ၜဳကလေၚ်၊ အေဗရာ ၉
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ကွာန်လေဝ်ကေ ကဵု ဒၞာဲဗွိုၚ်ပွဳပွူ တံဂှ် နူကဵုဒပ်ကဝ်မယှေန်ပၞာန် ထပ်ကြဳဖျေံဗုမ် ဗတိုက်လဝ်ကဵု ၜၚ်ကျာရဂှ် ညးအုပ်ကာ ခရိုၚ်သဓီု KNU ပဒိုသဝ်ဧနိုင် ဟီုကဵု ဌာန်ပရိုၚ်သြၚ်လောန်တိုင်မ် ရ။
အပ္ဍဲဂိတုအေဗရာ ၆ အခိၚ်ဒေါဝ်တ္ၚဲတုဲကၠုၚ်ဏံဂှ် နူကဵုဒပ်ကဝ်မယှေန်ပၞာန် ဗတိုက်ကဵုပၞာန်ကျာ ပ္ဍဲကွာန်လေဝ်ကေ ၃ ဝါတုဲ သီုပန်လဝ်ကဵု လွဟ်အဝ်လဳဂါန်တံကီု မဒှ်ရ။
အခိၚ်ဒပ်ကဝ်မယှေန်ပၞာန် ဗတိုက်ကဵုပၞာန်ကျာဂှ် သ္ၚိဌာန်ဂမၠိုၚ်တံ ထပ်လီုလာ်အာပၠန်တုဲ စရၚ်ဒးဆောံလေၚ်အာလဝ် သောဲသောဲဗြောဲဗြောဲတံဂှ်တှ်ေ ပကောံကံက်မံၚ်စရၚ်ဖိုဟ်ရောၚ် သ္ဂးရ။
စနူဂိတုအေဗရာ ၂ စဵုကဵုစိုပ် ဂိတုအေဗရာ ၄ တုဲကၠုၚ်ဏံဂှ် နူကဵု ဒပ်ကဝ်မယှေန်ပၞာန် ဗတိုက်လဝ်ကဵုပၞာန်ကျာ အပ္ဍဲပွိုၚ်ဍုၚ်ၜဳကလေၚ် ကွာန်လေဝ်ကေ ကေုာံ ကွာန်ဝေန်တာပါန်တံ ၅ ဝါဂှ် ကြဳလဝ်ဗုမ် ၅၀ မပြၚ်တုဲ ဗတိုက်လဝ် မဒှ်ရ။
နူကဵုဒပ်ကဝ်မယှေန်ပၞာန် ကြဳဗုမ်ဗတိုက်လဝ်ဂှ်မ္ဂး ပ္ဍဲကွာန်လေဝ်ကေ သ္ၚိဌာန် ၁၀၀ မပြၚ် ဒးဆောံလေၚ်အာလဝ်နွံတုဲ ဘာလကျာ် ကွာန်လေဝ်ကေမွဲမလေဝ် ဒးအာဗုမ်တုဲ လီုလာ်အာနွံရောၚ်။
အပ္ဍဲတိဍာ်ပရေၚ်အုပ်ဓုပ် ခရိုၚ်သဓီု ဗော်သွးကောန်ဂကူကရေၚ် KNU ကွာန်လေဝ်ကေ ကေုာံ ကွာန်ဝေန်တာပါန်တံဂှ် ဟိုတ်နူ ဒပ်ကဝ်မယှေန်ပၞာန် ကြဳဗုမ်ဗတိုက်မံၚ် နကဵုၜၚ်ကျာ ဇၟာပ်ပ်တ္ၚဲ ဆက်မံၚ်တုဲ ညးဒေသလၟိဟ်ကဵုလ္ၚီပြၚ်တံ ထောံဌာန်ဒၞာဲဝါဲ ဒးဂြိပ်ပါဲမံၚ် ဘဲပၞာန်အိုတ်ရ။
ပရိုၚ် – သြၚ်လောန်တိုင်မ်
Photo – CJ