ကျံက်ကျဳ၊ အေဗရာ ၂
အပ္ဍဲရးဒေသဗဂေါ ပွိုၚ်ဍုၚ်ကျံက်ကျဳ အကြာကွာန် ကုန်သာယာကဵု ကွာန်ကၠအ်ဇၞော် လ္တူဒဒန် ၁၄၆ ဂၠံၚ်ကွဳပၟတ် ဒပ်ပၞာန်ဗၟာ ဖျေံလဝ်သ္ဇိုၚ်ဗဒိုပ်သၞေဟ်ကင်မွဲဂှ် ဗတိုက်ပလီုထောံလဝ်နွံရဂှ် နူကဵုဗဟဵု ဗော်သွးကောန်ဂကူ ကရေၚ် KNU ပတိတ်လဝ် လိက်လလောၚ်တြးရ။
အပ္ဍဲဂိတုမာတ် ၃၁ အခိၚ်ဗ္တံ ၁၀ နာဍဳကဝက်ပြင်ပြင်ဂှ် နူကဵုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကလဝ်တံ လုပ်သီဗတိုက်လဝ် သၞေဟ်ကင်ဂှ်ရ။
အပ္ဍဲပေါဲဗတိုက်ဏံ လပါ်ဒပ်ကဝ်မယှေန်ပၞာန် ညးတာလျိုင်မွဲတၠ မပါလုပ် သီုဖအိုတ် ၅ တၠချိုတ်အာတုဲ သီဂွံလွဟ် ၆ ဇကိုအ်ကဵု မကမ်နာနာ ၂၃၀ မ မဒှ်ရ။
အပ္ဍဲအခိၚ် လုပ်သီသၠိပ်လဝ်ဂှ်တှ်ေ ပလီုထောံဗ္ဒိုပ်တာဲ ကဝ်မယှေန်ပၞာန် ၃ မတုဲ လပါ်ဒပ်ပံၚ်ကောံမဟာမိတ်ပၠန်ဂတးတံ ပရေၚ်ဒးဝပ်ဟၟဲ ကလေၚ်ဆုတ်တိတ်ကၠုၚ်မာန်ခိုဟ်ဟ်ရောၚ် သ္ဂးရ။
စပ်ကဵုဗဒိုပ်သၞေဟ်ကင်ဂိက်ပၞာန် ပ္ဍဲကျံက်ကျဳ ဒးဒုၚ်ဗတိုက်ပလီုလဝ် ဏံတုဲ လပါ်ကဝ်မယှေန်ပၞာန်တံ စဵုကဵုလၟုဟ် လလောၚ်တြးပရိုၚ်ဂှ် ဟွံဂွံဆဵုဏီပုဟ်။
သၞာံဏံ အပ္ဍဲပွိုၚ်ဍုၚ်ကျံက်ကျဳ ဟိုတ်နူဒပ်ကဝ်မယှေန်ပၞာန် ပန်ကဵုလွဟ်ဇၞော်ကဵု ဗတိုက်ပၞာန်ကျာဂှ်ရ ညးဒေသ လၟိဟ်လက်ပြၚ် ဒးဂြိပ်ပါဲမံၚ်ဘဲပၞာန်တုဲ ဗွဲမဂၠိုၚ်ဂှ် ကလေၚ်စိုပ်ဌာန်ဒၞာဲဇကု ဟွံမာန်ဏီပုဟ်။
ပရိုၚ် – သြၚ်လောန်တိုင်မ်
Photo – KNU