မတ်မလီု၊ ဖေဖဝ်ဝါရဳ ၂၈။
သွက်အရာဒက်ပ္တန် ဍုၚ်မန် ကေုာံ ကၟိန်ဍုၚ်ဖိတ်ဒရေဝ်မာန်ဂှ် ညးဗြဴမန်တအ် ညံၚ်ဂွံပါလုပ်အာ ဗွဲမက္တိုၚ်ကၟိုဟ်ညိဂှ် ကံၚ်သဳဖိတ်ဒရေဝ်ဍုၚ်မန် (MSFC) ဗ္တိုက်ဖအောဝ်ဏာရ။
ပ္ဍဲဂိတုဖေဖဝ်ဝါရဳ ၂၇ ပ္ဍဲတ္ၚဲညးဗြဴမန် မရနုက်ကဵု ၂၂ ဝါ ဂှ် ကံၚ်သဳဖိတ်ဒရေဝ်ဍုၚ်မန် (MSFC) ပတိတ်လိက်လလောၚ်တြးတုဲ ဗ္တိုက်ဖအောဝ်လဝ်ရောၚ်။
ပ္ဍဲဍုၚ်ပိုဲ ဟိုတ်နူဒပ်ပၞာန်သီအဝဵုဂှ် ပေါဲဗတိုက်အပ္ဍဲဍုၚ်ကတဵုဒှ်ဒၟံၚ်တုဲ ညးဗြဴကေုာံ ကောန်ၚာ်တံ ဒးဒုၚ်မံၚ် ပရေၚ်ပကီုပရာတ်လိၚ်ဂမၠိုၚ် ကေုာံ အခေါၚ်အရာမၞိဟ်တအ် လီုလာ် ဒးဇီုကပိုက် ဒးဒုင်စသိုင်ဒၟံၚ် ဇၟာပ်ဇၟာပ်တ္ၚဲရောၚ် MSFC သ္ဂးလဝ်ရ။
ဟိုတ်နူ အကာဲအရာပရေၚ်ဍုၚ်ကွာန် ဟွံညိၚ်ဝတ် ကေုာံ ဒးဂွိၚ်ဖေက်ဒၟံၚ်ပရေၚ်ဂီုကၠီုတအ်ဂှ်ရ ညးဗြဴ၊ ကောန်ၚာ်၊ မၞိဟ်ဗျု ကေုာံ ညးယဲတအ်ဂှ် ဒးဇီုကပိုက် ဒှ်ဒဒိုက်ဂၠိုၚ်အိုတ်တုဲ လပါ်ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ပညာ၊ ပရေၚ်ထတ်ယုက်၊ ပရေၚ်ဂီုကၠီု သီုကဵုကဏ္ဍနာနာတအ်ဂှ် ယုတ်ဒေက်သဝ်စှ်ေဒၟံၚ်ရောၚ်။
အကာဲအရာပဋိပက္ခ ပရေၚ်ဍုၚ်ကွာန် မကတဵုဒှ်ဒၟံၚ်တ္ၚဲဏအ် ဟိုတ်နူသၞောတ်တၠအဝဵုပၞာန်ကေုာံ ယန္တရာဝါဒဂကူဇၞော်တအ် ညံၚ်ဂွံလီုလာ်ကျဗြောံအာဂှ် ကံၚ်သဳဖိတ်ဒရေဝ်ဍုၚ်မန် လုပ်အာ ပေါဲဗတိုက် မွဲကရောံမွဲစွံကဵု ကောဒေံကောန်ဍုၚ်အရၚ် ညးဍုၚ်ကွာန်တအ်ရ။
ပ္ဍဲတ္ၚဲညးဗြဴမန်ဏအ်ဂှ် ပိုဲညးသီုဖအိုတ်ပံၚ်ကောံတုဲ ဗတိုက်သရိုဟ် ထောံ သၠောတ်တၠအဝဵုပၞာန်ကေုာံ တၠအဝဵုနာနာတံတုဲ ဒုၚ်သ္ဇိုၚ် အတိုၚ်ပၟိက်ဆန္ဒညးဍုၚ်ကွာန်တံတုဲ သွက်ဂွံဒက်ပ္တန်အာ ကၟိန်ဍုၚ်ဖိတ်ဒရေဝ် မနွံကဵုဒုၚ်တာလျိုၚ်ပေၚ်ၚ်ဂှ် ဆက်ကၠောန်အာရောၚ် ဟီုလဝ်ရ။
ပရေၚ်ပလီုပလိုက် အခေါၚ်အရာမၞိဟ်တအ် ညံၚ်ဂွံဒေါအ်အာ ပြဟ်ပြဟ်ကေုာံ ပ္ဍဲအခန်ကဏ္ဍက္ဍိုက်က္ဍိုပ်ဂှ် ညးဗြဴတအ် ညံၚ်ဂွံပါလုပ်အာတုဲ သွက်ဂွံဒုၚ်ကေတ်တာလျိုၚ်ပေၚ်ၚ်ဂှ် ကံၚ်သဳဖိတ်ဒရေဝ်ဍုၚ်မန် အာတ်မိက်လဝ်ရောၚ် ပ္ဍဲလိက်လလောၚ်တြးဂှ် ချူလဝ်ရောၚ်။
ပါဲနူတၚ်အာတ်မိက် ၜါတၚ်ဏအ်တုဲ သွက်ညးဗြဴတအ် ညံၚ်ဂွံက္ဍိုက်က္ဍိုပ်ပါလုပ်အာ တုပ်တုပ်ဂှ်လေဝ် စုတ်လဝ် ပ္ဍဲမူဝါဒတုဲ ဗ္တိုက်ဖအောဝ်ဒၟံၚ်လၟိုန်ရောၚ် ကံၚ်သဳဖိတ်ဒရေဝ်ဍုၚ်မန် ပတိတ်လဝ် လိက်လလောၚ်တြးရ။
ဟိုတ်ဂှ်ရ ညးဗြဴမန်တအ်ဂှ် သွက်ဂကူဂွံဗၠးၜး၊ သွက်အခေါၚ် ဂွံတုပ်သၟဟ်ကေုာံ သွက်ဂွံဖန်ဗဒှ် ကံကုသဵုဇကုမာန် ပ္ဍဲအရာဒက်ပ္တန် ဍုၚ်မန်ကေုာံ ကၟိန်ဍုၚ်ဖိတ်ဒရေဝ်ဂှ် ညံၚ်ဂွံပါလုပ်အာ ဗွဲမက္တိုၚ်ကၟိုဟ် ညိဂှ် ကံၚ်သဳဖိတ်ဒရေဝ်ဍုၚ်မန် ဗ္တိုက်ဖအောဝ်လဝ်ရ။
ပရိုၚ် – သြၚ်လောန်တိုၚ်မ်
Photo – MSFC