မတ်မလီု၊ အေဗရာ ၂ အပ္ဍဲတွဵုရးမန် လ္တူဍုၚ်မတ်မလီု ပ္ဍဲအရာပ်ဗွဲမဂၠိုၚ် သွက်ဂွံဒှ်ဒၞာဲ သ္ကိုပ်အုပ်ဓုပ်မကၠုၚ်စိုပ်ဏံမာန်ဂှ် ဒးထပက်မံၚ်လာဘ်ဗဇဴသြန် ကုညးတာလျိုၚ်အဆံၚ်ၚ်တံ ပဵုတုဲဂၠိုၚ်တိုန်ကၠုၚ်မံၚ်ရောၚ် ညးကြပ်ကဵု ကဝ်မယှေန်ပၞာန်တံ ဟီုကဵု ဌာန်ပရိုၚ်သြၚ်လောန်တိုင်မ် ရ။
ကဝ်မယှေန်ပၞာန်သီအဝဵုဝွံ ကြဴနူကလေၚ်ဒက်ပ္တန် အလဵုအသဳတၟိတုဲ ခြာဟွံလံဏံ ဒးကလေၚ်ရုဲစှ် သ္ကိုပ်အုပ်ဓုပ်တၟိ သွက်အရာပ်လ္တူဍုၚ်ကဵု ကွာန်တံ နွံမံၚ်ရောၚ်။
ဟိုတ်နူ ဒးကလေၚ်ရုဲစှ် သ္ကိုပ်အုပ်ဓုပ်တံတုဲ သွက်ဒၞာဲတာလျိုၚ်သ္ကိုပ်အုပ်ဓုပ်ဂှ် ဗက်ဂၠာဲမံၚ်ညးတာလျိုၚ် ရုၚ်ပရေၚ်အုပ်ဓုပ် ကဆံၚ်ၚ် ပွိုၚ်ဍုၚ်၊ ခရိုၚ်ကေုာံ တွဵုရးတံဟွံက သီုကဵုညးတာလျိုၚ် ဗော်ပျဳခိုင်ဖျိုဝ်တံလေဝ် ထပက်ကဵုမံၚ်လာဘ်သြန်အဆံၚ်ၚ်တုဲ ဂစာန်ဗက်မံၚ်အိုတ်အစောန်ရောၚ် သ္ဂးရ။
သွက်ဂွံကလေၚ်ဒှ် သ္ကိုပ်အုပ်ဓုပ်ဂှ် ကဵုသြန်ကိုတ်ဗွဲမဂၠိုၚ် ကုညးတာလျိုၚ်ကဆံၚ်ၚ်တံတုဲ ဂစာန်ဗက်မံၚ်အိုတ်စောန်ကီုလေဝ် ဒှ်သ္ကိုပ်အုပ်ဓုပ်ကီု ဟွံဒှ်ကီုဂှ် ညးမွဲမှ ဟီုကဵုကၠးကၠးဟွံမာန်ပုဟ်ဂှ်လေဝ် ညးကြပ်ကဵုကဝ်မယှေန်ပၞာန်မွဲတၠ ဟီုရ။
ကဵုသြန်လၟိဟ်ကိုတ်ဗွဲမဂၠိုၚ်တုဲ ဂစာန်ဗက်မံၚ်သွက်ဒၞာဲတာလျိုၚ် သ္ကိုပ်အုပ်ဓုပ်တံဂှ် ဟိုတ်နူမိက်ဂွံဂွံဒၞာဲဟွံသေၚ် ဟိုတ်နူမိက်ဂွံဂွံ အခေါၚ်အဝဵုကၠောန်ရောၚ် သ္ဂးရ။
အပ္ဍဲဍုၚ်မတ်မလီုဂှ်တှ်ေ ကြဴနူပၞာန်သီအဝဵုတုဲ သ္ကိုပ်ပရေၚ်အုပ်ဓုပ်ဗွဲမဂၠိုၚ် ဒေါအ်ဇူတိတ်အာတံနွံတုဲ နူကဵုကဝ်မယှေန်ပၞာန်ဂှ်တှ်ေ ညးကြပ်ကဵုဍေံတံကဵု ကောန်ဗော်ပျဳခိုင်ဖျိုဝ်တံဂှ်ရ ခါန်ကၞက်ကၠုၚ်လဝ် နဒဒှ် သ္ကိုပ်အုပ်ဓုပ်ရောၚ်။
သ္ကိုပ်အုပ်ဓုပ် အပ္ဍဲလက်ထက်ကဝ်မယှေန်ပၞာန်တံဝွံ စနူတေၚ်ကၟုဲ၊ ကေတ်လိက်ထံက်ဂလာန်တံဂှ် အာတ်မိက်ကေတ်သြန် ဗွဲမဂၠိုၚ်နွံမံၚ်တုဲ ပရေၚ်စလာဘ်ဗဇဴတံဂှ် နကဵုနဲကဲနာနာ ကၠောန်မံၚ်အိုတ်ရ။
ဍုၚ်မတ်မလီု ဒပ်ကဝ်မယှေန်ပၞာန် ထိၚ်ချုက်ဂွံလဝ်ပေၚ်ၚ်ဏံဂှ် သွက်သ္ကိုပ်အုပ်ဓုပ်တံ ဂၠံၚ်ပၞော်သြန်လုပ်ဂၠိုၚ်မံၚ်တုဲ ညးမိက်ဂွံဒှ် သ္ကိုပ်ပရေၚ်အုပ်ဓုပ် နွံမံၚ်ဗွဲမဂၠိုၚ်ရောၚ်။
ပရိုၚ် – သြၚ်လောန်တိုင်မ်
Photo – MOI