မုဟ်ဍုၚ်၊ အေဗရာ ၇
အပ္ဍဲတွဵုရးမန် ပွိုၚ်ဍုၚ်မုဟ်ဍုၚ် လ္တူဂၠံၚ်ကၟိန်ဍုၚ် ကရပ်ကွာန်ယေန်ဒံၚ် အကြာဒပ်ၜါလ္ပာ် ပေါဲဗတိုက်ဒှ်လဝ်ဂှ် ကောန်ဒပ်ကဝ်မယှေန်ပၞာန် မွဲတၠချိုတ်အာတုဲ ပိတၠဒးအာဝပ်နွံရောၚ် နူကဵုဒပ်ပၞာန်မန် ရာမည RMA လလောၚ်တြးလဝ်ရ။
ဒပ်ကဝ်မယှေန်ပၞာန် ကၠုၚ်ဖျေံလဝ်သ္ဇိုၚ် ပ္ဍဲဇြပ် မၞုံအကြာကွာန်ယေန်ဒံၚ်ကဵု ကွာန်လှာဂှ် နူကဵုဒပ်ပၞာန်မန်ရာမည RMA လုပ်ဗတိုက်လဝ် ပ္ဍဲဂိတုအေဗရာ ၄ တုဲကၠုၚ်ဏံ ၜိုတ်အခိၚ်ဇိုၚ်သဝ်တ္ၚဲ ၅ နာဍဳပြၚ်ၚ်ဂှ်ရောၚ်။
ပေါဲဗတိုက်အကြာၜါလ္ပာ် လံအာပွိုၚ် ၂၀ မိနေတ်ပြၚ်တုဲ လပါ်ကဝ်မယှေန်ပၞာန်တံ ပရေၚ်ဒးဝပ်ချိုတ်လဝ်တံ နွံကၠုၚ်မဒှ်ရ။
ဟိုတ်နူ ဂွံလဝ်ပရိုၚ် လပါ်ဒပ်ကဝ်မယှေန်ပၞာန်တံ သွက်ဂွံကၠုၚ်မၚ်ကၚ်ဒမၠုက် ပ္ဍဲအကြာကွာန်ယေန်ဒံၚ်ကဵု ကွာန်လှာတုဲ လုပ်ဗတိုက်လဝ်ဂှ် လပါ်ဒပ် RMA ပရေၚ်ဒးဝပ်ဟၟဲပုဟ်ဂှ် ညးအခေါင်ဟီုဂးနွံ နာဲဂံၚ်သကာ ဟီုကဵု ဌာန်ပရိုၚ်သြၚ်လောန်တိုင်မ် ရ။
ပေါဲဗတိုက်အကြာၜါလ္ပာ်ဏံ နူပွိုၚ်ဍုၚ်ဇြပ်ဗု အဃောအာမတ်မလီု ရဲဒဳကွဳစက် ဖ္ဍိုက်နင်ခရံက် မွဲတၠ ဒးမကမ်တုဲ ချိုတ်အာ မဒှ်ရ။
ရဲဒဳကွဳစက်ဏံဂှ်တှ်ေ ဟိုတ်နူရဲဒပ်ကဝ်မယှေန်ပၞာန် ပန်တုဲ ဒးမကမ်ချိုတ်အာလဝ်ရောၚ် နာဲဂံၚ်သကာ သ္ဂးရ။
ကြဴနူပေါဲဗတိုက်ဒှ်တုဲ ဒပ်ကဝ်မယှေန်ပၞာန်တံ ဟွံဂံၚ်ဆက်အောပ်မၚ်ကၚ်ဒမၠုက်ရတုဲ ကလေၚ်ဆုတ် တိတ်အာယျ ဂွံတီကေတ် အတိုၚ်ညးဒေသတံ ဟီုရ။
ပရိုၚ် – သြၚ်လောန်တိုင်မ်
Photo – RMA