မတ်မလီု၊ ဂျူလာၚ် ၂
တရဴကွဳပၟတ်မၞိဟ်အသိၚ်မြက် သီုကဵုစက်ဟဂံက်ကျာ DEMU ခေတ်တၟိ အာကလေၚ် မတ်မလီု- လ္ဂုၚ် ပွိုၚ်မွဲတ္ၚဲဓဝ်ဂှ် စနူဂိတု ဂျူလာၚ် ၁ ဏံဂှ် စဂြိပ်မံၚ်ယျ ဂွံတီကေတ် နူကဵုဌာနကွဳပၟတ်ဗၟာ သၟဝ်အလဵုအသဳ ဒပ်ပၞာန်ရ။
လၟေၚ်တရဴကွဳပၟတ် ကွဳပၟတ်မၞိဟ်အသိၚ်မြက် DEMU စၟတ် ၈၃ လပါ်တိုန် လ္ဂုၚ်-မတ်မလီု၊ စၟတ် ၈၄ လပါ်စှ်ေ မတ်မလီု-လ္ဂုၚ် ဂှ် အပ္ဍဲဂျူလာၚ် ၁ ဏံ စဂြိပ်လဝ်တုဲ အခန်ကၞာပံက်ဂၠံၚ်ကွဳပၟတ် DEMU တံ ကၠောန်ဗဒှ်လဝ် ပ္ဍဲလ္ဂုၚ်ကဵုမတ်မလီုတံရ။
လၟေၚ်တရဴကွဳပၟတ် စၟတ် ၈၃ လပါ်တိုန်ဂှ် စတိတ်နူလ္ဂုၚ် အခိၚ်ဂယး ၅ နာဍဳ စိုပ်မတ်မလီု ၁၁ နာဍဳတုဲ၊ လၟေၚ်တရဴ စၟတ် ၈၄ လပါ်စှ်ေဂှ် အခိၚ်အဒေါဝ်တ္ၚဲ ၁၂ နာဍဳ စတိတ်နူမတ်မလီုတုဲ သဝ်တ္ၚဲ ၆ နာဍဳဂှ် စိုပ်လ္ဂုၚ်မဒှ်ရ။
တောဲကွဳပၟတ်စက်ဟဂံက်ကျာ DEMU ခေတ်တၟိ လၟေၚ် ၈၃ လပါ်တိုန်၊ လၟေၚ် ၈၄ လပါ်စှ်ေတံဂှ် တောဲအဆံၚ်သၠုၚ် ၂ တောဲ၊ တောဲတန်အဆံၚ်ပထမ ၄ တောဲပါမံၚ်တုဲ အပ္ဍဲတောဲအဆံၚ်သၠုၚ်ဂှ် ၇၂ တၠ အပ္ဍဲတောဲတန်အဆံၚ်ပထမဂှ် ၂၄၀ တၠ အပံၚ်သီုဖအိုတ် ၃၁၂ တၠ ဍိုက်ဗက်အာမာန်ရ။
အာတရဴ စနူတမ် စိုပ်ကၞောတ် စရိတ်ၚုဟ်မးစၟတ်တဲ သွက်တောဲအဆံၚ်သၠုၚ်ဂှ် ၂၂၀၀၀ ဒကေဝ် ကေုာံ သွက်တောဲ အဆံၚ်တန်ပထမဂှ် ၁၆၀၀၀ ဒကေဝ်နွံတုဲ လၟေၚ်မွဲဒမြိပ်တရဴဂှ် ဒေါအ်ကဵု ဒၞာဲသၞေဟ်ကွဳပၟတ် တိုဝ်ကျံၚ်ကလေဝ်၊ ဗဂေါ၊ တိၚ်ဇယာတ် ကျာ်ထဝ်၊ သဓီု ကေုာံ ဍုၚ်ပံၚ်ရောၚ်။
သွက်လၟေၚ်တရဴကွဳပၟတ်မၞိဟ်အသိၚ်မြက် DEMU ခေတ်တၟိ လၟေၚ် ၈၃ လပါ်တိုန်၊ လၟေၚ် ၈၄ လပါ်စှ်ေတံဂှ် ဗကန်ရာန်ကေတ်စၟတ်တဲ နကဵုသၞောတ် Online Railways Tacketing and Payment System (ORTP) မာန်တုဲ သွက်တရဴ စနူတမ် စိုပ်ကၞောတ်ဂှ် ဒစးဒုၚ်ရာန်ကေတ်လဝ်ပွိုၚ် ၇ တ္ၚဲမာန်တုဲ သွက်သၞေဟ်ကွဳပၟတ် အကြာတံဂှ် ဒစးဒုၚ်ဒးရာန်ကေတ်လဝ်ပွိုၚ် ၅ တ္ၚဲရောၚ် လဴစလဝ် ကီုရ။
ပရိုၚ် – သြၚ်လောန်တိုၚ်မ်
Photo – Social Media