ဗုက်ပျေၚ်၊ အေဗရာ ၉
အပ္ဍဲရးတနၚ်သဳ ပွိုၚ်ဍုၚ်ဗုက်ပျေၚ် ပေါဲဗတိုက်ကတဵုဒှ်လဝ် တုဲကၠုၚ် စှ်တ္ၚဲပြၚ်တေံဂှ် ကောန်ဒပ်ကဝ်မယှေန်ပၞာန် ဟွံအောန်နူကဵု ၁၀ တၠ ချိုတ်အာလဝ်ရောၚ် ဂွံတီကေတ် နူတမ်ဒပ် ၁ ခရိုၚ်ကအ်သံၚ် ဒပ်စဵုဒၞာညးဍုၚ်ကွာန် PDF ရ။
အပ္ဍဲပွိုၚ်ဍုၚ်ဗုက်ပျေၚ် ဂၠံၚ်လေညာ-ရနာပုၚ် လ္တူဂၠံၚ်ဇၞော်ကၟိန်ဍုၚ် စၟတ်၈ ဂှ် ဒပ်ကဝ်မယှေန်ပၞာန် ထပက်နၚ်ကရောၚ်ပၞာန် နကဵုဇြဟတ် လၟိဟ် ကဵုကၠံပြၚ်တံဂှ် စနူဂိတုမာတ် ၂၂ စဵုကဵုစိုပ် ဂိတုအေဗရာ ၂ တုဲကၠုၚ်ဏံ နူကဵုဒပ်ပံၚ်ကောံ ဒပ်စဵုဒၞာညးဍုၚ်ကွာန်တံ ကၟာတ်ဆိုအ် ဗတိုက်လဝ်ရောၚ် ။
မွဲလပါ်ပၠန်ဂှ်လေဝ် ဒၞာဲဒပ်ကဝ်မယှေန်ပၞာန် ဖျေံလဝ်ဗဒိုပ်သၟးဟွံက၊ ဗဒိုပ်ဒပ် သြိုဟ်ပလိုတ်ပၟတ် ပျဳဂျဳမဏ္ဍိုင်၊ ရုၚ်ဗၠာဲသၟိၚ် ကေုာံ ဘာလကျာ် ဒၞာဲဒပ်ကဝ်မယှေန်ပၞာန်တံ ဖျေံလဝ်ဗဒိုပ်ဂှ်လေဝ် သုၚ်စောဲဗုမ်ဒရုၚ်တုဲ ဗတိုက်လဝ်ရ။
အပ္ဍဲကဵုပေါဲဗတိုက်ဏံဂှ် လပါ်ကဝ်မယှေန်ပၞာန် ညးတာလျိုၚ်ကီု သီုကောန်ဒပ် ဟွံအောန်နူကဵု ၁၀ တၠချိုတ်အာ၊ သီုဒးလဝ်ဝပ် ဗွဲမဂၠိုၚ်နွံတုဲ ဗလံၚ်ဏာလဝ် ရုၚ်ဂဥုဲပၞာန်ဗုက်ပျေၚ်တေံရောၚ် သ္ဂးရ။
ပရေၚ်ပေါဲဗတိုက်ဏံဂှ် နူကဵုတမ်ဒပ် ၂၀၃ ဒပ်ပၞာန်ဗၠးၜးကောန်ဂကူ ကရေၚ် KNLA ပၠတရဴတုဲ တမ်ဒပ် ၂ ခရိုၚ်ဗိက်၊ ဂကောံစဵုဒၞာ ညးဍုၚ်ကွာန် ပွိုၚ်ဍုၚ်ဗုက်ပျေၚ်၊ ဒပ်တၟေၚ်ပရေၚ်ဂီုကၠီု ကေုာံ ပရေၚ်ဗတိုက်ပလီု ပကီုပရာတ် သီုကဵု တမ်ဒပ် ၁ ခရိုၚ်ကအ်သံၚ်တံ ပံၚ်တောဲဗတိုက်လဝ်ရ။
အပ္ဍဲဂိတုမာတ် ၁၀ တုဲကၠုၚ်တေံလေဝ် ဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန် လ္ပာ်ပွိုၚ်ဍုၚ်ဗုက်ပျေၚ် ဂၠံၚ်လေညာ ရတနာပုၚ်ဂှ် ဒးဒုၚ်ဗတိုက်တုဲ ကောန်ဒပ်ကဝ်မယှေန်ပၞာန် ၄ တၠ ချိုတ်အာရောၚ် ဂွံတီကေတ်ရ။
ပရိုၚ် – သြၚ်လောန်တိုင်မ်
Photo – PDF