နေပျဳဒဝ်၊ ဂျူလာၚ် ၄
အကြာတိဍာ် ပရေၚ်အုပ်ဓုပ်ဗော်ဍုၚ်မန်တၟိ ဒးဒုၚ်ကြဳဗုမ်ဗလးကျာ ဟွံအောန်နူကဵု ၃ ဝါတုဲ ကြဴနူဂှ် သွက်ပရေၚ်ဒေသဂွံညိၚ်ဝပ် ပံၚ်တောဲကၠောန်အာမွဲစွံညိဂှ် ကမ္မတဳပ္ညဳပ္ညပ်ထမံက်ရုပ်ရဴပရေၚ်ဖောအ်ဗြဳၜိုဟ်လလမ် NSPNC အလဵုအသဳဒပ်ပၞာန် ကဵုကၠုၚ်ဇြဟတ်ဟရိုဟ်ရ။
ကမ္မတဳပ္ညဳပ္ညပ်ထမံက်ရုပ်ရဴ ညဳသၟဟ်ဂကူပရေၚ်ၜိုဟ်လလမ်ကေုာံ ဗော်ဍုၚ်မန်တၟိ NMSP တံ ဆဵုဂဗသဳကၠဳလဝ် ပ္ဍဲဟဝ်တေဝ် M Gallery နေပျဳဒဝ် ဂိတုဂျူလာၚ် ၂ ဏံဂှ် ဥက္ကဌ NSPNC ဒုသ္ကိုပ်ပၞာန်ဇၞော် ယာပျေအ် ဟီုလဝ်ရောၚ်။
အပ္ဍဲပေါဲဆဵုဂဗသဳကၠဳဏံ နူလပါ် NSPNC ဂှ် ဥက္ကဌ၊ ညးအုပ်ကာကေုာံ ဂကောံကမ္မတဳပ္ညဳပ္ညပ်တံပါလုပ်တုဲ နူလပါ်ဗော်ဍုၚ်မန်တၟိဂှ် ဒုဥက္ကဌ နာဲအံၚ်မေန်၊ ကမ္မတဳရေၚ်တၠုၚ်ကေၚ်ကာဗဟဵု နာဲအံၚ်မ္ၚဵု ကေုာံ ညးစၞးတၞဟ်ဟ်တံလေဝ်တိုန်စိုပ်လဝ်ရောၚ် အလဵုအသဳပၞာန် လလောၚ်တြးပတိတ်လဝ်ပရိုၚ်ရ။
အတိုၚ်ကော်ဘိက်လဝ် ပရေၚ်ၜိုဟ်လလမ် ကြဴနူအလဵုအသဳတၟိ တိုန်ကၠုၚ်ဂှ် ပေါဲသဳကၠဳဏံကၠောန်ဗ္ဒျ်မာန်အာတုဲ၊ စနူကာလသၞာံ ၂၀၂၁ တေံ အပ္ဍဲကဵုတွဵုရးဗွဲမဂၠိုၚ် ၜိုန်ရပဋိပက္ခပၞာန်တံက္တဵုဒှ်ကၠုၚ်လဝ်ကီုလေဝ် တွဵုရးမန်မွဲဂှ် ညိၚ်ဝပ်ကၠုၚ်မံၚ်ရောၚ်ဂှ် ဒုသ္ကိုပ်ပၞာန်ဇၞော် ယာပျေအ် သ္ဂးရ။
စပ်ကဵုပရေၚ်ဇၞော်မောဝ်တောတက်ဖောအ်ဗြဳဒေသတံတုဲ တင်နွံပၟိက်မံၚ်ကဵုပရေၚ်ပညာ၊ ပရေၚ်ထတ်ယုက်တံဂှ် ပတိုန်ထ္ၜးအာဌာနဆေၚ်စပ်နာနာတံ ပ္ညဳပ္ညပ်ရေၚ်တၠုၚ်တုဲ သွက်ပရေၚ်ဒေသဂွံညိၚ်ဝပ်ၜိုဟ်လလမ်ဂှ် နွံမံၚ်ပၟိက်ကဵု ပရေၚ်ဒးပံၚ်တောဲ ရေၚ်တၠုၚ်ညးသ္ကံမွဲစွံရောၚ် သာ်ဝွံ ညးဟီုလဝ်ကီုရ။
