မတ်မလီု၊ အေဗရာ ၁
သွက်ဂွံသောၚ်ကလး ပြသၞာဍုၚ်တမ်မူလမာန် ညံၚ်ဂွံဒက်ပ္တန် ကၟိန်ဍုၚ်ပံၚ်ကောံဖိတ်ဒရေဝ် ဒဳမဝ်ကရေဇြဳ ကေုာံ သွက်ပရေၚ်မၞိဟ် ပရေၚ်ပိုန်ဒြပ် ညးဍုၚ်ကွာန်တံ ဂွံဇၞော်မောဝ်တိုန်အာဂှ် နကဵုဂကောံပ္ညဳပ္ညပ်ပရေၚ်ဍုၚ်ကွာန် PCB ကဵုလဝ်တၚ်သမ္တီ ၉ တၚ်ရ။
ဂကောံပ္ညဳပ္ညပ်ပရေၚ်ဍုၚ်ကွာန် PCB ဒက်ပ္တန်လဝ် နကဵုဂကောံဇြဟတ်ပရေၚ်ဍုၚ်ကွာန် အပ္ဍဲဍုၚ်တံဝွံ အပ္ဍဲဂိတုမာတ် ၃၁ အခိၚ်နူဂယးဂှ် ပတိတ်လဝ်ဗီုပြၚ်လစွံစိုတ် ဆေၚ်စပ်ကဵုအရာသောၚ်ကလး အခက်အခုဲပရေၚ်ဍုၚ်ကွာန်ဍုၚ်ဗၟာ လၟုဟ်ဏံရောၚ်။
ညံၚ်ဂွံဒှ် ပေါဲသဳကၠဳပရေၚ်ဍုၚ်ကွာန် မၞုံကဵုကြက်ရှ်သာ ဍာံစၟတ်ဂှ် အကြာဂကောံဇြဟတ် မဆေၚ်စပ်တံဂတးဂတန် ညံၚ်ဂွံဒက်ပ္တန် ပရေၚ်ဓဝ်ပတေဟ်ညးသ္ကံမာန်ဂှ် ဆေၚ်စပ်ကဵုတၠုၚ်လအာ ဘိုအ်ဂွံဒးကၠောန်တံဂှ် ဂွံဆဵုကေတ် လစွံစိုတ်ဆန္ဒ PCB ရ။
အပ္ဍဲဂှ်ပၠန် ဒဝ်အံၚ်သာန်သုကျဳ၊ ဥူဝေန်မျေအ်တံသီုဖအိုတ် ရဲဒးဒုၚ်ဖျေံလဝ်ထံၚ် ပရေၚ်ဍုၚ်ကွာန်ကေုာံ ရဲဒးဒုၚ်ရပ်လဝ် နကဵုဟိုတ်ပရေၚ်ဍုၚ်ကွာန်ဖအိုတ်တံဂှ် ဗွဲမပြဟ်ညံၚ်ဂွံဗလးကဵု ဒုဟ်ဒဏ်ကေုာံ ကဵုအခေါၚ်ဒက်ပ္တန်ဂကောံဗၠးဗၠးၜးၜး၊ အခေါၚ်ဟီုဂးဗၟံက်ပတိုန်ထ္ၜးဗၠးဗၠးၜးၜးတံဂှ် ဂကောံမဆေၚ်စပ်တံ ဖအိုတ် ဒးဒုၚ်လျိုၚ် မဒှ်ရ။
သွက်သၟတ်တံဂှ်လေဝ် ဂကောံဆေၚ်စပ်တံဖအိုတ် ညံၚ်ဟွံဂွံရပ်ပကောံကံက်ကေတ်မံၚ်ကောန်ပၞာန် ဗွဲအတေၚ်အဓ္ဓမကီု ညံၚ်ဟွံဂွံပကောံယိုက်ဝန်ပၞာန်ဂှ်ကီု၊ သီုကဵုအရာပရေၚ်ပၞာန် ကဵုဘဲဒဏ်ဂစိုတ်ဒဒိုက်ကၞာ ကုညးဍုၚ်ကွာန်ကေုာံ အရာရန်တၟအ် ဗတိုက်မံၚ် စမြိုၚ်ဒၞာဲဆေၚ်စပ်ကဵုညးဍုၚ်ကွာန်တံဂှ် ညံၚ်ဂွံပါဲဓလေတ်အာ မဒှ်ရ။
တုဲပၠန် ဆေၚ်စပ်ကဵု CDM ကေုာံ ညးယိုက်ဝန်အလဵုအသဳကောန်အရာပ်တံဂှ် ညံၚ်ဟွံဂွံကေတ်အရေဝ်ဖျေံဒုဟ် ကေုာံ အခေါၚ်ဂယိုၚ်လမျီု ညးဍုၚ်ကွာန်၊ အခေါၚ်အာကၠုၚ်ဗၠးဗၠးၜးၜးတံဂှ် ညံၚ်ဟွံဂွံကၟာတ်လဒဵုလဝ်ဂှ်လေဝ် စုတ်လဝ်ပ္ဍဲတင်နင်ဂှ်ကီုရောၚ်။
