ကျာ်ထဝ်၊ ဂျူလာၚ် ၄
အပ္ဍဲတွဵုရးမန် ပွိုၚ်ဍုၚ်ကျာ်ထဝ် ကွာန်ဇြဳကုန် ၜိုန်ရပေါဲဗတိုက်ဟၟဲကီုလေဝ် ဒပ်ပၞာန်သီအဝဵုကြဳဖျေံလဝ်ဗုမ် နူဗလးကျာဂှ် ရိုဟ်ကၞက်ပရိုၚ်တိဍာ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျူလာၚ် ၃ အခိၚ်လဒေါဝ်တ္ၚဲၜိုတ် ၁၂ နာဍဳ ၜၚ်ကျာဂျက်ဖိုက်တာဒပ်ပၞာန်ဗၟာမွဲမ လ္တူဗလးကျာ ကွာန်ဇြဳကုန်ဂှ်ကြဳဖျေံဏာဗုမ် ၂ မ ရ။
အပ္ဍဲပရေၚ်ကြဳဗုမ်ဏံညးဍုၚ်ကွာန်တံကီု သ္ၚိဌာန်လ္ၚဵုတံလီုလာ်အာလဝ်နွံမံၚ်တုဲ လၟိဟ်ဂွံတီချိုတ်တ်ပၠိုတ်တ်ဂှ် နူကဵုဌာန်ပရိုၚ်သြၚ်လောန်တိုၚ်မ် ဆက်ဂၠိုက်ဂၠာဲမံၚ်ဖိုဟ်ရ။
မွဲအခိၚ်ဓဝ် နူကဵုဌာန်ဂအုပ်ၝောံဒပ် ၄၄ ဖျေံသ္ဇိုၚ်ဍုၚ်ကျာ်ထဝ် ပန်ဏာလွဟ်ဇၞော်လပါ်ကွာန်ဇြဳကုန် ဟွံအောန်နူကဵု ၂ မနွံမံၚ်ရောၚ် ရိုဟ်ကၞက်ပရိုၚ်ညးဒေသတံ ဟီုလဴတုဲဂွံတီရ။
ကွာန်ဇြဳကုန် ဒးဒုၚ်ဗတိုက်လဝ်ပၞာန်ကျာကဵု လွဟ်ဇၞော်တံဂှ်ပါလုပ်မံၚ် ပ္ဍဲတိဍာ်ပရေၚ်အုပ်ဓုပ်ခရိုၚ်သဓီု မဟာဒပ် ၁ ဗော်သွးကောန်ဂကူကရေၚ် KNU တုဲ စပ်ကဵုပရူဏံဂှ် နူကဵုဌာန်ပရိုၚ်သြၚ်လောန်တိုၚ်မ်သၟာန်သၟုက်လဝ် ညးတာလျိုၚ် ခရိုၚ်သဓီု KNU တံရ။
ဂိတုဂျောန်တုဲကၠုၚ်ဏံလေဝ် ပ္ဍဲပွိုၚ်ဍုၚ်ကျာ်ထဝ် ဒပ်ပၞာန်သီအဝဵု ကၠောန်လဝ်ပရေၚ်ပရေၚ်ဗတိုက်ပၞာန်ကျာ ဟွံအောန်နူကဵု ၄ ဝါနွံကီု အပ္ဍဲပရေၚ်ဗတိုက်တံဏံမ္ဂး မၞိဟ် ၆ တၠ ချိုတ်အာတုဲ ၁၀ တၠပြၚ် ဒးလဝ်ဝပ်နွံရ။
ပရိုၚ် – သြၚ်လောန်တိုၚ်မ်
Photo – Social Media