နေပျဳဒဝ်၊ ဂိတုအေဗရာ ၇
အပ္ဍဲကဵုပေါဲရုဲမာဲဂှ် ဟွံဒးလုပ်ပြိုၚ်ကီုလေဝ် က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဒှ်ကၠုၚ်သမ္မတကၟိန်ဍုၚ်ဂှ် ပၠုပ်ပတိုန်လဝ်ဂလာန် သွက်ဂွံဒက်ပ္တန်အာ ဌာနဝန်ဇၞော်ကၟိန်ဍုၚ် ၃၁ ဌာန၊ စပ်ကဵုဌာနဝန်ဇၞော်သၟတ် ကေုာံ ညးဗြဴတံ မပါလုပ်ရ။
အပ္ဍဲဂိတုအေဗရာ ၆ ကၠောန်လဝ်ကောံဓရီု စၠတ်ဓဝ်ကၟိန်ဍုၚ် အလန်တတိယဂှ် သမ္မတကၟိန်ဍုၚ် ပၠုပ်ဂလာန်ပတိုန်လဝ် သွက်ဂွံပံက်အာ ဂကောံအလဵုအသဳကၟိန်ဍုၚ်မ္ဂး ရန်လဝ်သွက်ဂွံဒက်ပ္တန်အာ ဌာနဝန်ဇၞော် ၃၁ ဌာန နကဵု ဝန်ဇၞော်ကၟိန်ဍုၚ် ၃၀ တၠတံရောၚ် ။
အပ္ဍဲဏံမ္ဂး ဌာနဝန်ဇၞော်တၟိလ္ၚဵု ပါလုပ်ကၠုၚ်သၟးဟွံက ပ္ဍဲဌာနဝန်ဇၞော် လ္ၚဵုတံမ္ဂး ၜါဌာနကလေၚ်ပံၚ်ပ္ကောံလဝ်တုဲ ဌာနဝန်ဇၞော်လ္ၚဵုပၠန်ဂှ် ဒက်ပ္တန်လဝ် နူလက်ထက်ကံၚ်သဳပၞာန်ကေုာံ ကဝ်မယှေန်ပၞာန်တံ ကလေၚ်ပါလုပ်ကၠုၚ်မံၚ်ဂှ် ဂွံဆဵုကေတ်ရ။
ဗွဲတၟေၚ်မ္ဂး ဌာနဝန်ဇၞော်ပရေၚ်ပလံၚ်ဗ္စိုပ်ကေုာံ ဆက်စၠောံတံဂှ် ပါ်ထောံဌာနတၞဟ်ခြာတုဲ ဌာနဝန်ဇၞော်ပရေၚ်ဆက်စၠောံဂှ်တှ်ေ ပံၚ်ပ္ကောံလဝ်ကဵု ပရေၚ်ဖောအ်ဗြဳဇၞော်မောဝ် ဒဳဂျေတ်တေလ်ရ။ နူကိုပ်ကၠာတေံ ဌာနဝန်ဇၞော်ပရေၚ်ဝေၚ်ဒြဟတ် ကေုာံ သၟတ်တံဂှ် အခိၚ်လၟုဟ်မ္ဂး ဒက်ပ္တန်လဝ်ဌာနဝန်ဇၞော်မွဲမွဲဒၞာဲ တၞဟ်ခြာအာတုဲ ဌာနဝန်ဇၞော်ညးဗြဴလေဝ် ဒက်ပ္တန်ကၠုၚ်လဝ်တၟိနွံရ။
တုဲပၠန် ဆေၚ်စပ်ကဵုကမၠောန် SME တံဂှ် ပံၚ်ပ္ကောံလဝ်ကဵု ဌာနဝန်ဇၞော်ပရေၚ်ကွတ်စက်တုဲ နကဵုဌာနဝန်ဇၞော်ပရေၚ်ကွတ်စက် ကေုာံ ပရေၚ်ဇၞော်မောဝ်ကမၠောန်ပိုန်ဒြပ် အဇာဍောတ်အိုတ်၊ အဇာဍောတ်၊ အဇာလဒေါဝ်တံဂှ် ပၠုပ်ဂလာန်ပတိုန်လဝ် ဂွံဆဵုကေတ်ရ။
ကြဴနူပၞာန်သီအဝဵု ၂၀၂၁ တေံလေဝ် ဒက်ပ္တန်ကၠုၚ်လဝ် ဌာနဝန်ဇၞော် သမဝါယမကဵု ပရေၚ်ဇၞော်မောဝ်ဖောအ်ဗြဳဒေသ ကွာန်ရး ကေုာံ ဌာနဝန်ဇၞော် သွာၚ်သၞောဝ်ဥပဒေတံလေဝ် ကလေၚ်ထပ်ဗပေၚ် ပါလုပ်ကၠုၚ် ပ္ဍဲအလဵုအသဳတၟိဏံကီုရ။
