မတ်မလီု၊ အေဗရာ ၃၀
အပ္ဍဲတွဵုရးမန် ထပ်သၠုၚ်ပတိုန်ကဵု ဇြဟတ်ဓာတ်လလဳရောၚ် ဝန်ဇၞော်ကၟိန်ဍုၚ် ဟီုဂးတုဲ ကြဴနူဂှ် အခိၚ်ဓာတ်လလဳပိုတ် လံတိုန်ဂၠိုၚ်အာတုဲ ပရေၚ်ပိုန်ဒြပ်မၞိဟ်တံ ခက်ခုဲကၠုၚ် ဗွဲမလောန်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲကဵုရးဒေသ ကေုာံ တွဵုရးတံဂှ် ပွိုၚ်မွဲမွဲတ္ၚဲမ္ဂး ပရးကဵုမံၚ် ဓာတ်လလဳ သွက် ၁၂ နာဍဳဂှ် သွက်ဂွံသၠုၚ်ပတိုန် စဵုကဵု ပွိုၚ် ၁၄ နာဍဳ ရောၚ် ဝန်ဇၞော်ကၟိန်ဍုၚ် ဌာန်ဝန်ဇၞော်ဓာတ်လလဳ သမ္မတသီအဝဵု ခါန်ကၞက် ဥူကိုကိုလွေၚ် ဟီုလဝ် ပ္ဍဲဂိတုအေဗရာ ၂၂ တုဲကၠုၚ်ဏံရ ။
ၜိုန်ရဟီုမံၚ် သၠုၚ်ပတိုန်ကဵုဓာတ်လလဳကီုလေဝ် ပ္ဍဲဒေသတံဂှ်တှ်ေ ပွိုၚ်မွဲတ္ၚဲမ္ဂး ကလိဂွံဓာတ်လလဳ အောန်အိုတ်ပွိုၚ် ၆ နာဍဳ ဂၠိုၚ်အိုတ် ၈ နာဍဳဓဝ်၊ ပ္ဍဲတ္ၚဲလ္ၚဵုတံဂှ်တှ်ေ ဆၜိုတ်ပွိုၚ် ၃ နာဍဳလပါ်ဓဝ်ဟေၚ် ကလိဂွံလဝ်တုဲ ပရေၚ်ပိုန်ဒြပ်မၞိဟ်တံ ဒးဆဵုဂဗမံၚ်ကဵု အခက်အခုဲနာနာသာ်ရ။
အခိၚ်ဓာတ်လလဳပိုတ် လံတိုန်ဂၠိုၚ်အာတုဲ ပတိုန်ဍာ်လေဝ် ဟွံဂတာပ်အခိၚ်တုဲ ဒးရာန်သုၚ်စောဲမံၚ်ဍာ်ရောၚ် အကာဲအရာ ဗီုဗီုတံဏံ ဒးဆဵုဂဗမံၚ် ညးဒေသမွဲတၠ ဟီုရ။
တုဲပၠန် ဟိုတ်နူဓာတ်လလဳပိုတ် ပရေံတိုန်ဂၠိုၚ်တုဲ ပရေၚ်တောမ်ပုၚ်သွတံကီု သွက်ဂွံကၠောန်ကမၠောန်တံကီု စနူကိစ္စတံဏံလေဝ် ဒှ်မံၚ်အခက်အခုဲကီုရ။
အပ္ဍဲဒေသဂှ်တှ်ေ အသိၚ်ပသာန်တ္ၚဲ ကတဴသၠုၚ်တိုန်ဂှ် ဂွံမံၚ် ဓာတ်လလဳ နကဵုသၞောတ်ဂေတ်အလန်ဂှ် ကၠုၚ်မံၚ်ဆၜိုတ်ပွိုၚ် ၂ နာဍဳဓဝ်၊ အကြာၜိုတ် ၆ နာဍဳဂှ် ဇြဟတ်ဓါတ်လလီပိုတ်မံၚ်တုဲ ဟိုတ်နူကဵု အခိၚ်ညးတံမိက်ဂွံကဵုရ ကဵုမံၚ်ဂှ် ပရေၚ်ပိုန်ဒြပ်မၞိဟ်တံ ယုတ်ဒေက်ကၠုၚ်မံၚ် မဒှ်ရ။
ဟိုတ်နူအခိၚ်ကလိဂွံ ဓာတ်လလဳအောန်မံၚ်ဗီုဏံတုဲ သွက်ကမၠောန် အဇာဍောတ် အဇာလဒေါဝ် ဒးသုၚ်စောဲမံၚ်ကဵု ဓာတ်လလဳတံ သၟးဟွံက ရုၚ်စက်ရုၚ်ကမၠောန်တံဂှ်လေဝ် သွက်ဂွံကၠောန်အာ ကမၠောန်ဂှ် ဒှ်ကၠုၚ်မံၚ်အခက်အခုဲနာနာရောၚ် ဂွံတီကေတ်ရ။
အပ္ဍဲတွဵုရးမန်ဂှ်တှ်ေ ပ္ဍဲလက်ထက်အလဵုအသဳ NLD တေံ ဂွံမံၚ်ဓာတ်လလဳ ကြပ်ဇၟာပ်ပ်တ္ၚဲ အခိၚ်လၟေၚ်ဍာံကီုလေဝ် ကြဴနူဒပ်ပၞာန်သီအဝဵုတုဲ ဓာတ်လလဳဂှ် ဂွံၜိုတ်အခိၚ်မွဲဍောတ်ဓဝ် အခိၚ်ဓာတ်လလဳပိုတ်ဂှ်လေဝ် မွဲတ္ၚဲတုဲမွဲတ္ၚဲ ပရေံဂၠိုၚ်ကၠုၚ်မံၚ် ဇၟာပ်ပ်တ္ၚဲ မဒှ်ရ ။
ပရိုၚ် – သြၚ်လောန်တိုၚ်မ်
Photo – Social Media