ထဝါဲ၊ အေဗရာ ၂၉
ပ္ဍဲရးတနၚ်သဳ ဍုၚ်မဝ်တံၚ် ပယျဵုသေံ-ဗၟာ အပ္ဍဲအရာပ် ၃ ကဵု ကွာန်ဖံၚ်သုက်ဂှ် ဟိုတ်နူဒပ်ပၞာန်သီအဝဵု ထပ်ကြဳဗုမ်နူဗလးကျာတုဲ ညးဍုၚ်ကွာန်ချိုတ်အာနွံမံၚ် ညးတာလျိုၚ်ဒပ်စဵုဒၞာညးဍုၚ်ကွာန် ပွိုၚ်ဍုၚ်ဗိက်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုအေဗရာ ၂၇ အခိၚ်နူဂယး ၁၁ နာဍဳပြၚ်ၚ်ဂှ် နူကဵုဒပ်ပၞာန်ကျာဗိက် က္ၜၚ်ကျာဂျက်ဖိုက်တာမွဲမ တိုန်ကၠုၚ်တုဲ ကြဳဖျေံဗုမ် ၂ မ အပ္ဍဲကၠအ်သတ်ဗြဴကၠေၚ် ကွာန်ဖံၚ်သုက်ကီု ပ္ဍဲအခိၚ်သဝ်တ္ၚဲ ၄ နာဍဳပြၚ်ၚ်ဂှ်လေဝ် ပ္ဍဲအရာပ် ၃ ဍုၚ်မဝ်တံၚ်ဂှ် ကြဳဖျေံလဝ်ဗုမ် ၂ မရောၚ် သ္ဂးရ။
ဟိုတ်နူဒးဒုၚ်ကြဳဗုမ် အပ္ဍဲဍုၚ်မဝ်တံၚ်ဂှ် ညးတြုံမံၚ်ပ္ဍဲအရာပ် ၃ အာယုက် ၅၀ သၞာံမွဲတၠ ချိုတ်အာတုဲ သ္ၚိ ၃ မ လီုလာ်အာတုဲ ပ္ဍဲကွာန်ဖံၚ်သုက်ဂှ်တှ်ေ ပရေၚ်မၞိဟ်ဒးဝပ်ကီု သ္ၚိလီုလာ်တံကီု ဟၟဲရောၚ် ဂွံတီကေတ်ရ။
ဟိုတ်နူဒပ်ပၞာန် ကြဳလဝ်ဗုမ်ပ္ဍဲဍုၚ်မဝ်တံၚ်ကဵု ပွဳဗွိုၚ်တံ ၂ တ္ၚဲဆက်က်တုဲ ညးဍုၚ်ကွာန်ဗွဲမဂၠိုၚ်တံ ဒးဂြိပ်ပါဲတိတ်အာ ဒၞာဲဗၠးဘဲတံဂှ်ရ။
ပ္ဍဲဂိတုအေဗရာ ၂၆ ဂှ်လေဝ် ပ္ဍဲအရာပ် ၉ ကဵု အရာပ် ၁ ဍုၚ်မဝ်တံၚ်ဂှ် လပါ်ဒပ်ပၞာန်တံ ဗတိုက်လဝ် နူဗလးကျာတုဲ သ္ၚိ ၂ မ လီုလာ်အာရောၚ် ဂွံတီကေတ်ရ။
ပ္ဍဲသၞာံအာ တုဲကၠုၚ်တေံ ဂိတုနဝ်ဝေမ်ပါ ၁၄ ဂှ် နူကဵုဒပ်ပံၚ်ကောံ KNLA တံ ဗတိုက်သီကေတ်လဝ် ဗဒိုပ်ကဝ်မယှေန်ပၞာန် မဖျေံလဝ်သ္ဇိုၚ် အပ္ဍဲမဝ်တံၚ်ဂှ်တုဲ စဵုကဵုတ္ၚဲဏံ ထိၚ်ချုက်လဝ်ဏီရောၚ်။
သွက်ဂွံကလေၚ်ဂွံဍုၚ်မဝ်တံၚ်ဂှ် နူလပါ်ဒပ်ပၞာန်ဗၟာလေဝ် ထပက်မံၚ်ကရောၚ်ပၞာန် နကဵုဇြဟတ်ဗွဲမဂၠိုၚ်တုဲ ပ္ဍဲပွဳဗွိုၚ်ကွာန်ဗတဳဗုဂှ် ပေါဲဗတိုက်ဒှ်မံၚ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – KNU