မတ်မလီု၊ ဂျူလာၚ် ၄
သွက်ကောန်သ္ဂံၚ်ဒပ်ပၠန်ဂတးတံ ဂွံလုပ်ဖျေံလွဟ်မာန်ဂှ် နူကဵုကမ္မတဳပရေၚ်ကေၚ်ကာကောန်ဍုၚ်အရၚ်တံ ဒးကော်ဘိက်အာဗွဲမဇြိုဟ်နက်ရောၚ် ဥက္ကဌစၠတ်ထဝ်တွဵုရးမန် ဥူတိတ်ထိုဲ နူအလဵုအသဳဒပ်ပၞာန်ဂှ် ဟီုရ။
ပ္ဍဲဂိတုဂျူလာၚ် ၂ ကၠောန်လဝ် ကောံဓရီုကမ္မတဳပရေၚ်ကေၚ်ကာကောန်ဍုၚ်အရၚ် ပ္ဍဲကဵုစၠတ်ထဝ်တွဵုရးမန်ဂှ် ဥူတိတ်ထိုဲ ဗတိုက်ဖအောဝ်ကဵုလဝ်စၞောန်ပ္ညုၚ်ရောၚ်။
ဒၟာနူဟိုတ်နာနာသာ် ဒးဒုၚ်စန်ဒက်ဏာတုဲ သွက်ရဲစိုပ်မံၚ်ဂၠံၚ်ဍာန်ဗၠေတ်တ်တံ ယဝ်ရမိက်ဂွံကလေၚ်စဴ သ္ၚိဌာန်ဒၞာဲဝါဲမိမတံမ္ဂး သွက်ဂွံလုပ်ဖျေံလွဟ်ဂွံဆက်စၠောံအာလောဲလောဲမာန်ဂှ် နူကဵုကမ္မတဳတံစွံအာရီုတုဲ ကော်ဘိက်အာညိဂှ် ဥူတိတ်ထိုဲ ဗတိုက်ဖအောဝ်လဝ်အပ္ဍဲကောံဓရီုရ ။
တုဲပၠန် နူကဵုကမ္မတဳ ပရေၚ်ကေၚ်ကာကောန်ဍုၚ်အရၚ်တံ သွက်ဂွံရေၚ်တၠုၚ် လၟေၚ်ကမၠောန်ပရေၚ်ၜိုဟ်လလမ်တံမ္ဂး ပုဂ္ဂိုလ်နွံကဵုပရေၚ်ဆဵုဂဗကမၠောန် ပံၚ်တောဲရေၚ်တၠုၚ်အာမာန်တံဂှ် ညံၚ်ဂွံထပ်ဗပေၚ်စုတ်အပ္ဍဲဂကောံကမ္မတဳတံဂှ် ဟီုလဝ်ကီုရောၚ်။
ပ္ဍဲကဵုပေါဲရုဲမာဲ ဒပ်ပၞာန်က္ဍိုက်ပ်ကၠောန်လဝ်ဂှ် နကဵုကောန်ဗော်ပျဳခိုင်ဖျိုဝ်မွဲ လုပ်ပြိုၚ်ပကာန်လဝ် နဒဒှ်ညးစၞး စၠတ်ထဝ်တွဵုရး ပွိုၚ်ဍုၚ်မတ်မလီုဂှ် ဇၞးအာမာဲတုဲ ဥူတိတ်ထိုဲ ဒှ်ကၠုၚ်လဝ် ဥက္ကဌစၠတ်ထဝ်တွဵုရးမန်ရ။
လတူပရေၚ်ဒပ်ပၞာန် ကော်ဘိက်မံၚ်ပရေၚ်ၜိုဟ်လလမ်ဂှ် ဂလာန်ပတှ်ေလေဝ်ဟၟဲတုဲ ပရေၚ်ကော်ဘိက် သွက်ဂွံလုပ်ဖျေံလွဟ်ဏံဂှ် ဒှ်မံၚ်အရေဝ်ဟရာၚ်မွဲရောၚ် ကောန်ပၞာန်ဒပ်ပၠန်ဂတးတံ ကလေၚ်ဟီုနၚ်လဝ်ရ။
အပ္ဍဲတွဵုရးမန်ဂှ် ကောန်ပၞာန်သ္ဂံၚ်ဒပ်ပၠန်ဂတးတံ လုပ်ဖျေံမံၚ်လွဟ်မွဲဏှမွဲဏှနွံမံၚ်ရောၚ်ဂှ်လေဝ် ဒပ်ပၞာန်သီအဝဵုတံ ချူတြးမံၚ်ဝါဒတံ နွံရ။
ပရိုၚ် – သြၚ်လောန်တိုၚ်မ်
Photo – MOI