မတ်မလီု၊ အေဗရာ ၂၉
ပ္ဍဲတွဵုရးမန် ညးကလိဂွံလဝ် အခေါင်ထပၠုပ်နၚ်ကၠေၚ်စက် မွဲတၠဓဝ် တၠဆေၚ်ကၠေၚ်ရာဇာမေန် ဥူညီညီထိုဲ ဂှ် နူကဵုအလဵုအသဳပၞာန်သီအဝဵု ရပ်စပ်ကေတ်လဝ်အရေဝ်ဂှ် ဂွံတီကေတ် နူညးမကြပ်ကဵု ရုၚ်ဗၠာဲသၟိၚ်တံရ။
ပ္ဍဲပွိုၚ်ဍုၚ်ကျာ်မြဟ် အပ္ဍဲသတ္တဟမရနုက်ကဵုပိ ဂိတုအေဗရာ လောန်ကၠုၚ်ဏံဂှ် ကွဳစက်ဖ္ဍိုက်ကၠေၚ်မွဲမ တတ်ကၠောံကၠုၚ် ဒဒန်ၜဳကဍတ် (ထီုမၠဵု) ဂှ် နူကဵုဂကောံအလဵုအသဳပၞာန်တံ ပဒေါအ်စၟဳစၟတ်တုဲ ဟိုတ်နူစၟဳစၟတ်ဆဵုကေတ်လဝ် မဖ္ဍိုက်နၚ်သွက်ဂွံသွံကဵု ဒၞာဲကမၠောန်ထဝ် ဟွံလုပ်သၞောဝ်တံတုဲ ရပ်ထိၚ်လဝ် ကွဳစက်ဖ္ဍိုက်ကၠေၚ်ကဵု ရဲဒဳကွဳစက်တံဂှ် မဒှ်ရ။
ကြဴနူဂှ် နူကဵုဂကောံအလဵုအသဳပၞာန်တံ ရပ်ဏာတၠဆေၚ်ကၠေၚ် တၠသၞေဟ် Puma Power International Port Terminal (PPIPT) ဥူညီညီထိုဲဂှ်တုဲ ပ္ဍဲရုၚ်ဗၠာဲသၟိၚ် ဒေသမုဟ်ပန်ဂှ် နကဵုဥပဒေကပေါတ် ပရေၚ်ရေၚ်တၠုၚ်ကိစ္စဇၞော် ၝောံပိုဒ် (၅) ဂှ် ပံက်လဝ်အမှုရောၚ် သ္ဂးရ။
နူအခိၚ်ကၠာတေံလေဝ် ဆေၚ်စပ်ကဵုပြသၞာကၠေၚ်တုဲ ဥူညီညီထိုဲ ဟိုတ်နူသွံပတိတ်ကၠေၚ်စက်မ္ၚးဂှ် ဒးဒုၚ်ရပ်လဝ် မွဲဏှမွဲဏှ နွံကီုလေဝ် ဟိုတ်နူကဵုသြန်မာန်တုဲ ဗၠးတိတ်ကၠုၚ်လဝ်နွံရောၚ် ညးမကြပ်ကဵုရုၚ်ဗၠာဲသၟိၚ်မွဲတၠ ဟီုရ။
တၠဆေၚ်ကၠေၚ်ရာဇာမေန် ဥူညီညီထိုဲ ဝွံ ကရောံကမၠောန်ဟွံလုပ်သၞောဝ် လ္ပာ်တွဵုရးကရေၚ် ကေုာံ သွက်ဂကောံပၠန်ဂတးတံဂှ် ပရေၚ်သွံကၠေၚ်စက်တံ နွံမံၚ်ရောၚ် ပရိုၚ်တံ မံက်တိတ်မံၚ်ကီုလေဝ် နူကဵုဌာန်ပရိုၚ်သြၚ်လောန်တိုၚ်မ် သွက်ဂွံသ္ပအာဒတန်မာန်ဂှ် စၟဳစၟတ်မံၚ်ဖိုဟ်ဏီ မဒှ်ရ။
ဥူညီညီထွေး ဝွံ ပံၚ်စလဝ်ကဵု သ္ကိုပ်ဝန်ဇၞော်တွဵုရးမန်တြေံ ဥူအံၚ်ကျဳတိၚ် တုဲ သွက်တွဵုရး ညံၚ်ဂွံကလိဂွံအခေါင်ထပၠုပ်နၚ်ကၠေၚ်စက် မွဲတၠဓဝ်ဂှ် ဂစာန်ကၠောန်လဝ်တုဲ ကြဴနူဂှ် ဗွဝ်ဖျာကၠေၚ်စက်တံဂှ် ဖန်ဇန်မံၚ်အတိုၚ်ပၟိက်စိုတ်ညးတေံရောၚ် ဂွံတီကေတ်ရ။
ပ္ဍဲတွဵုရးမန် ကြဴနူရာဇာမေန် ကလိဂွံလဝ်အခေါင်ထပၠုပ်နၚ်ကၠေၚ်စက်တုဲ အပ္ဍဲကၟိန်ဍုၚ်မ္ဂး ယဝ်ရၜတ်ကၞာတ်အာကဵု တွဵုရးကဵု ရးဒေသတၞဟ်ဟ်တံမ္ဂး ပ္ဍဲတွဵုရးမန်ဂှ် င္ၚုဟ်ကၠေၚ်စက် စိုပ်အာမံၚ်သၠုၚ်အိုတ်တုဲ တုပ်တဴညံၚ်ရဴသာ်ဂှ်ကီု ညးဍုၚ်ကွာန်တံ သွက်ဂွံရာန်ကၠေၚ်စက်ဂှ် ဒးဆဵုဂဗမံၚ်ကဵု အခက်အခုဲဗွဲမဂၠိုၚ်တံရ။
အပ္ဍဲဂိတုမာတ် လောန်ကၠုၚ်ဏံလေဝ် ဟိုတ်နူကဵု ပရေၚ်သွံကၠေၚ်စက် ဟွံလုပ်သၞောဝ်တုဲ တၠဆေၚ်ကၠေၚ် ကေုာံ မာန်နေဂျာကီု သီုညးတာလျိုၚ်နွံ နူဆေၚ်သွံကၠေၚ် မေန်တ၊ မိဘမေတ္တာ၊ သွန်မျာန်မာ တံ ဒးဒုၚ်ရပ် ပံက်လဝ်အမှုနွံမံၚ်ကီုရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media