ဌာနဝန်ဇၞော်ပရေၚ်သာသနာ ကေုာံယေန်သၞာၚ်ဂှ်လေဝ် ပ္ဍဲဂကောံအလဵုအသဳတၟိ က္ဍိုပ်သ္ကိုပ်ပၞာန်ဏံ ပရေၚ်သာသနာမွဲဓဝ်ဟေၚ် ဒက်ပ္တန်လဝ် နဒဒှ် ဌာနဝန်ဇၞော်တၞဟ်ခြာတုဲ သွက်ပရေၚ်ယေန်သၞာၚ်ဂှ်တှ်ေ ပံၚ်ပ္ကောံလဝ်ကဵု ပ္ဍဲဌာနဝန်ဇၞော် ဟဝ်တေဝ်ကဵု ပရေၚ်အာတရဴ မဒှ်ရ။
ဌာနဝန်ဇၞော်သှ်ေမံၚ်တံဂှ်တှ်ေ ဝန်ဇၞော်ကၟိန်ဍုၚ် ရုၚ်သမ္မတ၊ ဌာနဝန်ဇၞော် ပရေၚ်ဓလိုက်တမ်ရိုဟ်ကိုန်အစဳဇန် ကောန်ဂကူ ကေုာံ ပရေၚ်ဆက်ဆောံပိုန်ဒြပ်ဍုၚ်သအာၚ်၊ ဌာနဝန်ဇၞော်ရုၚ်သမ္မတကေုာံ ဌာနဝန်ဇၞော် ပရေၚ်ပလံၚ်ဗစိုပ်တံလေဝ် ပါလုပ်ကီုရ။
အတိုၚ်သ္ဇိုၚ်သၞောဝ်ဥပဒေ ၂၀၀၈ မ္ဂး ညးစၞးဒပ်ပၞာန်တံ သွက်ဂွံယိုက်ဂၠေၚ်တာလျိုၚ် ဝန်ဇၞော်ကၟိန်ဍုၚ် ဌာနပရေၚ်စဵုဒၞာ၊ ဌာနကေၚ်ကာအပ္ဍဲဍုၚ် ကေုာံ ဌာနပရေၚ်ဒေသပယျဵုတံဂှ် နွံမံၚ်အတိုၚ်တြေံတေံတုဲ ဌာနပရေၚ်ဍုၚ်သအာၚ်၊ ဌာနပရေၚ်ဘဏ္ဍာကေုာံ အကံက်ခေါန်တံလေဝ် ပါလုပ်ကီုရ။
တုဲပၠန် ဌာနဝန်ဇၞော်ပရေၚ်ဂကူကောန်ဍုၚ်အရၚ်၊ ပရေၚ်ပညာ၊ ပရေၚ်ထတ်ယုက်၊ သိပ္ပံကေုာံ နဲကဲပညာ၊ လလောၚ်ပရိုၚ်၊ တဵုလွဳ၊ လွဳလွတ်ကေုာံ ကၟာၚ်ဍာ်၊ သယံဇာတကေုာံ ပရေၚ်မၚ်မွဲထိၚ်ဒဝ် ပွဳပွူသဘာဝ၊ ဓာတ်လလဳကေုာံ ဓါတ်အစောမ်၊ လဝက၊ သၟာကမၠောန်၊ ဗၞိက်ကူသာန်သွံရာန်၊ ပရေၚ်သိုၚ်ခၞံကေုာံ ဌာနဝန်ဇၞော် ရီုဗၚ်ဟံၚ်ပြာ် မှာဇန်ကလေၚ်ဖျေံဒၞာဲဝါဲတံ မဒှ်ရ။
မွဲလပါ်ပၠန် နဒဒှ် ဂဥုပ်နာဲဗ္စာကၟိန်ဍုၚ်ဂှ် ဥူတာဌေဝ်၊ ဂဥုပ်သၟာဥပဒေကၟိန်ဍုၚ်ဂှ် ဒံက်တာ သဳတာဥူ၊ ဂဥုပ်စၟဳစၟတ်စရၚ်ကၟိန်ဍုၚ် ဒဝ်နာၚ်တိတ်ဥူ၊ ဥက္ကဌကဝ်မယှေန်ပေါဲရုဲမာဲကၟိန်ဍုၚ် ဥူတာန်သဵု ကေုာံ ဥက္ကဌရုၚ်ခုၚ်ဥပဒေသ္ဇိုၚ် ဥူအံၚ်ဇဝ်တိၚ်တံဂှ်လေဝ် ပၠုပ်ပတိုန်လဝ် ယၟုစရၚ် နွံမံၚ်အိုတ်ရ။
ပရိုၚ် – သြၚ်လောန်တိုင်မ်
Photo – MOI