ဗြဝတဳ၊ ဂျူလာၚ် ၂
အပ္ဍဲတွဵုရးကရေၚ် ဒေသဖလူ လပါ်သၟဝ်ကျာဍုၚ်ဗြဝတဳ ပယျဵုသေံ-ဗၟာဂှ် ဒပ်ပၞာန်သီအဝဵု ထပက်မံၚ်ကရောၚ်ပၞာန် တုဲ ပေါဲဗတိုက်ၜါလပါ်က္တဵုဒှ်မံၚ် ကြပ်ပေၚ်အာပွိုၚ်မွဲတ္ၚဲရောၚ် ရိုဟ်ကၞက်ပရိုၚ်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူခိၚ်နူအဂယး ဂျူလာၚ် ၁ တေံရ ဒပ်ပၞာန်သီအဝဵု ပန်မံၚ်လွဟ်ဇၞော် ဇရေၚ်ဒေသ မေန်လက်ပါန်ကဵုဖလူတံတုဲ ကရောၚ်ပၞာန် ထပက်လုပ်ကၠုၚ်မံၚ်ဂှ်ရ ပေါဲဗတိုက်ၜါလပါ် က္တဵုဒှ်မံၚ်ဇၞော်ကဵုဇြဟတ်ရောၚ်။
အကြာပေါဲဗတိုက်ၜါလပါ် မကမ်လွဟ်လ္ၚဵုတံ ဒတုန်ပြဟ်စှ်ေအာလပါ်ဍုၚ်သေံကီုတုဲ ဒးအာလဝ်ဒၞာဲ စမြိုၚ်သ္ၚိဌာန်ကဵုကွဳစက်လ္ၚဵုတံနွံမံၚ်ရောၚ်ဂှ် ပရိုၚ်သေံတံ ချူထမံက်လဝ်ရ။
ဒပ်ပၞာန်သီအဝဵု သွက်ဂွံသီကေတ်တိဍာ်ဒေသဖလူကဵု မေန်လက်ပါန် မာန်ဂှ် ကၠောန်ကၠုၚ်လဝ်ပရေၚ်ထပက်ပၞာန် ပွိုၚ် ၉ ဂိတုတုဲကီုလေဝ် စဵုကဵုအခိၚ်လၟုဟ်ဏံ ကလေၚ်သီကေတ် ဟွံမာန်ဏီပုဟ်။
မွဲလပါ်ပၠန် ဒပ်ပၞာန်သီအဝဵု သွက်ဂွံသီကေတ်တိဍာ်အပ္ဍဲၜါဒၞာဲဏံဂှ် စနူဂိတုဂျောန်အိုတ် တုဲကၠုၚ်ဏံဂှ် နူကဵုတွဵုရးမန်မွဲကဆံၚ် ထပ်ပလံၚ်ဗ္စိုပ်နၚ်လဝ် ဇြဟတ်ပၞာန် လပါ်တွဵုရးကရေၚ် မဒှ်ရ။
အပ္ဍဲပေါဲဗတိုက် သွက်ဂွံကလေၚ်သီကေတ် ဒေသဖလူကဵု မေန်လက်ပါန်မာန်ဂှ် ဂကောံရပ်လွဟ်ကရေၚ် ဒပ်မၚ်ပယျဵုကရေၚ် BGF၊ ဒပ်ပၞာန်ကောန်ဂကူကရေၚ် ဗုဒ္ဓဘာသာတောတက် DKBA ဒပ်ဗိုလ်ဗိတံလေဝ် ပံၚ်တောဲပါလုပ်တုဲ ဗတိုက်ကဵုမံၚ်ရောၚ် ပရိုၚ်မံက်မံၚ်ရောၚ်။
ပရိုၚ် – သြၚ်လောန်တိုၚ်မ်
Photo – CJ