ပ္ဍဲအရာဒက်ပ္တန်ပရေၚ်ၜိုဟ်လလမ်မ္ဂး နကဵု NSPNC ပရေၚ်စေတနာ ဍာံဍာံ၊ ဆန္ဒပရေၚ်ဍုၚ်ကွာန်နွံနွံ နကဵုဓဝ်လအေၚ်တံနွံမှ ဒက်ပ္တန်အာမာန်တုဲ သ္အာၚ်နူဂှ်ပၠန် ပရေၚ်ပၞာန်၊ ပရေၚ်ဍုၚ်ကွာန် သီုကဵုပရေၚ်ပညာ၊ ပရေၚ်ထတ်ယုက်၊ ပရေၚ်ဇၞော်မောဝ်ဒေသ၊ ပရေၚ်ပိုန်ဒြပ်တံဂှ် ညံၚ်ဂွံဖန်ဖက်ကဵုအာအခေါၚ် ပရေၚ်ယှအ်ဖျေံ စေဝ်ပၞောန်တံညိဂှ် ဒုဥက္ကဌဗော်ဍုၚ်မန်တၟိ နာဲအံၚ်မေန် ဟီုရ။
ပြသၞာပရေၚ်ဍုၚ်ကွာန်တံဂှ် ညံၚ်ဂွံသောၚ်ကလး နကဵုနဲကဲပရေၚ်ဍုၚ်ကွာန်၊ သွက်ဂွံထမံက်ရုပ်ရဴလၟေၚ်ကမၠောန် ပရေၚ်ၜိုဟ်လလမ်ပေါဲသဳကၠဳဗၠးၜး ဟၟဲကဵုတၚ်စၟတ်ဒစးဒုၚ်ပိုၚ်ခြာလဝ်တံတုဲ ညံၚ်ဂွံကၠောန်ဗဒှ်အာဂှ်လေဝ် သဳကၠဳလဝ်ရ။
တုဲပၠန် သွက်ဂွံစသိုၚ်အာ ဂုဏ်ဖဵုပရေၚ်ဒေါအ်ပန်ပှော်တံကီု နူကဵုပရေၚ်ဆဵုဂဗဗွဲအပြောံတံဂှ် ညံၚ်ဂွံဒှ် ပေါဲသဳကၠဳပရေၚ်ၜိုဟ်လလမ် ကြက်ရှ်သာနွံနွံကီု သီုညးဖအိုတ်ညံၚ်ဂွံပါလုပ်မာန်ဂှ် နကဵုစိုတ်အးအးဂလာန်ပတှ်ေ ဂတးဂတန်နွံနွံ အဆက်ညံၚ်ဟွံပိုတ်သွက်ဂွံကၠောန်အာအဆက်က်မာန် နာဲအံၚ်မေန် ပတိုန်ထ္ၜးလဝ်ဂှ် ပ္ဍဲကဵုလိက်လလောၚ်တြး အလဵုအသဳပၞာန် ချူထမံက်လဝ်ရ။
မွဲလပါ်ပၠန် ပ္ဍဲဂိတုမေအိုတ် ဂိတုဂျောန်တုဲကၠုၚ်တေံ အပ္ဍဲဒေသပရေၚ်အုပ်ဓုပ်ဗော်ဍုၚ်မန်တၟိ ကၞောတ်ၜဳရေဝ်ဂှ် နူကဵုဒပ်ပၞာန်ကြဳဖျေံဗုမ် ဗတိုက်လဝ်ကဵုၜၚ်ကျာကီု စပ်ကဵုပရေၚ်ကိစ္စဏံတုဲ အဟိန်ဆဵုဂဗမံၚ်ကဵု NSPNC ဏံဂှ် နူလပါ်ဗော်သဳကၠဳလဝ် နွံဟာ ဟွံမွဲဟာဂှ် ဟွံဂွံတီလဝ်ပုဟ်။
လတူပရေၚ်ဏံ စပ်ကဵုပရေၚ်ဒေသညိၚ်ဝပ်တံ သွက်ဂွံတီတင်နၚ် ဗော်ပတိုန်ထ္ၜးသဳကၠဳလဝ်ဂှ်တုဲ နူကဵုဌာန်ပရိုၚ် သြၚ်လောန်တိုၚ်မ် ဆက်စၠောံသၟာန်ဏာလဝ် ညးအခေါၚ်ဟီုဂးနွံ ဗော်ဍုၚ်မန်တၟိ နာဲအံၚ်မ္ၚဵုကီုလေဝ် ဒုၚ်ဟီုသှ်ကဵုလဝ် ဟၟဲပုဟ်။
