နေပျဳဒဝ်၊ အေဗရာ ၁
အပ္ဍဲကောံဓရီုစၠတ်ဓဝ်ညးဍုၚ်ကွာန် ကၠောန်ဗဒှ်လဝ် ဂိတုမာတ် ၃၁ ဂှ် က္ဍိုပ်သ္ကိုပ်ပၞာန်သီအဝဵု ညးဂွံဇၞူကမၠောန်နူဒပ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဒးဒုၚ်ရုဲစှ်ဏာ နဒဒှ် ဒုသမ္မတရ။
က္ဍိုပ်သ္ကိုပ်ပၞာန်ဝွံ ဇၞးအာလဝ် ဒံက်တာကျဝ်သွိုယ် နူဗော်တစည ဒေသဆန္ဒမာဲ တံၚ်တွောန်ကျဳ နကဵုလၟိဟ်မာဲ ပိုတ်တ်တုဲ ဒှ်ကၠုၚ် ဒုသမ္မတ ရုဲစှ်လဝ်နူစၠတ်ဓဝ်ညးဍုၚ်ကွာန်ရောၚ်။
အတိုၚ်ဖျေံဂွံသ္ဂုတ်သွာတ်ပါ်မာဲ ညးမလုပ်ပြိုၚ်လဝ် အလံၚ်ဒုသမ္မတ ၜါတၠဏံမ္ဂး က္ဍိုပ်သ္ကိုပ်ပၞာန် ကလိဂွံမာဲ ထံက်ဂလာန် ၂၄၇ မာဲ၊ ဒံက်တာကျဝ်သွိုယ် ကလိဂွံမာဲထံက်ဂလာန် ၁၀ မာဲ ကေုာံ မာဲလီုအာ ၃ မာဲ မဒှ်ရ။
ဟိုတ်နူပၟိက်ဆန္ဒ မိက်ဂွံဒှ်သမ္မတတုဲ က္ဍိုပ်သ္ကိုပ်ပၞာန် သီကေတ်လဝ် အဝဵုကၟိန်ဍုၚ်ဂှ် ပ္ဍဲကောံဓရီုစၠတ်ဓဝ်ညးဍုၚ်ကွာန် ကၠောန်ဗဒှ်လဝ် နူကဵုဂိတုမာတ် ၃၀ ဂှ် နူကဵုဗော်ပျဳခိုင်ဖျိုဝ် ပၠုပ်ဂလာန်ပတိုန်လဝ် စရၚ်ယၟု နဒဒှ်အလံၚ်ဒုသမ္မတ သွက်စၠတ်ဓဝ်ညးဍုၚ်ကွာန် မဒှ်ရ။
တုပ်တဴညံၚ်ရဴသာ်ဂှ်ကီု ပ္ဍဲကောံဓရီုစၠတ်ဓဝ်ကောန်ဂကူ ကၠောန်ဗဒှ်လဝ် ဂိတုမာတ် ၃၁ ဂှ်လေဝ် ဒဝ်နာန်နဳနဳဧ နူဗော်ပျဳခိုင်ဖျိုဝ် ဇၞးအာမာဲ ဒံက်တာမနာန်တူဝ်ဂျာ နကဵုလၟိဟ်မာဲဗွဲမဂၠိုၚ်တုဲ ဒှ်ကၠုၚ် ဒုသမ္မတ ဒုၚ်ရုဲစှ်လဝ် နူစၠတ်ဓဝ်ကောန်ဂကူရ။
ဒဝ်နာန်နဳနဳဧ ဒးဒုၚ်ရုဲစှ်လဝ် ဒုသမ္မတဂှ် ပ္ဍဲဍုၚ်ဗၟာဏံ ဒှ်ဒုသမ္မတဗြဴ ကၠာအိုတ်မွဲတၠရောၚ်။
ဒုသမ္မတ ရုဲစှ်နူစၠတ်ဓဝ်ညးဍုၚ်ကွာန်၊ ဒုသမ္မတ ရုဲစှ်နူစၠတ်ဓဝ်ကောန်ဂကူ ကေုာံ ဒုသမ္မတ မွဲတၠ နူလပါ်ဒပ်ပၞာန် ပလံၚ်ဗစိုပ်ကဵုလဝ်တံဂှ် ပ္ဍဲကောံဓရီုစၠတ်ဓဝ်ကၟိန်ဍုၚ် ဂတဏံမ္ဂး သွက်ဂွံဆက် ရုဲစှ်အာ သမ္မတ၊ ဒုသမ္မတ ၁ ကေုာံ ဒုသမ္မတ ၂ တံရောၚ်။
ပ္ဍဲစၠတ်ဓဝ်ကၟိန်ဍုၚ် ဒပ်ပၞာန်ကေုာံ ဗော်ပျဳခိုင်ဖျိုဝ် ထိၚ်ချုက်အုပ်ဓလီုလဝ်ဏံဂှ်တှ်ေ က္ဍိုပ်သ္ကိုပ်ပၞာန် ညးမဇၞူ ကမၠောန်နူဒပ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်ဟေၚ် သွက်ဂွံဒးဒုၚ်ရုဲစှ် နဒဒှ် သမ္မတဂှ် ဒှ်မာန်ချိုတ်ပၠိုတ် မံၚ်ကွေံရောၚ်။
ပရိုၚ် – သြၚ်လောန်တိုင်မ်
ရုပ် – MOI