ဗြဝတီ၊ အေဗရာ ၃၀
အပ္ဍဲတွဵုရးကရေၚ် လ္တူဍုၚ်ဗြဝတီ ဂကောံရပ်လွဟ် ဒေါအ်ပန်ပှော် ကရေၚ် မံၚ်စံၚ်မံၚ်တံ ပၟိက်ကိစ္စဟၟဲမ္ဂး ညံၚ်ဟွံဂွံရပ်လွဟ်ကီု တၚ်ဒးဒဂေတ်ဗက်တံကီုဂှ် နူကဵုဒပ်ကဝ်မယှေန်ပၞာန် ပတိတ်လဝ်အမိၚ် ကၟာတ်ဗဒေါအ်လဝ်ရောၚ်ဂှ် ဂွံတီလဝ် နူညးမကြပ်ကဵု ဂကောံရပ်လွဟ်တံရ။
အပ္ဍဲဂိတုအေဗရာ ၂၃ ပ္ဍဲတမ်ဒပ်ခလရ ၂၇၅ လ္တူဍုၚ်ဗြဝတီ ကၠောန်ဗဒှ်လဝ် ကောံဓရီု ဌာနနာနာတံကဵု ဂကောံရပ်လွဟ်ကရေၚ် ဒေါအ်လဝ်ပန်ပှော်တံတုဲ လ္တူဒပ်ပၞာန်ကရေၚ်ပတုဲဖဝ် ဒဳမဝ်ကရေဇြဳ DKBA၊ ကံၚ်သဳၜိုဟ်လလံကရေၚ် KNU/KNLA PC ကေုာံ ဒပ်စဵုဒၞာပယျဵု BGF တံ ပတိတ်ကဵုလဝ်အမိၚ်ရ။
အပ္ဍဲကဵုဒပ်ကဝ်မယှေန်ပၞာန် ပတိတ်လဝ်အမိၚ်တံဂှ်တှ်ေ သွက်ဂကောံရပ်လွဟ် မအာကၠုၚ်မံၚ် လ္တူဍုၚ်ဗြဝတီတံ နကဵုကယျိုၚ်ယူနဳဖံၚ်ပၞာန်တံဂှ် လ္ပကျိုၚ်ကျဝ်လဝ် ညံၚ်ရဴ ၚဴမွဲသ္ကုတ် ကမွဲသ္ကုတ်ကီု ကေုာံ ဒးအာကၠုၚ် အတိုၚ်စေဝ်ပၞောန်ပၞာန် ဂကောံရပ်လွဟ်မဆေၚ်စပ်တံရောၚ် ပါလုပ်ရ။
တုဲပၠန် ကောန်ဒပ်ဂကောံရပ်လွဟ် မံၚ်စံၚ်မံၚ် ပ္ဍဲအကြာအရာပ် လ္တူဍုၚ်တံဂှ် ပၟိက်ကိစ္စဟၟဲမ္ဂး ညံၚ်ဟွံဂွံရပ်လွဟ်၊ လွဟ်တံဂှ်တှ်ေ ဒးပအပ်စွံလဝ် ဒၞာဲတမ်ဒပ်ဌာန မဆေၚ်စပ် ဟွံသေၚ်မ္ဂး ရုၚ်ထိၚ်ဒဝ်စေဝ်ပၞောန်တံရောၚ် ပါလုပ်ရ။
အပ္ဍဲလ္တူဍုၚ်ဗြဝတီ ယဝ်ရစၟဳစၟတ်ဆဵုကေတ် ရပ်လဝ်လွဟ် နကဵုဟၟဲကဵု အခေါၚ်မ္ဂးတှ်ေ သွက်ဂွံရပ်စပ်အာအမှု နကဵုပရေၚ်ရပ်လွဟ် ဟွံလုပ်သၞောဝ်ရောၚ် ကေုာံ ပ္ဍဲအခိၚ်ကလေၚ်ပံက်ဒဒန်စၟတ် ၂ မ္ဂး သၞေဟ်ကင်ဂိက် ဟွံလုပ်သၞောဝ်တံဂှ် သွက်ဂွံကလေၚ် ထိၚ်ချုက်အာ ရောၚ် တၚ်နၚ်တံဏံ ပါလုပ်မံၚ်ရ။
