နေပျဳဒဝ်၊ အေဗရာ ၂၅
အပ္ဍဲကဵုဒၞာဲ ဒပ်ပၠန်ဂတးတံထိၚ်ချုက်လဝ် ၆၀ ပွိုၚ်ဍုၚ်ဂှ် လလောၚ်တြးထောံ နကဵုအကာဲအရာ ကာမံက်တိုန်ကေုာံ အမိၚ်အုပ်ဓုပ်ပၞာန်ရောၚ် သမ္မတသီအဝဵု ဥူမေန်အံၚ်လှိုၚ် ထပက်စၟတ်တဲတုဲ ပ္ဍဲဂိတုအေဗရာ ၂၃ ဂှ် လလောၚ်ပတိတ်လဝ်ရ။
တာလျိုၚ်အခေါၚ်ကၠောန် အပ္ဍဲကဵုပွိုၚ်ဍုၚ်လလောၚ်တြးလဝ် အမိၚ်ပရေၚ်အုပ်ဓုပ်ပၞာန်တံဂှ် သမ္မတသီအဝဵု ဥူမေန်အံၚ်လှိုၚ် ပအပ်ပြာပ်ကဵုလဝ် ကုဂဥုပ်သ္ကိုပ်က္ဍိုက်ပ်ဒပ်ပၞာန် သ္ကိုပ်ပၞာန်ဇၞော် ယေဝ်ဝေန်ဥူ ရဂှ် အပ္ဍဲလိက်လလောၚ် ဗၟံက်ထ္ၜးလဝ်ရ။
အတိုၚ်ပွိုၚ်ဍုၚ် လလောၚ်တြးလဝ် အမိၚ်ပရေၚ်အုပ်ဓုပ်ပၞာန်တံမ္ဂး တွဵုရးသေံ ၁၅ ပွိုၚ်ဍုၚ်၊ တွဵုရးရခေၚ် ၁၄ ပွိုၚ်ဍုၚ်၊ ရးဒေသသကိုၚ် ၈ ပွိုၚ်ဍုၚ်၊ တွဵုရးချေၚ် ၇ ပွိုၚ်ဍုၚ်၊ တွဵုရးကချေၚ် ကေုာံ ရးဒေသမကွေ ၅ ပွိုၚ်ဍုၚ်၊ တွဵုရးကရေၚ်ဍာဲ ၃ ပွိုၚ်ဍုၚ်၊ တွဵုရးကရေၚ် ၂ ပွိုၚ်ဍုၚ်ကဵု ရးဒေသမာန္တလေဝ် ၁ ပွိုၚ်ဍုၚ်တံ ပါလုပ်ရ။
အပ္ဍဲကဵုပွိုၚ်ဍုၚ်လလောၚ်တြးလဝ် အကာဲအရာကာမံက်တိုန် ကေုာံ အမိၚ်ပရေၚ်အုပ်ဓုပ်ပၞာန်တံဂှ် စနူဂိတုအေဗရာ ၂၃ တုဲ စဵုကဵု ပွိုၚ် ၉၀ တ္ၚဲလုပ်အဝေၚ်ရောၚ် လလောၚ်တြးလဝ်ရ။
အပ္ဍဲပွိုၚ်ဍုၚ် ထပ်ဒးဒုၚ်လလောၚ်တြးလဝ် အမိၚ်ပရေၚ်အုပ်ဓုပ်ပၞာန် တံဂှ် ပေါဲဗတိုက်အကြာၜါလ္ပာ် သ္ကာတ်မြဟ်တိုန်ကၠုၚ်မာန်တုဲ နူလပါ်ဒပ်ပၞာန် ပရေၚ်ဗတိုက်ကဵုပၞာန်ကျာ ဂၠိုၚ်တိုန်မာန်ရောၚ် ညးလ္ၚတ်ပရေၚ်ပၞာန်တံ ဟီုရ။
ပြဟ်ဟ်ဏံမ္ဂး အပ္ဍဲပွိုၚ်ဍုၚ်ဗွဲမဂၠိုၚ် ထပ်လလောၚ်တြးလဝ် အမိၚ်ပရေၚ်အုပ်ဓုပ်ပၞာန်တံဂှ် အကြာဒပ်ကဝ်မယှေန်ပၞာန်ဗမာကဵု ဂကောံဇြဟတ်ပၠန်ဂတးတံ ပေါဲဗတိုက် ပရေၚ်ဇီုကပိုက် သ္ကာတ်မြဟ် ဒှ်မံၚ်ရ။
မွဲလပါ်ပၠန်လေဝ် ဂကောံရပ်လွဟ်ကောန်ဍုၚ်အရၚ်တံကီု သီုဂကောံ ဇြဟတ်ပၠန်ဂတးတံ စနူဂိတုအေဗရာ ၂၀ တုဲ အပ္ဍဲပွိုၚ် ၁၀၀ တ္ၚဲ ကၠုၚ်သဳကၠဳ ပရေၚ်ၜိုဟ်လလမ်အိုတ်ညိဂှ် အလဵုအသဳသီအဝဵု ဘိက်ပၟိၚ်လဝ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media