မတ်မလီု၊ အေဗရာ ၄
အပ္ဍဲတွဵုရးမန်ဝွံ အရာကၠေၚ်စက်အောန်မံၚ်ဂှ် င္ၚုဟ်ကၠေၚ်စက် စိုပ်အာအဆံၚ်င္ၚုဟ်သၠုၚ်အိုတ် ပ္ဍဲအလုံဍုၚ်မွဲရဂှ် အတိုၚ် လိက်လလောၚ်တြး ကဝ်မယှေန်ပၞာန် ဂွံတီကေတ်ရ။
အတိုၚ်င္ၚုဟ်ကၠေၚ်စက် ပ္ဍဲဂိတုအေဗရာ ၃ ဂှ်တှ်ေ ကၠေၚ်ဓါတ် 95 မွဲလေတ် ၅၃၃၅ ဒကေဝ်၊ ကၠေၚ်ဓါတ် 92 မွဲလေတ် ၅၀၃၀ ဒကေဝ် ၚုဟ်သၠုၚ်အာတုဲ ကၠေၚ်ဒဳဇြေလ်ပရဳမဳယာန်ဂှ်လေဝ် စိုပ်အာမွဲလေတ် ၇၁၇၅ ဒကေဝ်ယျ။
င္ၚုဟ်ကၠေၚ်စက်ဝွံ ယဝ်ရ ၜတ်ကၞာတ်ကဵု ဍုၚ်လ္ဂုၚ်၊ မာန္တလေဝ်၊ နေပျဳဒဝ် သီုကဵုရးဒေသကေုာံ တွဵုရးတၞဟ်တံမ္ဂး မွဲလေတ်မ္ဂး င္ၚုဟ်သၠုၚ်တိုန်မံၚ် ၅၀၀ ဒကေဝ်ပြၚ် မဒှ်ရ။
အတိုၚ်င္ၚုဟ်ရန်လဝ် နူကမ္မတဳစၟဳစၟတ်အုပ်ဓုပ် ကမၠောန်တြးကၠေၚ်စက် ကဝ်မယှေန်ပၞာန်တံမ္ဂး ဍုၚ်မတ်မလီုကေုာံ ဍုၚ်ဟာခါတံဂှ် အလုံမွဲဍုၚ်ဏံ ဒှ်င္ၚုဟ်ကၠေၚ်စက်သၠုၚ်အိုတ် မဒှ်ရ။
ဟိုတ်နူကဝ်မယှေန်ပၞာန် ဟွံသွံကဵုဒဝ်လာကီု ပါ်ပရအ်ကၠေၚ်စက် ဒးဒုၚ်ယှအ်ဖျေံလဝ်တုဲ ပ္ဍဲတွဵုရးမန်ဂှ် ၚုဟ်ကၠေၚ်စက်သၠုၚ်အိုတ် ဒှ်အာရောၚ် ညးတၠကမၠောန်ကၠေၚ်စက်မွဲတၠ ဟီုကဵု ဌာန်ပရိုၚ်သြၚ်လောန်တိုင်မ်ရ။
“ကၠေၚ်ပၠုပ်နၚ် သွက်တွဵုရးမန်ဂှ်တှ်ေ အလဵုအသဳ ဟွံသွံကဵုဒဝ်လာပုဟ်။ ပိုဲပလံၚ်လဝ်ကပေါတ်ဍုၚ်သအာၚ်ဂွံ သြန်ဒဝ်လာတုဲမှ ကလေၚ်ရာန်ပၠုပ်နၚ်ကေတ်ကၠေၚ်ဂွံ ။ ကၠေၚ်ဂှ်လေဝ် ယဝ်ၜတ်ကၞာတ်ကဵု ကၠာပေါဲပၞာန်အဳရာန် ဟွံဒှ်မ္ဂး ညးတံယှအ်ဖျေံလဝ်အရၚ်သွက်ဒေသပိုဲနွံ။ ဆေၚ်ကၠေၚ်မၞုံပ္ဍဲဒေသတံဂှ် ယဝ်ရၜတ်ကၞာတ်ကဵုသၞောတ် ကၠာပေါဲပၞာန်ဟွံဒှ်ဏီအခိၚ်တေံမ္ဂး ညးတံယှအ်လဝ်နွံမံၚ်။ တန်တဴကဵု ဆေၚ်မွဲတုဲမွဲတုဲ ယှအ်လဝ်ကၠေၚ်ဂှ် တၞဟ်ခြာမံၚ်ညးသ္ကံဏောၚ်” သာ်ဝွံ သ္ဂးရ။
အတိုၚ်အကာဲအရာ ပေါဲပၞာန်အဳရာန်လၟုဟ်မ္ဂး ကာလလံကၠုၚ်ဟဍၚ် ကၠေၚ်ဍေၚ်အောန်အာဟဍၚ်တုဲ တၠုၚ်လအာ င္ၚုဟ်ကၠေၚ်စက် အပ္ဍဲဍုၚ်လေဝ် ဖဵုဂွံထပ်သၠုၚ်တိုန်အာမာန်သၟးဟွံက ညံၚ်င္ၚုဟ် ဟွံဂွံသၠုၚ်တိုန်အာဂၠိုၚ် နူကဵုဍုၚ်တၞဟ်တံဂှ် ထေက်ကဵုဒးသွံကဵု ဒဝ်လာရောၚ် ညးဆက်ဟီုရ။
အပ္ဍဲဂိတုအေဗရာ ၂ ဂှ် ဗဟဵုဗာန် ကဝ်မယှေန်ပၞာန် ၜိုန်ရ လလောၚ်တြးလဝ် သွက်ဂွံသွံကဵု ဒဝ်လာအမေရိကာန် ၄၉ ပြကောတိကိုတ် သွက်ညးတၠကမၠောန်ကၠေၚ်စက်တံကီုလေဝ် သွက်တွဵုရးမန် ညးထပၠုပ်နၚ်ကၠေၚ်စက် ပ္ဍဲသၞေဟ်မုဟ်ဍုၚ်ဂှ် ဟွံသွံကဵုလဝ်ပုဟ်။
အပ္ဍဲတွဵုရးမန်ဂှ် စနူပထမသတ္တဟ ဂိတုမာတ်တေံတုဲ အတိုၚ်နွံပၟိက် ရာန်ကၠေၚ်စက်ဟွံဂွံ ဂွံမံၚ်နကဵုသၞောတ်ဗ္ၜတ်အပိုင်အခြာ၊ ဒးမၚ်ၜေတ်မံၚ်ရေၚ်ၚ်၊ သွံကဵုမံၚ်နကဵုသၞောတ် စောံ/မ တုဲ လ္တူပရေၚ်မၞိဟ် ပရေၚ်ပိုန်ဒြပ်တံ ပရေၚ်ဇီုကပိုက်ဇၞော်ကဵုဇြဟတ် ဒှ်ကၠုၚ်လဝ် မဒှ်ရ။
ပရိုၚ် – သြၚ်လောန်တိုင်မ်
Photo – CJ