မွဲလပါ်ပၠန်ဂှ် ဘဝရဲဒးဒုၚ်ဘဲပၞာန်တံ ညံၚ်ဂွံကလေၚ်ယာက္ဍိုပ်မာန်၊ ပရေၚ်လွဳလွတ်စိုတ်၊ ပရေၚ်အရီုအဗၚ်ဓရ်ဗ္စာရဏာမၞိဟ် ကေုာံ သွက်ဂွံထမံက်ပတိတ်ပရေၚ်ဓဝ်ဍာံတံဂှ် ဒးပံၚ်တောဲကၠောန်အာ ကရောံဂၠးကဝ်တံ မဒှ်ရ။
သွက်ဂကောံဇြဟတ် ပူဂဵုစိုပ်မံၚ်ဍုၚ်သအာၚ်တံ နကဵုဆန္ဒလစွံစိုတ် ညးတံ ဗၠးဗၠးၜးၜး ညံၚ်ဂွံကလေၚ်စိုပ်ဌာနညးတံ ဂုဏ်သိက္ခာနွံနွံ တၠုၚ်လအာဏံ ညံၚ်ဂွံမံက်တိုန်ကေုာံ သွက်ဂွံသောၚ်ကလး ပြသၞာဍုၚ် တမ်မူလကီု သွက်ဂွံဂစာန်ကၠောန်အာ ပေါဲသဳကၠဳပရေၚ်ဍုၚ်ကွာန် ဆေၚ်စပ်ကဵု ကၟိန်ဍုၚ်ပံၚ်ကောံဖိတ်ဒရေဝ် ဒဳမဝ်ကရေဇြဳ ညးမဆေၚ်စပ်သီုဖအိုတ်ပါလုပ်မာန် မဒှ်ရ။
ပေါဲသဳကၠဳပရေၚ်ဍုၚ်ကွာန် သွက်ဂွံကၠောန်အာညံၚ်ဂွံအံၚ်ဇၞးမာန်ဂှ် အာသဳယာန်၊ ကုလသမဂ္ဂ ကေုာံ ဍုၚ်ဇိုၚ်ဝုတ်ဒိုဟ်၊ သီုအလဵုအသဳ ဂၠးကဝ်၊ ဂကောံနာနာတံညံၚ်ဂွံပံၚ်တောဲကၠောန်အာဂှ် နဒဒှ် လစွံစိုတ်ဆန္ဒ PCB အာတ်မိက်လဝ်ရ။
သွက်ကောန်ဍုၚ်အရေၚ်နာနာ တန်တဴမံၚ်စံၚ်မံၚ်အပ္ဍဲဍုၚ်တံ ဂွံမံၚ်အာမွဲကရောံညးသ္ကံ ဗွဲမၜိုဟ်လလမ်ဂှ် သွက်အခေါၚ်အရာ တမ်မူလကောန်ဍုၚ်သီုဖအိုတ်၊ အခေါၚ်အရာကောန်ဍုၚ်အရေၚ် ကေုာံ အခေါၚ်အရာမၞိဟ်တမ်သ္ဇိုၚ်တံဂှ် ညးဆေၚ်စပ်သီုဖအိုတ် ဒးဒုၚ်တာလျိုၚ်ရောၚ် PCB ထံက်ထ္ၜးလဝ်ရ။
ဟိုတ်ဂှ်ရ နူကဵုပေါဲသဳကၠဳပရေၚ်ဍုၚ်ကွာန် ညးဆေၚ်စပ်သီုဖအိုတ် ပါလုပ်အာမွဲကဆံၚ်တုဲ ချူခၞံပတိတ် သ္ဇိုၚ်သၞောဝ်ဥပဒေ ဖိတ်ဒရေဝ်ဒဳမဝ်ကရေဇြဳတုဲ နကဵုအစဳရေၚ်သၞောဝ်ဂှ်ဟေၚ်ဒက်ပ္တန်ဍုၚ်မ္ဂး သောၚ်ကလး ပြသၞာဍုၚ်တမ်မူလကေုာံ ပဋိပက္ခတံမာန်ရောၚ် ဂကောံ PCB ပတေဟ်ကေတ်လဝ်ရောၚ်။
ဂကောံပ္ညဳပ္ညပ်ပရေၚ်ဍုၚ်ကွာန် PCB ဝွံ ရန်တၟအ်သွက်ဂွံပံၚ်တောဲ ကၠောန်အာကရောံဂကောံ၊ ပူဂဵုမူဝါဒတုပ်သၟဟ်တံတုဲ စနူသၞာံ ၂၀၂၃ တေံ စဆဵုဂဗပ္ညဳပ္ညပ်သဳကၠဳကၠုၚ်ဂှ် ပ္ဍဲဖေဖဝ်ဝါရဳ ၂၀ သၞာံဏံ ဒက်ပ္တန်လဝ် မဒှ်ရ။
အပ္ဍဲဂကောံ PCB ဂှ်တှ်ေ ဥက္ကဌဗော် ဒဳမဝ်ကရေဇြဳကောန်ဂကူသေံ SNLD သိုၚ်ညောအ်လောန် ကေုာံ ဥက္ကဌဗော်ကောန်ဂကူရခေၚ် ဥူတာထောန်လှ၊ က္ဍိုပ်သ္ကိုပ်ကွးဘာတၞောဝ်ဒတောဝ် ၈၈ ဥူမျဧတံ ပၠတရဴမံၚ် မဒှ်ရ။
ပရိုၚ် – သြၚ်လောန်တိုင်မ်
Photo – Social Media