ဂကောံရပ်လွဟ် အပ္ဍဲဍုၚ်တံ ကျိုၚ်လဝ်ကယျိုၚ်ယူနဳဖံၚ်တုဲ လ္ပလုပ်စသုၚ် ပ္ဍဲဖျာဆေၚ်စသုၚ်စၞ၊ ရုၚ်ကေတဳဗဳတံကီု ဒဳမံၚ်ကွဳစက် လ္တူဍုၚ် အရာဟၟဲကဵုစေဝ်ပၞောန်တံကီု ပစူလဝ်ပၠံၚ်သေနာတ်တုဲ ညံၚ်ဟွံဂွံရပ်လွဟ် အာကၠုၚ်မံၚ်ဂှ်လေဝ် နူကဵုဒပ်ကဝ်မယှေန်ပၞာန် ပတိတ်လဝ်အမိၚ်ရ။
“ရန်တၟအ်အဓိကဂှ်တှ်ေ ညးဍုၚ်ကွာန်မံၚ်စံၚ်တန်တဴ အပ္ဍဲဍုၚ်တံ မနွံမံၚ်ပၟိက် ပ္ဍဲလၟေၚ်တရဴပရေၚ်ၜိုဟ်လလမ် သွက်ဂွံဆက်အာဂတ ဏံဂှ် ညံၚ်ဟွံဂွံဒှ် ဒစုက်ဒလ ” သာ်ဝွံ ပ္ဍဲအမိၚ်စၞောန်ပ္ညုၚ် ကဝ်မယှေန်ပၞာန်ဂှ် ပါလုပ်ရ။
နူကဵုဒပ်ကဝ်မယှေန်ပၞာန် ၜိုန်ရပတိတ်လဝ်အမိၚ် ညံၚ်ဟွံဂွံရပ်လွဟ် အာကၠုၚ်ကီုလေဝ် ဂကောံရပ်လွဟ်တံဂှ် ပရေၚ်ဒဂေတ်ဗက်ဟၟဲတုဲ လ္တူဍုၚ်ဂှ်တှ်ေ ဆက်တုဲ ရပ်လွဟ်အာကၠုၚ်မံၚ် ဗီုအခိၚ်ကၠာတေံ ဖိုဟ်တုဲ ဒှ်မံၚ်အကာဲအရာလၟေၚ်ဓမ္မတာရ ညးဒေသမွဲတၠ သ္ဂးရ။
စရၚ်ယၟုကောန်ဒပ် နွံလ္တူဍုၚ်ဗြဝတီ ဂကောံကံၚ်သဳ ၜိုဟ်လလံကရေၚ် ကေုာံ ဂကောံဒပ်ပၞာန်ကရေၚ်ပတုဲဖဝ် ဒဳမဝ်ကရေဇြဳတံဂှ် ညံၚ်ဂွံပလံၚ်ကဵု ဒပ်ပၞာန်တုဲ ညံၚ်ဂွံပံၚ်တောဲ ကၠောန်အာ သွက်ပရေၚ်ဂီုကၠီုလ္တူဍုၚ်ကီု အပ္ဍဲဂိတုဂျာန်နဝါရဳ တုဲကၠုၚ်ဏံဂှ် ဒပ်ပၞာန်ပတိတ်လဝ်အမိၚ်ရ။
မွဲအဆက်ဓဝ်ဂှ် ဒပ်ပၞာန်ကောန်ဂကူကရေၚ် KNA မံၚ်စံၚ်မံၚ် လ္တူဍုၚ် ဗြဝတီတံဂှ်လေဝ် ညံၚ်ဂွံတိတ်အာ နူဍုၚ်ပြဟ်ဟ် ညံၚ်ဂွံအာစိုပ် ဌာန်ဂအုပ်ဒပ် တိဍာ်လၟေၚ် ၂ ဂှ် ဒပ်ပၞာန်ပတိတ်လဝ်အမိၚ်တုဲ ဒပ် KNA လ္ၚဵုတံ ဒဂေတ်ဗက်ကီုလေဝ် ဗွဲမဂၠိုၚ်တံဂှ်တှ်ေ သၠာဲပတိတ်ထောံ တဆိပ်ပၞးတုဲ ကလေၚ်ဗာန်စုတ်တဆိပ်ပၞး BGF ဂှ် ဆက်တုဲမံၚ်စံၚ်မံၚ် လ္တူဍုၚ်ဗြဝတီဖိုဟ် ရောၚ်။
ပရိုၚ် – သြၚ်လောန်တိုၚ်မ်
Photo – Social Media