ကအ်ကြိက်၊ အေဗရာ ၂၅
အပ္ဍဲပွိုၚ်ဍုၚ် ထပ်ဒးဒုၚ်လလောၚ်တြးလဝ် အမိၚ်ပရေၚ်အုပ်ဓုပ်ပၞာန်ကဵု အကာဲအရာကာမံက်တိုန်တံဂှ် ပရေၚ် ကြဳဗုမ်ဗတိုက် နူဗလးကျာ ဂၠိုၚ်တိုန်မာန်ရောၚ် ညးလ္ၚတ်ပရေၚ်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲဂိတုအေဗရာ ၂၃ ဂှ် သမ္မတသီအဝဵု ဥူမေန်အံၚ်လှိုၚ် ထပက်စၟတ်တဲတုဲ လလောၚ်တြးလဝ် အကာဲအရာကာမံက်တိုန် ကေုာံ အမိၚ်ပရေၚ်အုပ်ဓုပ်ပၞာန် ဒၞာဲကဵုဂကောံဇြဟတ်ပၠန်ဂတးတံ မထိၚ်ချုက်လဝ် အပ္ဍဲကဵု ၆၀ ပွိုၚ်ဍုၚ် မဒှ်ရ။
အတိုၚ်ပွိုၚ်ဍုၚ် လလောၚ်တြးလဝ် အမိၚ်ပရေၚ်အုပ်ဓုပ်ပၞာန်တံမ္ဂး တွဵုရးသေံ ၁၅ ပွိုၚ်ဍုၚ်၊ တွဵုရးရခေၚ် ၁၄ ပွိုၚ်ဍုၚ်၊ ရးဒေသသကိုၚ် ၈ ပွိုၚ်ဍုၚ်၊ တွဵုရးချေၚ် ၇ ပွိုၚ်ဍုၚ်၊ တွဵုရးကချေၚ် ကေုာံ ရးဒေသမကွေ ၅-၅ ပွိုၚ်ဍုၚ်၊ တွဵုရးကရေၚ်ဍာဲ ၃ ပွိုၚ်ဍုၚ်၊ တွဵုရးကရေၚ် ၂ ပွိုၚ်ဍုၚ်ကဵု ရးဒေသမာန္တလေဝ် ၁ ပွိုၚ်ဍုၚ်တံ ပါလုပ်ရ။
ကြဴနူ အလဵုအသဳသီအဝဵု လလောၚ်တြး အမိၚ်ပရေၚ်အုပ်ဓုပ်ပၞာန်တုဲ အပ္ဍဲဂိတုအေဗရာ ၂၄ အခိၚ်ဒေါဝ်တ္ၚဲဂှ် အပ္ဍဲတွဵုရးရခေၚ် ဒၞာဲပွဳဗွိုၚ်ဍုၚ် ၚပလီ ဒပ်ပၞာန်အာရက္ခ AA ထိၚ်ချုက်လဝ်ဂှ် ကၠုၚ်ကြဳဗုမ်နူၜၚ်ကျာ ဟွံအောန်နူကဵု ၁၀ ဝါ ရောၚ်။
အပ္ဍဲပွိုၚ်ဍုၚ် လလောၚ်တြးလဝ် အမိၚ်ပရေၚ်အုပ်ဓုပ်ပၞာန်တံဂှ် အတိုၚ်ရန်တၟအ် ဒပ်ပၞာန်ဗၟာ ဖျေံလဝ်အစဳဇန်မ္ဂး ပေါဲဗတိုက်တံ ဆက်နွံအာမံၚ်ရောၚ် ညးတာလျိုၚ်သုတေသနသွာၚ်ပၞာန် နူ MDSI ကိုနံၚ်ယော ဟီုရ။
အပ္ဍဲကဵုပွိုၚ်ဍုၚ် လလောၚ်တြးလဝ် အကာဲအရာကာမံက်တိုန်ကဵု အမိၚ်ပရေၚ်အုပ်ဓုပ်ပၞာန်တံမ္ဂး စနူဂိတုအေဗရာ ၂၃ တုဲ စဵုကဵုပွိုၚ် ၉၀ တ္ၚဲရောၚ်ဏံလုပ်အဝေၚ်ရောၚ်ဂှ် နူကဵုဂကောံအလဵုအသဳသီအဝဵု လလောၚ်တြးလဝ်ရ။
နကဵုဂကောံအလဵုအသဳသီအဝဵုဂှ် ဘိက်ပၟိၚ်ကော်မံၚ် ပရေၚ်ၜိုဟ်လလမ် ကုဂကောံဇြဟတ်ပၠန်ဂတးတံတုဲ မွဲလပါ်ပၠန်လေဝ် လလောၚ်တြးမံၚ် အမိၚ်ပရေၚ်အုပ်ဓုပ်ပၞာန်တံ မဒှ်ရ။
အပ္ဍဲဂိတုအေဗရာ ၂၀ တုဲကၠုၚ်ဏံ အလဵုအသဳပၞာန် သမ္မတသီအဝဵု ဥူမေန်အံၚ်လှိုၚ် ပၠတရဴဂှ် ဘိက်ပၟိၚ်ကော်လဝ် သွက်ဂွံဆဵုဂဗသဳကၠဳ ပရေၚ်ၜိုဟ်လလမ် ကုဂကောံရပ်လွဟ်ကောန်ဍုၚ်အရၚ် သီုဖအိုတ်တံတုဲ အခိၚ်သွက်ဂွံသဳကၠဳဂှ် စၟတ်သမ္တီကဵုလဝ် ပွိုၚ် ၁၀၀ တ္ၚဲရောၚ်။
တုဲပၠန် ညံၚ်ဒပ်စဵုဒၞာညးဍုၚ်ကွာန် PDF တံ ဂွံလုပ်ကၠုၚ် သၟဝ်ဗွိုၚ်သၞောဝ်ဥပဒေဂှ် သမ္မတသီအဝဵု ဘိက်ပၟိၚ်လဝ်နွံရ။
ပရေၚ်အလဵုအသဳသီအဝဵု ဘိက်ပၟိၚ်ကော်လဝ် သဳကၠဳပရေၚ်ၜိုဟ်လလမ်ဏံဂှ် ဒှ်ဆၜိုတ် အယောၚ်အလာသၟးတုဲ လစွံစိုတ်ဍာံဍာံဟွံသေၚ်ရောၚ် ဂကောံဇြဟတ်ပၠန်ဂတးတံ သီုဖအိုတ်ဂှ် တးပါဲလဝ်အိုတ်ရ။
ပရိုၚ် – သြၚ်လောန်တိုၚ်မ်
Photo – Social Media