚ်ဂၠးကဝ်နာနာတံ ဟွံသ္ပလဝ်စၟတ်သမ္တီပုဟ်။
လ္တူဏံ ဍုၚ်အာသဳယာန်ကဵု ပွဳဗွိုၚ်ဂၠးကဝ်တံ ဂွံဒုၚ်တဲမာန်ဂှ် ဒပ်ပၞာန်ဒးကၠောန်အာကဵု ပရေၚ်တောတက် ညံၚ်ဂွံကၠးမး နွံမံၚ်တၟာဂမၠိုၚ်ဏီ ဥူတိုဝ်ဇြဝ်လာတ် ထံက်ထ္ၜးလဝ်ရ။
“မုလေဝ်ကၠောန်လဝ်ပရေၚ်အပြံၚ်အလှာဲဇၞော်ဇၞော်ဟၟဲဏီဂှ် ပြဟ်ဟ်ဏံ ရဲပွဳဗွိုၚ်ဂၠးကဝ် EU တံ UN တံ ဟွံထက်ဂလာန် ပေါဲရုဲမာဲဂှ် စွံလဝ်ကၠာ။ အာသဳယာန်မှ ဟွံထံက်ဂလာန်ဏီ။ ဟိုတ်ဂှ်ရ သွက်ဂွံသ္ပစၟတ်သမ္တီဂှ် ဒးထ္ၜသက်သဳ ကၠးကၠးမးမး နွံမံၚ်တၟာဂမၠိုၚ်ဏီရောၚ်” သာ်ဝွံ သ္ဂးရ။
အလဵုအသဳ ၜိုတ်လဵုပြံၚ်သၠာဲအာဒှ်ဒှ် ဒပ်ပၞာန်ဂှ် ဒးဆက်ကေတ်အာတာလျိုၚ်ဒပ်ပၞာန်မဒှ်တုဲ ဒပ်ပၞာန်နွံကဵုအစောန်စရာဲညံၚ်ဂွံဒှ်မာန် ဆက်ကၠောန်အာညိ ဒုဂဥုပ်သ္ကိုပ်ပၞာန်ဇၞော် ဗတိုက်ဖအောဝ်လဝ်ရောၚ်။
စိုတ်ဓါတ်လုပ်ပေါဲဗတိုက် ဇၟာပ်သ္ဂံၚ်တံ ဂံၚ်ဗတိုက် ဂံၚ်ကေတ် ပေါဲအံၚ်ဇၞးဂှ်ကီု ကွတ်ပၞာန်အစောဲစရာဲပညာတံ ပံၚ်ဗစပ်တုဲ လုပ်အာ ပေါဲဗတိုက်ညိဂှ် ညးဟီုလဝ်ဂလာန်ကု ညးတာလျိုၚ်ကဵု ကောန်သ္ဂံၚ် တံရ။
ပရိုၚ်-သြၚ်လောန်တိုၚ်မ်
Photo – MOI