တယိတ်ချံၚ်၊ အေဗရာ ၂
အပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ဂၠံၚ် ဗိက်-ထဝါဲ ဒှ်ဒၞာဲအဓိက ဗဒိုပ်ပရေၚ်ဂီုကၠီု ဝေန်ဝ ဂှ် ကလေၚ်ထိၚ်ချုက်ဂွံပေၚ်ၚ်ယျရောၚ် နူကဵုကဝ်မယှေန်ပၞာန် လလောၚ်တြးလဝ်ပရိုၚ် အပ္ဍဲဂိတုအေဗရာ ၁ ရ။
ဟိုတ်နူဒပ်ပၠန်ဂတးတံ သုၚ်စောဲဇြဟတ်ဗွဲမဂၠိုၚ် လုပ်ဗတိုက်လဝ်ဗဒိုပ်ဝေန်ဝ ဂှ်ရ အပ္ဍဲဂိတုမာတ် ၁၂ ဂှ် ဒးကလေၚ်ဆုတ်တိတ်အာ ကွာန်သၞောဟ်ဟနိ နကဵုသၞောတ်စှ်ေစှ်ေ မွဲခဏရောၚ် သ္ဂးရ။

ကြဴနူဂှ်တုဲ ဒပ်ပံၚ်ကောံကရောၚ်ပၞာန်ရီုဗၚ်တံ အပ္ဍဲဂိတုမာတ် ၂၈ ဂှ် ကလေၚ်ထိၚ်ချုက်ဂွံအာ ကွာန်သဳတဝ်၊ မာတ် ၂၉ ဂှ် ကွာန်ယေကျဝ်ချံၚ်၊ မာတ် ၃၀ ဂှ် ပေက်ကုန်ဒဵု၁၆၈၊ ရုၚ်ဗၠာဲသၟိၚ် ဝေန်ဝ ကေုာံ ဒဒန်ဝေန်ဝ၊ ကွာန်ပါၚ်ပြင်ၜဳ တံယျဂှ် ဗၟံက်ထ္ၜးလဝ်ရ။
လပါ်ကဝ်မယှေန်ပၞာန် လလောၚ်တြးလဝ် ကလေၚ်ထိၚ်ချုက်ဂွံအာ ဗဒိုပ်ဝေန်ဝဟီုဂှ် ဒှ်ဆပရေၚ်တြးဝါဒမွဲရတုဲ အပ္ဍဲဗလးတိမ္ဂး သွက်ကရောၚ်ပၞာန်ရီုဗၚ်တံ ဇၟာပ်ပ်တ္ၚဲဒးသုၚ်စောဲက္ၜၚ်ကျာတုဲ ကြဳမံၚ်ဗုမ်ရောၚ် ညးတာလျိုၚ်ဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုင်မ် ရ။

အပ္ဍဲဂိတုမာတ် ၃၁ ဂှ်လေဝ် ဒပ်ကဝ်မယှေန်ပၞာန် သုၚ်စောဲက္ၜၚ်ကျာ ဗတိုက်ၜါမတုဲ ကြဳဗုမ်ဗတိုက်မံၚ် ပ္ဍဲကွာန်ဝါရေတ်၊ ကွာန်ကုန်သီ မၞုံကရပ်ဗဒိုပ်ဝေန်ဝတံဂှ် မွဲအခိၚ်ဓဝ်တုဲ သီုသုၚ်စောဲလွဟ်စက်တံတုဲ ပန်ဗတိုက်လဝ်ကီုရ။
စဵုကဵုဂိတုအေဗရာ ၁ ဏံဂှ် နူကဵုဒပ်ပံၚ်ကောံ မဟာမိတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကလဝ်တံ ဆက်တုဲထိၚ်ချုက်လဝ် ဗဒိုပ်ဝေန်ဝကဵု ဒၞာဲပွဳပွူတံဂှ်ရောၚ် သ္ဂးရ။
လပါ်ကဝ်မယှေန်ပၞာန်တံဂှ်တှ်ေ ကြဴနူကလေၚ်ထိၚ်ချုက်ဂွံ ဗဒိုပ်ဝေန်ဝပေၚ်ၚ်တုဲ ဂၠံၚ် ထဝါဲ-ဗိက် ဂှ်လေဝ် ကလေၚ်ပံက်ကဵုမာန်အာယျရောၚ် ပတိတ်လဝ်လိက်လလောၚ်တြးရ။
ပရိုၚ် – သြၚ်လောန်တိုင်မ်
Photo – Social Media

