သဓီု၊ ဂျူလာၚ် ၂
အပ္ဍဲတွဵုရးမန် မ္ၚးလ္တူဍုၚ်သဓီု နူကဵုကွာန်ဝင်စိၚ် ဒပ်ပၞာန်သီအဝဵုရပ်ဏာလဝ် ညးဒေသ ၉ တၠတံဂှ် ဒးဒုၚ်ၜုၚ်တက်ပျဲပျာံမံၚ် အပ္ဍဲဗ္ဒိုပ်စၟဳစၟတ်သၟာန်သၟုက် (စစ်ကြောရေး) ရဂှ် ညးမံၚ်ကြပ်ကဵုဒပ်ပၞာန်တံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
အပ္ဍဲဂိတုဂျောန် ၂၃ တုဲကၠုၚ်တေံ အပ္ဍဲကွာန်ဝင်စိၚ် နူကဵုဒပ်ပၞာန်သီအဝဵု ဇြဟတ်ပၞာန်ၜိုတ် ၁၀၀ တံ ဍိုက်ကဵုဇြဟတ် လုပ်သလိပ်ဗက်ဂၠာဲလဝ်ဂှ် ဆေၚ်စပ်မံၚ်ကဵု PDF တံ စောဲစပ်တုဲရပ်ကၠေၚ်ဏာလဝ် ညးဒေသ ၉ တၠတံရ။
ညးဒေသဒးဒုၚ်ရပ်ဏာတံဂှ်တှ်ေ ကောန်ကွာန်ဝင်စိၚ် သဝ်ဆထူ အာယုက် ၂၅ သၞာံ၊ ကျဝ်ဇြေန်အံၚ်၊ သဝ်မျေအ်အေ၊ သဝ်တာန်ဇြဝ် အာယုက် ၄၀၊ သဝ်လေန်နိုၚ်၊ သဝ်လှတိၚ်၊ သဝ်ဖာလာထူ ကေုာံ ညးဗြဴ ၜါတၠတံ မဒှ်ရ။
ရပ်ဂွံလဝ်ညးတံ ၉ တၠတုဲ ၜုၚ်တက်စၟဳစၟတ်ပျဲပျာံမံၚ် အပ္ဍဲဗ္ဒိုပ်စၟဳစၟတ်သၟာန်သၟုက် ဘာတန်ဗတောန်ကွတ်ပၞာန်သ္ဇိုၚ် စၟတ် ၉ ဍုၚ်သဓီုတုဲ စဵုကဵုစိုပ်ဂျူလာၚ် ၁ ဂှ် ဟွံကလေၚ်ဗလးကဵုဏီကီု သီုကဵုဟွံကဵုအခေါၚ်ဆဵုဂဗကဵု ကောန်ဇာတ်မိမ သ္ၚိကၟိန်ညးတံပုဟ် သ္ဂးရ။
အဟိန်ဒပ်ပၞာန်သီအဝဵု ပန်ကဵုသေနာတ်တုဲ လုပ်သလိပ်လဝ်ကွာန်ဝင်စိၚ်ဂှ်တှ်ေ နူကဵုသ္ၚိဌာန်ကောန်ဍုၚ်ကွာန်တံဂှ် ပၠံၚ်ကေတ်ဏာလဝ် ကွဳစက်၊ ထဝ်၊ သြန်ကဵု ကပေါတ်ၚုဟ်မး နွံနွံဗွဲမဂၠိုၚ်တံနွံရောၚ် ညးဒေသတံဟီုတုဲ ဂွံတီရ။
ပရေၚ်လုပ်သလိပ်ပန်လဝ်ဏံဂှ်တှ်ေ အပ္ဍဲပွိုၚ်ဍုၚ်ပံၚ် ကွာန်ခလံက်ဟပြု ဂှ်လေဝ် အဟိန်ဂကောံပၠန်ဂတးမွဲက္ဍိုပ် လုပ်ရပ်ကော်ဏာလဝ် က္ဍိုပ်သ္ကိုပ်ဒပ်မၚ်ကွာန် ဥူဖိုဲချေတ် ပ္ဍဲဂိတုမေ ၂၈ ဂှ် ရဲချဳဒရာၚ်လဝ်ပရေၚ်တံဏံ ဖျေံလဝ်ဗ္ဒိုပ် အပ္ဍဲကွာန်ဝင်စိၚ်ရောၚ် ဟိုတ်နူပရိုၚ်မံက်တုဲ ပရေၚ်ဏံဒှ်ကၠုၚ်လဝ်ရောၚ် ညးဒေသတံ ဟီုရ။
ဟိုတ်နူဒပ်ပၞာန် ဍိုက်လဝ်ကဵုဇြဟတ်ပေၚ်ၚ်တုဲ လုပ်ပန်သလိပ်လဝ် ကွာန်ဝင်စိၚ်ဂှ်ရ ကောန်ကွာန်လ္ၚဵုတံ ဒးဂြိပ်ပါဲမံၚ်ကီု၊ ဟိုတ်နူပရိုၚ်ထပ်မံက်မံၚ် နူကဵုဒပ်ပၞာန် သွက်ဂွံထပ်ကလေၚ်လုပ်သလိပ် အလန်ဒုတိယပၠန် နွံမံၚ်ဂှ်တုဲ ရဲဟွံဂံၚ်ကလေၚ်စဴသ္ၚိဌာန်တံလေဝ် နွံဂၠိုၚ်မံၚ်ကီုရ။
ပရိုၚ် – သြၚ်လောန်တိုၚ်မ်
Photo – CJ