ဗြဝတဳ၊ ဂျူလာၚ် ၄
အပ္ဍဲဒေသပယျဵုဗၟာ-သေံ တွဵုရးကရေၚ် ပွိုၚ်ဍုၚ်ဗြဝတဳ ဒၞာဲတိဍာ်မေန်လက်ပါန်ကဵု ဖလူတံဂှ် ဟိုတ်နူပေါဲဗတိုက်ဒှ်မံၚ်တုဲ အပ္ဍဲလပါ်ဒေသပယျဵုတံဏံ ဒပ်ပၞာန်သေံတံသၠုၚ်ပတိုန်ပရေၚ်ဂီုကၠီုတုဲ ကၟာတ်လဝ် ဂိက်သၞေဟ်ကၚ်ပယျဵုလ္ၚဵုတံယျဂှ် နူကဵုရိုဟ်ကၞက်ပရိုၚ်ဒေသပယျဵုတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကွာန်မေန်လက်ပါန်- ကွာန်ဖလူ နွံမံၚ်လပါ်သၠုၚ်ကျာဍုၚ်ဗြဝတဳတံဂှ် အကြာကရောၚ်ပၞာန်ဒပ်ပၞာန်ဗၟာကဵု ဂကောံဇြဟတ်ပၠန်ဂတးတံ ဂိတုဂျောန်အိုတ်တုဲကၠုၚ်ဏံ ပေါဲဗတိုက်ကလေၚ်ဒှ်ကၠုၚ်မံၚ်မွဲဏှမွဲဏှတုဲ ဟိုတ်နူပေါဲဗတိုက်မကမ်လ္ၚဵုတံ ပရာတ်စိုပ်အာလပါ်ဍုၚ်သေံ ကွာန်မေအ်ကိုကေန်တုဲ ဒးအာလဝ် ဘာဗတောန်လိက်ကဵု သ္ၚိဌာန်တံနွံရ။
ဟိုတ်နူမကမ်လွဟ် နူလပါ်ဗၟာစှ်ေဒးအာလပါ်ကွာန်မေအ်ကိုကေန်ဍုၚ်သေံ၊ ဒးအာလဝ်ဘာဗတောန်လိက်ကဵု သ္ၚိဌာန်လ္ၚဵုတံတုဲဘာသေံကီု ဘာဗတောန်လိက် ရဲဆုဲပြံၚ်ကောန်ဍုၚ်ဗၟာလ္ၚဵုတံလေဝ် ဒးကၟာတ်လဝ် ဗွဲယာယဳမွဲခဏကီုရ။
မကမ်လွဟ်နူကဵုပေါဲဗတိုက်ဏံ စိုပ်အာမံၚ်လပါ်ကွာန် မေအ်ကိုကေန်ဍုၚ်သေံ မွဲဏှမွဲဏှကီု ဒၞာဲဒၟံၚ်စမြိုၚ်သ္ၚိဌာန်တံလေဝ် ဒးလဝ်ဘဲကဝေက်မကမ်တံနွံတုဲ ကောန်ကွာန်မေအ်ကိုကေန်တံ အာဆဵုဂဗတေၚ်စပ်လဝ် ကုညးတာလျိုၚ်ဒပ်ပၞာန်သေံတံကဵု ညးတာလျိုၚ်ပရေၚ်အုပ်ဓုပ်တံကီုရ။
တုဲပၠန် စနူဂိတုဂျူလာၚ် ၃ ဏံ ဒပ်ပၞာန်သေံတံကၟာတ်ထောံ ဂိက်ပယျဵုလ္ၚဵုတံတုဲ ထပ်သၠုၚ်ပတိုန်လဝ် ဇြဟတ်ပရေၚ်ဂီုကၠီုနွံမံၚ်ရောၚ် လိက်ပရိုၚ်သေံတံချူထမံက်လဝ်ရ။
ကၟာတ်ထောံ ဂိက်သၞေဟ်ကၚ်ပယျဵု ၃ ဒၞာဲ နွံမွဲဒကဲကြုၚ်သံၚ်ရေၚ်တုဲ နူကဵုဂိက်ပယျဵုတံဏံမွဲကဆံၚ် စၞစဇွောံမကဵု ကပေါတ်ဗၞိက်တံဂှ် ဟွံကဵုအခေါၚ်တတ်ကၠောံရောၚ် ဂွံတီကေတ်ရ။
အပ္ဍဲကဵုပေါဲဗတိုက် လပါ်သၠုၚ်ကျာဗြဝတဳ ဆက်ဇက်တိုန်အာဂတဟွံမာန်ဏီတုဲ ဒပ်ပၞာန်သီအဝဵုတံ ထပ်ဗပေၚ်စုတ်မံၚ်ဇြဟတ်ကီု ကရောၚ်ပၞာန်ဒပ်ပၞာန်တံဗၟာထပက်ကၠုၚ်မ္ဂး သွက်ဂွံဒုၚ်ဒဝ်ဗတိုက်အာဂှ် နူလပါ်ဂကောံဇြဟတ်ပၠန်ဂတးတံလေဝ် ထပ်ဗပေၚ်လဝ်ဇြဟတ်တုဲ ပလေဝ်စမံၚ်ရောၚ် ဂွံတီရ။
အပ္ဍဲပေါဲဗတိုက်ကွာန်မေန်လက်ပါန်ကဵု ကွာန်ဖလူတံဂှ် ဒပ်ပၞာန်သီအဝဵုတံထဍာၚ်ပန်မံၚ်ကဵုလွဟ်ဇၞော်တုဲ နူကဵုၜၚ်ကျာလေဝ်ကြဳဖျေံမံၚ်ဗုမ် ဇၟာပ်ပ်တ္ၚဲနွံရောၚ် ညးဒေသတံလဴတုဲ ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media