မတ်မလီု၊ အေဗရာ ၇
အပ္ဍဲကဵုပေါဲရုဲမာဲ ဟွံဒးလုပ်ပြိုၚ်ကီုလေဝ် က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဒှ်ကၠုၚ်သမ္မတဂှ် ပလံၚ်ဗစိုပ်ကဵုလဝ် ဂကောံအလဵုအသဳတွဵုရးမန်တၟိ သွက်ဂွံဒက်ပ္တန်အာ ဌာနဝန်ဇၞော်ထပှ်ဌာနဂှ်တှ်ေ အပ္ဍဲစၠတ်ဓဝ် ညးဒစဵုဒစးဟၟဲ သ္ပဒတန်လဝ် တုဲဒှ်အာရ။
အပ္ဍဲဂိတုအေဗရာ ၆ ကၠောန်ဗဒှ်လဝ်ကောံဓရီု ပထမဝါ စၠတ်ဓဝ်တွဵုရးမန် အလန်တတိယဝွံ လၟိဟ်ဌာနဝန်ဇၞော် က္ဍိုပ်သ္ကိုပ်ပၞာန်ပလံၚ်ဗစိုပ်လဝ်တံဂှ် ညးဒစဵုဒစးဟၟဲ သ္ပဒတန် ဖျေံဏာသ္ဂုတ်သွာတ်ရ။
အပ္ဍဲဌာနဝန်ဇၞော်ထပှ်တံမ္ဂး ဌာနဝန်ဇၞော်ပရေၚ်ဂီုကၠီု ကေုာံ ပရေၚ်ဒေသပယျဵု၊ ဌာနဝန်ဇၞော်ပရေၚ်ကိုန်အစဳဇန် ကေုာံ ပရေၚ်ဘဏ္ဍာ၊ ဌာနဝန်ဇၞော်ပရေၚ်မၞိဟ်ကေုာံ ဌာနဝန်ဇၞော် ဓါတ်လလဳ၊ ဓါတ်အစောမ်သၟုဟ်၊ ကွတ်စက် ကေုာံ ပရေၚ်ဆက်စၠောံအာကၠုၚ်တံ မဒှ်ရ။
တုဲပၠန် ဌာနဝန်ဇၞော်တဵုလွဳ၊ လွဳလွတ်ကေုာံ ကၟာၚ်ဍာ်၊ ဌာနဝန်ဇၞော် သယံဇာတကေုာံ ပရေၚ်မၚ်မွဲပွဳပွူသဘာဝ ကေုာံ ဌာနဝန်ဇၞော်ပရေၚ်ဂဵုလဟဵုသာယာတံ ပါလုပ်ကီုရ။
အပ္ဍဲကဵုဌာနဝန်ဇၞော် က္ဍိုပ်သ္ကိုပ်ပၞာန် ပလံၚ်ဗစိုပ်လဝ်တံမ္ဂး ယၟုဌာနဝန်ဇၞော် လဝက ကေုာံ ဇြဟတ်မၞိဟ်၊ ဌာနဝန်ဇၞော် ပရေၚ်သိုၚ်ခၞံကေုာံ ပရေၚ်ပလံၚ်ဗစိုပ်တံ ပါလုပ်ကၠုၚ်လဝ်ဂှ် ဟၟဲပုဟ်။
အပ္ဍဲသၞာံ ၂၀၁၆ လက်ထက်အလဵုအသဳဗော် NLD တေံလေဝ် အပ္ဍဲကဵု ဂကောံအလဵုအသဳတွဵုရးမန်ဂှ် ဒက်ပ္တန်လဝ် နကဵုဌာနဝန်ဇၞော် ထပှ်ဌာနကီုတုဲ ကြဴနူဂှ် ပြံၚ်သၠာဲဒက်ပ္တန်ကၠုၚ်လဝ် နကဵုဌာနဝန်ဇၞော် ဒစာံဌာနတံ မဒှ်ရ။
အပ္ဍဲတွဵုရးမန်ဝွံ ကောံဓရီုစၠတ်ဓဝ် ညးစၞးစၠတ်ဓဝ်ဒပ်ပၞာန် ဒုသ္ကိုပ်ပၞာန် အံၚ်ဝေန်တာန်ဂှ် က္ဍိုပ်သ္ကိုပ်ပၞာန် ပလံၚ်ဗစိုပ်လဝ်စရၚ်ယၟု သွက်ဂွံဒှ် သ္ကိုပ်ဝန်ဇၞော်တုဲ ညးဒစဵုဒစးဟၟဲ သ္ပဒတန် ခါန်ကၞက်ကဵုလဝ်ရ။
အပ္ဍဲဂကောံအလဵုအသဳကၟိန်ဍုၚ် က္ဍိုပ်သ္ကိုပ်ပၞာန်သီအဝဵု ပၠတရဴဏံ နကဵုဌာနဝန်ဇၞော် ၃၁ ဌာန၊ ဝန်ဇၞော်ကၟိန်ဍုၚ် ၃၀ တၠတံ သွက်ဂွံဒက်ပ္တန်အာဂှ် ပၠုပ်ဂလာန်ပတိုန်ထ္ၜးလဝ် ပ္ဍဲစၠတ်ဓဝ်တုဲဒှ်မံၚ်ရ။
ပရိုၚ် – သြၚ်လောန်တိုင်မ်
Photo – MOI