မတ်မလီု၊ အေဗရာ ၃၀
အပ္ဍဲတွဵုရးမန် ၜိုန်ရအလဵုအသဳတၟိ ပြံၚ်သၠာဲအာကီုလေဝ် ပရေၚ်ဝိုၚ်ဝေၚ်ဇျှၚ်လံၚ်သြန်တံဂှ် ကဵုလဝ်အခေါၚ်ကၠောန် ဗွဲမသၠဲလးဖိုဟ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ပ္ဍဲအခိၚ် ကဵုမာဲပေါဲရုဲမာဲကဝ်မယှေန်ပၞာန် ကေုာံ ပ္ဍဲအခိၚ်ပေါဲသှ်လိက် ဘာပရေၚ်ပညာသ္ဇိုၚ်တံဂှ် ဒေါအ်လဝ် ဝိုၚ်ဝေၚ်တံ မွဲခဏကီုလေဝ် ပ္ဍဲလက်ထက်အလဵုအသဳတၟိလၟုဟ်ဏံဂှ် ကလေၚ်ကဵုမံၚ်အခေါၚ် အတိုၚ် ဗီုကၠာတေံပၠန်ရ။
ဟိုတ်နူဝိုၚ်ဝေၚ်ဇျှၚ်လံၚ်သြန်တံတုဲ ပရေၚ်ကၠတ်ကွဳစက်၊ ပရေၚ်ကၠတ်ဂၠံက်ပၠံၚ်ၜးတံကီု ပရေၚ်သ္ၚိဌာန် ကၟိန်အိန်ထံၚ်တံဟွံမိပ်မြဟ် ကတဵုဒှ်ကၠုၚ်တုဲ ပရေၚ်ပါ်ပါဲ အကြာညးဒေသတံ သၠုၚ်တိုန်မံၚ် ကီုလေဝ် အလဵုအသဳတၟိလၟုဟ်ဂှ် ဟွံစွံအာရီု သ္ပလဝ်မတ်ဇျှဟ်တုဲ ကဵုလဝ်အခေါၚ် ညံၚ်ရဴလုပ်သၞောဝ်မွဲကီု မဒှ်ရ။
ၜိုန်ရအလဵုအသဳတၟိပြံၚ်အာကီုလေဝ် ဝိုၚ်ဝေၚ်ဇျှၚ်လံၚ်သြန်တံဂှ် ဂၠိုၚ်တိုန်နူကဵုအခိၚ်ကၠာတေံဏီတုဲ စနူကဵု သၞာဲဒါနူဌာနနာနာတံ လေဝ် ပါလုပ်ကၠုၚ် အပ္ဍဲဝိုၚ်တံဂှ်ရောၚ် ညးဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လၟုဟ် ဝိုၚ်ဝေၚ်ဇျှၚ်လံၚ်သြန်တံ နွံမံၚ်ဖိုဟ်ရ။ ဝိုၚ်ဗဇဵုစာၚ်လေဝ်နွံ။ သီုဂၠိုၚ်တိုန်ဏီ။ လၟုဟ်ညးမွဲလေဝ် ဟွံသ္ပဂရုပုဟ်။ ပ္ဍဲဝိုၚ်ဗဇဵုစာၚ်ဂှ်လေဝ် ရဲဗၠာဲသၟိၚ်တံပါမံၚ်။ ရဲဗၠာဲသၟိၚ်လေဝ် ဝေၚ်မံၚ်ကီုရ။ ဗီုလဵုဂွံဟီုရော ဝိုၚ်ဝေၚ်ဇျှၚ်လံၚ်သြန်တံလေဝ်နွံ။ လၟုဟ်ပ္ဍဲကာလအပြံၚ်အလှာဲဏံတှ်ေ ပဵုပရေံတိုန်ဏီ။ ညးမွဲလေဝ် ဟွံသ္ပဂရုပုဟ်။ ဗီုဍေံတံမိက်ဂွံကၠောန် ကၠောန်မံၚ်အိုတ်ရ” သာ်ဝွံ သ္ဂးရ။
တုဲပၠန် အလဵုအသဳတၟိလၟုဟ်ဂှ် ဆၜိုတ်မၞိဟ်ဟေၚ်ပြံၚ်အာတုဲ မူဝါဒတံ ပြံၚ်သၠာဲဟၟဲဂှ်ရ ကမၠောန်ဝိုၚ်ဝေၚ်ဇျှၚ်လံၚ်သြန်တံ ဆက်နွံအာမံၚ်တုဲ၊ ညးစၞး မဟီုမံၚ်သွက်ညးဍုၚ်ကွာန်တံဂှ်လေဝ် အရာမထံက်ထ္ၜး ဟီုဂးတံ ဟၟဲပုဟ် ပါ်ပါဲလဝ်ရောၚ်။
အပ္ဍဲဒေသဂှ်တှ်ေ သွက်ပေါဲသဘၚ်ကျာ်၊ သဘၚ်ပေါဲလၟေၚ် ဥတုရာသဳ၊ ပေါဲလံၚ်ဗဗေၚ်ဇၞော်၊ သ္ဘၚ်ကထိုန် ပါဲနူဂှ် ထ္ၜးဟိုတ်နာနာတုဲ ပ္ဍဲပေါဲလှ်ေဒယှ်ေတံဂှ်လေဝ် ကဵုလဝ်အခေါၚ် ဝိုၚ်ဝေၚ်ဇျှၚ်လံၚ်သြန် ဇၞော်ဇၞော်တံ ညံၚ်ရဴလုပ်သၞောဝ်ကီုရောၚ်။
ပြဟ်ဟ်ဏံ ဒှ်မံၚ်အပ္ဍဲအခိၚ်ဘာကၟာတ်တုဲ စနူကောန်ၚာ်အာယုက် ဟွံပေၚ်တံလေဝ် ဟိုတ်နူဝိုၚ်ဝေၚ်ဇျှၚ်လံၚ်သြန်တံဂှ် ဒဂေတ်ပဋိပတ် လီုလာ်အာမာန်ရောၚ် ညးဒေသတံ စိုတ်ဒှ်မံၚ်ဒဝိၚ်ကီုလေဝ် အလဵုအသဳတၟိဂှ်တှ်ေ ဟွံစွံလဝ်အာရီု မဒှ်ရ။
အပ္ဍဲတွဵုရးမန်တှ်ေ လက်ထက်အလဵုအသဳအဆက်ဆက် အခိၚ်ကၠာတေံ ဝိုၚ်ဝေၚ်ဇျှၚ်လံၚ်သြန်တံ ညံၚ်ရဴလုပ်သၞောဝ် ဟၟဲကၠုၚ်ကီုလေဝ် ကြဴနူ ဒပ်ပၞာန်သီအဝဵုတုဲ စနူအပ္ဍဲလက်ထက် သ္ကိုပ်ဝန်ဇၞော်ဒပ်ပၞာန် ခါန်ကၞက်လဝ်တံဏံဂှ်တှ်ေ ကဵုလဝ်အခေါၚ်ဝိုၚ်ဝေၚ်ဇျှၚ်လံၚ်သြန်တံ ဇၞော်ဇၞော်လှဲလှဲလးလး ညံၚ်ရဴလုပ်သၞောဝ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