ဗြဝတီ၊ အေဗရာ ၁
အပ္ဍဲတွဵုရးကရေၚ် ဒေသဖလူ-မေန်လက်ပါန် မၞုံလ္ပာ်သၠုၚ်ကျာ ဍုၚ်ဗြဝတီဂှ် ပေါဲဗတိုက်အကြာဒပ်ၜါလ္ပာ် သ္ကာတ်မံၚ်တုဲ ဒပ်ကဝ်မယှေန်ပၞာန် သုၚ်စောဲက္ၜၚ်ကျာ ကြဳဗုမ်ပန်မံၚ်ဗွဲမသ္ကာတ်မြဟ်ကွေံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုင်မ် ရ။
ပ္ဍဲတိဍာ် ဖလူ-မေန်လက်ပါန် ပယျဵုသေံ-ဗၟာဂှ် နူအခိၚ်နူဂယး ဂိတုမာတ် ၃၁ တေံ ဒပ်ပၠန်ဂတးတံကဵု ဒပ်ကဝ်မယှေန်ပၞာန်တံ အကြာဒပ်ၜါလ္ပာ် ပေါဲဗတိုက်ဆက်ကတဵုဒှ်မံၚ်ဂှ် ဒပ်ကဝ်မယှေန်ပၞာန် သုၚ်စောဲလွဟ်ဇၞော်ကေုာံ ဒရုၚ်တုဲပန်မံၚ်ရောၚ် ညးဒေသဖလူမွဲတၠ သ္ဂးရ။
အပ္ဍဲဗဒိုပ်ဗျူဟာဝဝ်လေ မၞုံကရပ်ပယျဵုသေံ-ဗၟာဂှ်လေဝ် စနူဗ္တံမာတ် ၃၀ ဒပ်ပၠန်ဂတးကဵု အကြာဒပ်ကဝ်မယှေန် ပၞာန်တံၜါလ္ပာ် ပေါဲဗတိုက်ကတဵုဒှ်လဝ် စဵုကဵုစိုပ်မာတ် ၃၁ ဂှ် ပေါဲဗတိုက်သ္ကာတ်မြဟ် ဆက်ဒှ်မံၚ်တုဲ ညံၚ်ဗဒိုပ်ဇကုဟွံဂွံစှ်ေအာဂှ် ဒပ်ကဝ်မယှေန်ပၞာန် သုၚ်စောဲက္ၜၚ်ကျာတုဲ ကၠုၚ်ပန်ရီုဗၚ်မံၚ်ရောၚ် ဂွံတီကေတ်ရ။
ဗဒိုပ်ဗျူဟာဝဝ်လေ ဒပ်ကဝ်မယှေန်ပၞာန် သှ်ေဇးမံၚ်မွဲဒၞာဲဓဝ် ပ္ဍဲတိဍာ် KNU မဟာဒပ် ၆ လ္ပာ်သၠုၚ်ကျာဍုၚ်ဗြဝတီဂှ် နကဵုပရေၚ်ပၠတရဴပၞာန် KNLA မဟာဒပ် ၆ ကေုာံ ဂကောံဇြဟတ်မဟာမိတ်ပၠန်ဂတးတံ စဗတိုက်ကၠုၚ် နူဂိတုဂျူလာၚ် သၞာံအာတေံတုဲ ပ္ဍဲကၞောတ်ဂိတုမာတ်သၞာံဏံဂှ် ပရေၚ်ပၞာန်အကြာၜါလ္ပာ် ကလေၚ်သ္ကာတ်မြဟ်ကၠုၚ်ပၠန်ရောၚ်။
အပ္ဍဲဖလူ၊ ဝဝ်လေ ပေါဲဗတိုက်သ္ကာတ်မံၚ်ဂှ် ပန်ရီုဗၚ်မံၚ်ကဵု နူဗလးကျာကီု အပ္ဍဲတိဍာ် KNU မဟာဒပ် ၆ ကွာန်လ္ၚဵု ပေါဲဗတိုက်ဟွံဒှ်ကီုလေဝ် ဒပ်ကဝ်မယှေန်ပၞာန်တံ သုၚ်စောဲက္ၜၚ်ကျာ ကြဳဗုမ်ဗတိုက်မံၚ်တုဲ ပရေၚ်ဒးဝပ်လီုလာ်တံ ဂှ် ဟွံဂွံတီဏီပုဟ် သာ်ဝွံ တမ်ရိုဟ်ပရိုၚ်ဒေသတံ သ္ဂးရ။
အပ္ဍဲဂိတုမာတ် ၃၀ ဂှ်လေဝ် ပ္ဍဲကွာန်တၟိ ကုန်သာယာ လ္ပာ်သၠုၚ်ကျာဍုၚ်ကအ်ကြိက် တိဍာ် KNU မဟာဒပ် ၆ ဂှ် ဒပ်ကဝ်မယှေန်ပၞာန် သုၚ်စောဲဒရုၚ်ပန်ဗတိုက်လဝ်ဂှ် သ္ၚိဌာန်ဂမၠိုၚ် ဒးလီုလာ်အာနွံရောၚ် ဂွံတီကေတ် နူညးဒေသတံရ။
ကွာန်လ္ပာ်သၠုၚ်ကျာဍုၚ်ကအ်ကြိက်တံဂှ် ဒပ်ကဝ်မယှေန်ပၞာန် စွံပွန်ဗတိုက်မံၚ်ဂှ်ကီု ပ္ဍဲဒေသလ္ပာ်သၟဝ်ကျာ ဍုၚ်ကအ်ကြိက်တံဂှ်လေဝ် ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ကဵု ဒပ်ပၠန်ဂတးတံ ပေါဲဗတိုက် မွဲဏှမွဲဏှ ကတဵုဒှ်မံၚ်ရောၚ် ဂွံတီကေတ်ရ။
တုဲပၠန် ပ္ဍဲကဵုဒၞာဲကွာန် ပ္ဍဲခရိုၚ်ဖာပန် တိဍာ် KNU မဟာဒပ် ၅ ထိၚ်ချုက်လဝ်ဂှ် ဒပ်ကဝ်မယှေန်ပၞာန် ကြဳဗုမ် နူၜၚ်ကျာ ကၠောန်မံၚ်ဆက်က်ကီု အပ္ဍဲဂိတုမာတ် ၂၆ ဂှ် ဟိုတ်နူဒပ်ကဝ်မယှေန်ပၞာန် ကြဳဗုမ်ဂှ်ရ ကောန်ၚာ်မွဲတၠပါလုပ် သီုကဵုသၟတ်ဗြဴၜါတၠ ဒးအာဝပ်နွံရောၚ် ဂွံတီကေတ် နူလိက်လလောၚ်တြး ဂကောံမှာဇန်ကရေၚ် KPSN ရ။
ပရိုၚ် – သြၚ်လောန်တိုင်မ်
Photo – Social Media