ရေဝ်၊ အေဗရာ ၂၉
ပ္ဍဲတွဵုရးမန် ပွိုၚ်ဍုၚ်ရေဝ် သ္ကုတ်ဂၠံၚ် ရေဝ်-ဇြပ်ဗုဂှ် ပ္ဍဲအခိၚ်လၟုဟ် ညးယိုက်ဝန် Non-CDM တံ ဒးဒုၚ်ရပ်မံၚ် ဆက်က်ရောၚ်ဂှ် ဂွံတီကေတ် နူတမ်ရိုဟ်ပရိုၚ်ဒေသတံရ။
ပ္ဍဲဂိတုအေဗရာ ၁၉ တုဲကၠုၚ်ဏံ လ္တူသ္ကုတ်ဂၠံၚ် ရေဝ်-ဇြပ်ဗု ညးယိုက်ဝန်အလဵုအသဳ ၃ တၠ နူကဵုရုၚ်ပရေၚ်အုပ်ဓုပ် ခရိုၚ်ရေဝ် တခဳဇၞော် ဒဝ်တေန်ဝေန် ဂှ် နူကဵုဂကောံပၠန်ဂတးမွဲ ရပ်ဏာလဝ်ရောၚ်။
တုဲပၠန် ပ္ဍဲဂိတုအေဗရာ ၂၄ ဂှ် လ္တူသ္ကုတ်ဂၠံၚ် ရေဝ်-ဇြပ်ဗုပၠန်ရ ညးတာလျိုၚ်ဌာနပရေၚ်တဵုလွဳ ဍုၚ်ခေါဇာ ဥူကျဝ်တူ ဂှ်လေဝ် နူကဵုဂကောံပၠန်ဂတးမွဲ ထပ်ရပ်ဏာလဝ်ပၠန် မဒှ်ရ။
ညးယိုက်ဝန်ဌာနအလဵုအသဳ ၄ တၠ မဒးဒုၚ်ရပ်လဝ်တံဂှ် စဵုကဵုအခိၚ်နူဂယး ဂိတုအေဗရာ ၂၈ ဂှ် ကလေၚ်ဗၠးတိတ်ကၠုၚ်လဝ်ဟၟဲဏီတုဲ ပရေၚ်ဆက်စၠောံကဵု ဂကောံသ္ၚိကၟိန်တံလေဝ် ပိုတ်မံၚ်ရောၚ် သ္ဂးရ။
ဆေၚ်စပ်ကဵု ပရေၚ်ရပ်မံၚ် ညးယိုက်ဝန် Non-CDM တံဂှ်တုဲ နူကဵုဌာန်ပရိုၚ်သြၚ်လောန်တိုၚ်မ် ကေတ်အဆက်သၟာန်လဝ် ကုတမ်ဒပ် သၟဝ်အလဵုအသဳညဳသၟဟ်ကောန်ဂကူ NUG ကဵု ဂကောံပၠန်ဂတးမန် ပ္ဍဲဒေသတံကီုလေဝ် စဵုကဵုအခိၚ်လၟုဟ် မုလေဝ်ကလေၚ်သောၚ်ကလးကဵုလဝ် ဟၟဲဏီပုဟ်။
လပါ်ဒပ်ပၞာန်သီအဝဵုတံဂှ်တှ်ေ ဆေၚ်စပ်ကဵုပရေၚ်ညးယိုက်ဝန် Non-CDM တံ ဒးဒုၚ်ရပ်လဝ်ဏံဂှ် ညံၚ်ဂွံဖန်ဖက်သောၚ်ကလးကဵုပြဟ်ပြဟ်ကဵု ယဝ်ရပၟိက်ကိစ္စဟၟဲမ္ဂး ညံၚ်ဟွံဂွံအာကၠုၚ် လပါ်သ္ကုတ်ဂၠံၚ် ရေဝ်-ဇြပ်ဗု ဂှ် စၞောန်ပ္ညုၚ်လဝ်ရောၚ် ဂွံတီကေတ် နူညးကြပ်ကဵု ဒပ်ပၞာန်တံရ။
အပ္ဍဲသ္ကုတ်ဂၠံၚ် ရေဝ်-ဇြပ်ဗု ပ္ဍဲကာလသီအဝဵုဏံ ညးယိုက်ဝန် Non-CDM တံ မွဲဏှမွဲဏှ ဒးဒုၚ်ရပ်မံၚ်တုဲ ဗွဲမဂၠိုၚ်ဂှ်တှ်ေ ကဵုဒုၚ်ဝန်ကတိတုဲ ဗၠးတိတ်ကၠုၚ်လဝ်အိုတ်ရ။
ပရိုၚ် – သြၚ်လောန်တိုၚ်မ်
Photo – Social Media