နေပျဳဒဝ်၊ ဖေဖဝ်ဝါရဳ ၂၈။
ဒပ်ပၞာန်ဗမာက္ဍိုက်က္ဍိုပ် ကၠောန်ဗဒှ်လဝ် ပ္ဍဲပေါဲရုဲမာဲနာနာ သီု ၃ ကဆံၚ်ဂှ် လၟိဟ်သၟတ်တအ် ပါလုပ်စုတ်မာဲ ဂၠိုၚ်တိုန်ဒၟံၚ်ရောၚ် ပ္ဍဲလိက်ပရိုၚ်တြးဝါဒ ကဝ်မယှေန်ပၞာန် ချူဗၟံက်လဝ်ရ။
ပေါဲရုဲမာဲနာနာ သၞာံ ၂၀၂၅-၂၀၂၆ ဝွံ ဟွံတုပ်ကဵုပေါဲရုဲမာဲကၠာတေံတုဲ အကြာတၚ်ခက်ခုဲနာနာတံဂှ် ကၠောန်ဗဒှ်မာန်လဝ် ဗွဲမအံၚ်ဇၞးရောၚ် ကဝ်မယှေန်ပၞာန် ဟီုရ။။
ပ္ဍဲပေါဲရုဲမာဲသီု ၃ ကဆံၚ်ဂှ် မၞိဟ်အခေါၚ်စုတ်မာဲနွံ သီုဖအိုတ် ၂၄ ဒသမ ၂၂ ပြကောတိကိုတ်နွံတုဲ၊ မၞိဟ်မကၠုၚ်စုတ်မာဲ နွံ ၁၃ ဒသမ ၁၄ ပြကောတိကိုတ်ပြၚ်ဂှ် လၟိဟ်က္ဍိုပ်ကၠံ မကၠုၚ်စုတ်မဲ ၅၄ ဒသမ ၂၂ က္ဍိုပ်ကၠံပြၚ် နွံမံၚ်ရောၚ် ချူလဝ်ရ။
နူကဵုမၞိဟ်စုတ်မာဲ သီုဖအိုတ် ၂၄ ဒသမ ၂၂ ပြကောတိကိုတ်ဂှ် အာယုက် အကြာ ၁၈ သၞာံ ကဵု ၃၀ သၞာံဂှ် နွံမံၚ် ၂၄ က္ဍိုပ်ကၠံ၊ အကြာ ၃၀ သၞာံကဵု ၄၀ သၞာံ နွံ ၂၁ က္ဍိုပ်ကၠံ ပါလုပ်ဒၟံၚ်ရောၚ် သ္ဂးရ။
ပါဲနူဂှ်ပၠန် အာယုက်အကြာ ၄၀ သၞာံ ကဵု ၅၀ သၞာံဂှ် နွံ ၂၀ က္ဍိုပ်ကၠံ၊ အကြာ ၅၀ သၞာံ ကဵု ၆၀ သၞာံ နွံ ၁၇ က္ဍိုပ်ကၠံ၊ အကြာ ၆၀ သၞာံ ကဵု ၇၀ သၞာံ နွံ ၁၁ က္ဍိုပ်ကၠံ ကေုာံ လတူ ၇၀ သၞာံ နွံ ၇ က္ဍိုပ်ကၠံရောၚ် လလောၚ်ပတိတ်လဝ်ရ။
နူကဵုမၞိဟ်အခေါၚ်စုတ်မာဲနွံတအ် ၅၄ ဒသမ ၂၂ က္ဍိုပ်ကၠံ ကၠုၚ်စုတ်လဝ်မာဲဂှ် ဟိုတ်နူဂွံဆဵုကေတ် သၟတ်တအ်ပါလုပ်စုတ်မာဲ ဂၠိုၚ်တိုန်ဒၟံၚ်တုဲ လပါ်သၟတ်တအ်ဝွံ စိုတ်လုပ်စ ပရေၚ်ဍုၚ်ကွာန် ဂၠိုၚ်တိုန်မံၚ်ရောၚ် ဟီုလဝ်ရ။
အတိုၚ်လိက်စဳရေၚ် Data For Myanmar မ္ဂး ပ္ဍဲပေါဲရုဲမာဲဝွံ သွက်ကောန်ကမၠောန်အလဵုအသဳ ကေုာံ ဂကောံသ္ၚိကၟိန်တအ် ယဝ်ရဟွံစုတ်မာဲမ္ဂး ဒှ်ကၠုၚ်တၚ်ခက်ခုဲ သွက်အဆံၚ်တာလျိုၚ် ဂွံတိုန်မာန်ဂှ် ဟိုတ်နူဂွိၚ်ဂှ်တုဲ ဒးအာစုတ်လဝ်မာဲရ၊ ပ္ဍဲဒေသကွာန်လ္ၚဵု တအ်လေဝ် နူကဵုဥက္ကဋ္ဌကွာန်တအ် ဖ္ဍိုက်ဖအောဝ်လဝ် ညံၚ်ညးဍုၚ်ကွာန်တအ် ဂွံအာစုတ်မာဲညိဂှ် ဟီုလဝ်ရ။
ပါဲနူဂှ်ပၠန် သွက်ညးဂြိပ်ပါဲဘဲပၞာန်ကေုာံ ညးနွံမံၚ်ပ္ဍဲကွာန်တအ်ဂှ် ဟိုတ်နူ ဟွံမိက် မိတ်လီုလာ်ကဵု လပါ်အုပ်ဓုပ်တံကီု ကေုာံ ယဝ်ရဟွံစုတ်မာဲမ္ဂး ဂွိၚ်ဖေက်ပြဿနာလက်ကရဴ ဗက်ကၠုၚ်တုဲ ဒးအာစုတ်မာဲဗိုန်န်ရောၚ် ပ္ဍဲလိက်စဳရေၚ်သၞောဝ်ဂှ် ချူဗၟံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – Socia Media