မတ်မလီု-အေဗရာ ၉
အပ္ဍဲကဵုတွဵုရးမန် ၜိုန်ရအလဵုအသဳပြံၚ်အာကီုလေဝ် ပ္ဍဲဒေသဂှ်တှ်ေ ကမၠောန်ဝိုၚ်ဝေၚ်လံၚ်သြန်တံ သွက်ဂွံဆက်ကၠောန်အာနွံမံၚ်ရောၚ် ညးမကြပ်ကဵုကဝ်မယှေန်ပၞာန်တံ ဟီုကဵု ဌာန်ပရိုၚ်သြၚ်လောန်တိုင်မ် ရ။
နူကဵုဒပ်ပၞာန်က္ဍိုက်ပ် ကၠောန်လဝ်ပေါဲရုဲမာဲ စၠတ်ဓဝ်တွဵုရးမန် မံက်တိုန်ကၠုၚ် ကၠောန်ဗဒှ်ကောံဓရီု ပ္ဍဲဂိတုအေဗရာ ၇ တုဲကၠုၚ်ဏံဂှ် ညးဒစဵုဒစးဟၟဲ ရုဲစှ်ပတိုန်ဏာ သ္ကိုပ်ဝန်ဇၞော်ကေုာံ ဝန်ဇၞော် ဂကောံအလဵုအသဳတွဵုရးမန်တံဂှ် သ္ပဒတန် ခါန်ကၞက်ကဵုလဝ်ရ။
အပ္ဍဲကောံဓရီုစၠတ်ဓဝ်တွဵုရးမန်ဂတဏံမ္ဂး ဝန်ဇၞော်တံဏံ သွက်ဂွံ ဒုၚ်ဂတိယဵုသစ္စာတုဲ ဒးယိုက်ဂၠေၚ်အာတာလျိုၚ်အလဵုအသဳရောၚ်။
အပ္ဍဲတွဵုရးမန် ၜိုန်ရအလဵုအသဳပြံၚ်အာကီုလေဝ် ပ္ဍဲဒေသတံဂှ်တှ်ေ ဝိုၚ်ဝေၚ်ဇျှၚ်လံၚ်သြန်တံ သွက်ဂွံဆက်ကၠောန်အာ အစဳဇန်နွံရောၚ် ညးမကြပ်ကဵုကဝ်မယှေန်ပၞာန်တံဟီုတုဲ ဂွံတီလဝ်ရ။
သြန်အကံက်ကလိဂွံနၚ်လဝ် နူဝိုၚ်ဝေၚ်တံဂှ် ဒးကဵုမံၚ်အထံက်ပၚ်ကဵု ကဝ်မယှေန်ပၞာန် ဒက်ပ္တန်လဝ် ဂကောံဒပ်မၚ်ကွာန်တံကီု၊ ဂကောံပရေၚ်ဂီုကၠီု ပကီုပရာတ်တံရောၚ် သ္ဂးရ။
စဵုကဵုအခိၚ်လၟုဟ် ဝိုၚ်ဝေၚ်တံ ဆက်နွံမံၚ်ဇၟာပ်ပ်ဒၞာဲတုဲ ပ္ဍဲဒေသဂှ် ဒှ်အာညံၚ်ရဴ အခိုက်ကၞာမွဲယျရောၚ် ညးဒေသမတ်မလီုမွဲတၠဂှ် ဟီုဂးပါ်ပါဲလဝ်ရ။
“ဝိုၚ်ဝေၚ်ဇျှၚ်လံၚ်သြန်တံဂှ် နွံမံၚ်ရ။ လၟုဟ်လေဝ် ကၠောန်မံၚ်ဖိုဟ်။ ပ္ဍဲအရာပ်ယှိုဲပျဳဧလေဝ်နွံ၊ ပ္ဍဲဇေယျာသဳရိလေဝ်ဒှ်မံၚ်၊ ပ္ဍဲသာယာဧလေဝ်ဒှ်မံၚ်။ ဝိုၚ်ဝေၚ်ဇျှၚ်လံၚ်သြန်တံဂှ်တှ်ေ နွံမံၚ်ဇၟာပ်ဒၞာဲရ။ ပေါဲဇာတ်ဂှ်တှ်ေ မၞိဟ်ဗဵုလေဝ်ဟၟဲပုဟ်။ ဝိုၚ်ဝေၚ်တံဂှ် ဟွံကၠေံအာပုဟ်။ ဣဏံဂှ် ဒှ်အာညံၚ်ရဴအခိုက်ကၞာမွဲယျ” သာ်ဝွံ သ္ဂးရ။
ပရေၚ်ဝိုၚ်ဝေၚ်တံဏံဝွံ ကြဴနူပၞာန်သီအဝဵုတုဲဂှ် ပ္ဍဲဒေသပဵုလှဲလး ကၠုၚ်တုဲ လက်ထက်အလဵုအသဳ ဥူအံၚ်ကျဳတိၚ် အာမံၚ်က္ဍိုပ်ဂှ် ကဵုကၠုၚ်လဝ်ပါမေတ်ပေါဲ ညံၚ်ရဴလုပ်သၞောဝ်တုဲ ကဵုအခေါၚ်ကၠောန်ကၠုၚ်လဝ် ဝိုၚ်ဝေၚ်တံရောၚ်။
အပ္ဍဲဒေသဂှ်တှ်ေ ဟိုတ်နူဝိုၚ်ဝေၚ်တံနွံမံၚ်တုဲ စနူကောန်ၚာ်အာယုက် ဟွံစိုပ်တံ ပရေၚ်ဒဂေတ်ပဋိပတ် လီုလာ်ကၠုၚ်ကီုလေဝ် နူကဵုကဝ်မယှေန်ပၞာန်တွဵုရးမန်ဂှ် ဟွံစွံအာရီု ဓလေတ်လဝ်မုက် မဒှ်ရ။
အပ္ဍဲတွဵုရးမန်ဂှ် ဟိုတ်နူဝိုၚ်ဝေၚ်တံဏံတုဲ ပရေၚ်ကမၠတ်ကွဳစက်၊ ပရေၚ်ကၠတ်ဂၠံက်ပၠံၚ်ၜး၊ ပရေၚ်လီဠာန်တံ မွဲဏှမွဲဏှ ဆက်က်ကတဵုဒှ် မံၚ်ကီုလေဝ် နူကဵုကဝ်မယှေန်ပၞာန်တှ်ေ ဆက်တုဲကဵုမံၚ်အခေါၚ် ဝိုၚ်ဝေၚ်တံဖိုဟ် မဒှ်ရ။
ပရိုၚ် – သြၚ်လောန်တိုင်မ်
Photo – CJ