ၜဳကလေၚ်၊ အေဗရာ ၂၅
အပ္ဍဲကဵုတွဵုရးမန် ပွိုၚ်ဍုၚ်ၜဳကလေၚ် ကွာန်ကျံက်ဖျာ ကေုာံ ကွာန်ဝေန်တာပါန်တံဂှ် ဟိုတ်နူကဵုဒပ်ကဝ်မယှေန်ပၞာန် ဗတိုက်ကဵု ပၞာန်ကျာတုဲ သ္ၚိဌာန်လၟိဟ်ကဵုစၞော်ပြၚ် ထပ်လီုလာ်အာရဂှ် ဂွံတီကေတ် နူခရိုၚ်သဓီု KNU ရ။
အပ္ဍဲဂိတုအေဗရာ ၂၂ တုဲကၠုၚ်ဏံ နူကဵုဒပ်ကဝ်မယှေန်ပၞာန် ဗတိုက်လဝ်ကဵုပၞာန်ကျာ ပ္ဍဲကဵုကွာန်ၜါဒၞာဲဏံ ၁၁ ဝါဂှ်တှ်ေ ကြဳဖျေံလဝ်ဗုမ် လၟိဟ် ၃၅ မ မၞုံရောၚ်။
ဟိုတ်နူကြဳဗတိုက်လဝ်ကဵု ပၞာန်ကျာဂှ်ရ ပ္ဍဲကွာန်ကျံက်ဖျာ သ္ၚိ ၁၁ မ၊ ကွာန်ဝေင်တာပါန်ဂှ် သ္ၚိ ၅ မ ဒးအာဗုမ်တုဲ လီုလာ်အာနွံရဂှ် ညးအုပ်ကာ ခရိုၚ်သဓီု ဗော်သွးကောန်ဂကူကရေၚ် KNU ပဒိုသဝ်ဧနိုင် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲအခိၚ်ဗ္တံ ဂိတုအေဗရာ ၂၃ ဂှ်လေဝ် ဒၞာဲပွဳဗွိုၚ်ကွာန်ဝေင်တာပါန် ဏံဂှ် နူကဵုဒပ်ကဝ်မယှေန်ပၞာန် ကြဳဗုမ်ဗတိုက်လဝ်တုဲ အကာဲအရာ ဒးဆောံလေၚ်လဝ် သောဲသောဲဗြောဲဗြောဲတံဂှ်တှ်ေ ဟွံဂွံတီဏီပုဟ် သ္ဂးရ။
စနူဂိတုအေဗရာ ၁၄ စဵုကဵုစိုပ် ၁၉ ဂှ် နူကဵုဒပ်ကဝ်မယှေန်ပၞာန် ဗတိုက်ကဵုပၞာန်ကျာ ပ္ဍဲကွာန်ဝေင်တာပါန်ကဵု ကွာန်မျေတ်ကျိုဝ် ဟွံအောန်နူ ၃၀ ဝါနွံမံၚ်ရောၚ် အတိုၚ်တၚ်နၚ် နူကဵုခရိုၚ်သဓီု KNU ဂှ် ဂွံတီကေတ်ရ။
ဟိုတ်နူဒပ်ကဝ်မယှေန်ပၞာန် ဗတိုက်ကဵုပၞာန်ကျာ အပ္ဍဲဘာဗတောန်လိက်ကဵု စမြိုၚ်ဌာန်ဒတန် ပရေၚ်သာသနာတံတုဲ သ္ၚိဌာန်ညးဒေသ လၟိဟ်ကဵုစှော်ပြၚ်ၚ်တံဂှ် ဒးလဝ်ဗုမ်လီုလာ်အာလဝ် နွံရ။
ဂကောံဇြဟတ်ပၠန်ဂတး သၟဝ်တဲ ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကလဝ်တံဂှ် ပ္ဍဲဂိတုအေဗရာ ၁၂ တေံ ဗတိုက် သီကေတ်လဝ် ဗဒိုပ်ပၞာန်လေဝ်ကေ ပ္ဍဲပွိုၚ်ဍုၚ်ၜဳကလေၚ်နွံတုဲ ကြဴနူဂှ် ဆက်တုဲကၠောန်မံၚ် ပေါဲဗတိုက်သီဗဒိုပ် ဝေၚ်တာပါန်ရောၚ်။
ဟိုတ်နူပေါဲဗတိုက် သီဗဒိုပ်လေဝ်ကေ ကေုာံ ဝေင်တာပန်တံတုဲ ညးဒေသနူကဵုကွာန် လေဝ်ကေ၊ မျေတ်ကျိုဝ်၊ ကျိုဝ်ဝိုင်၊ ဝေင်တာပန်၊ မေန်သဝ်ဂှ် လၟိဟ် ၁၃၀၀၀ ပြၚ် ထောံဌာန်ဒၞာဲဝါဲတုဲ ဒးဂြိပ်ပါဲမံၚ်ဘဲပၞာန်တံဂှ်ရ နွံပၟိက်မံၚ်ကဵု အရီုအဗၚ်ပရေၚ်ဗ္စာရဏာ မၞိဟ် ဗွဲမဂတာပ်တဲရောၚ် ဂွံတီကေတ် နူညးကဵုအရီုဗၚ် ညးပါဲမံၚ်ဘဲပၞာန်တံ မဒှ်ရ။
ပရိုၚ် – သြၚ်လောန်တိုင်မ်
Photo – CJ