ပရေၚ်ဗော်ဍုၚ်မန်တၟိပတိုန်ထ္ၜးလဝ်တံဂှ် သဳကၠဳသောင်ကလးဏာ ကိစ္စကေၚ်ကာဆေၚ်စပ်ကဵု ပရေၚ်ဖောအ်ဗြဳဇၞော်မောဝ်ဒေသတံကီု အကာဲအရာပရေၚ်ဆဵုဂဗသဳကၠဳ Bilateral အခိၚ်ကၠာတေံကဵု ပရေၚ်ကိစ္စ သွက်ဂွံပံၚ်တောဲရေၚ်တၠုၚ် ပရေၚ်ဒေသဂွံညိၚ်ဝပ်အာဂှ် ညးအုပ်ကာ NSPNC ဒုသ္ကိုပ်ပၞာန်ဇၞော် မေန်နိုၚ် သ္ဂးရ။
ဆဂး စပ်ကဵုပရေၚ်ဒေသဂွံညိၚ်ဝပ်တုဲ ဗီုလဵုပံၚ်တောဲအာရောဟီုဂှ် ပရူပရာလှဲလှဲလးလးတံဂှ် ပ္ဍဲရုပ်ရမျှာၚ်တြးဝါဒ လိက်ပရိုၚ်နိဂီုဍုၚ် အလဵုအသဳပၞာန်ထိၚ်ချုက်လဝ်တံဏံ ချူထမံက်ထ္ၜးလဝ်ဂှ် ဟွံဂွံဆဵုလဝ်ပုဟ်။
စနူသတ္တဟဒုတိယ ဂိတုဂျောန်တုဲကၠုၚ်ဏံ သွက်ဂွံကလေၚ်သီကေတ် ဍုၚ်ကျာ်ပိ ပယျဵုသေံ-ဗၟာဂှ် ဒပ်ပၞာန် နကဵုကရောၚ်ပၞာန် ၃ မုခ် နကဵုဇြဟတ်ၜိုတ် ၁၀၀၀ စကာလဝ်နွံတုဲ သွက်ဂွံတတ်ကၠောံအာ ဒေသပရေၚ်အုပ်ဓုပ် ဗော်ဍုၚ်မန်တၟိတံဂှ် ပ္ညဳပ္ညပ်လဝ်ကီုလေဝ် နူလပါ်ဗော်ဟွံဒုၚ်တဲပုဟ် သာ်ဝွံ ပရိုၚ်တံမံက်ကၠုၚ်မံၚ်ရောၚ်။
အပ္ဍဲပေါဲသဳကၠဳပရေၚ်ၜိုဟ်လလမ်ဏံဂှ် သွက်ပရေၚ်တိဍာ်ဂွံညိၚ်ဝပ်အာကီု၊ ပရေၚ်ပညာ၊ ပရေၚ်ထတ်ယုက်၊ အခေါၚ်ကတ်ဗ္တောန် လိက်ပတ်မန်၊ သွက်ဂွံဂွံ အထံက်ပၚ် ပရေၚ်ထတ်ယုက် ဂဥုဲနာနာတံတုဲ အရာ ဂတးဂတန် ဂွံပံၚ်တောဲရေၚ်တၠုၚ်အာမာန်ဂှ် ညးတိုန်စိုပ်တံသဳကၠဳလဝ်ရ။
တုဲပၠန် ပ္ဍဲကဵုပွိုၚ်ဍုၚ်ရေဝ်၊ ပွိုၚ်ဍုၚ်လှာဒကှ်၊ လပါ်ပလိုတ် ပွိုၚ်ဍုၚ်ကအ်ကြိက် ၊ ကွာန်လပါ်သၟဝ်ကျာဍာ်ဗု ရးတနၚ်္သဳတံဂှ် သွက်ဂွံသ္ပဒတန် ပတိတ်ကဵုလိက်စၟတ်သမ္တီသၠးဂဝ်ဂၞဴတံကီု၊ ကဵုဖျုန်ကဵုပရေၚ်သွက်ဂွံသိုၚ်ခၞံကဵု ဂၠံၚ်၊ ဒဒန်တံလေဝ် ပါလုပ်မံၚ်ကီုရ။
တုဲပၠန် သွက်ဂွံသ္ပစၟတ်သမ္တီ ပရေၚ်ညးၜါလပါ်သဳကၠဳလဝ်တံဂှ်ပ္ညဳပ္ညပ်တုဲ ထ္ပက်စၟတ်တဲသ္ပလဝ်ဒတန်အိုတ်ရဂှ် အလဵုအသဳပၞာန်လလောၚ်တြးပတိတ်လဝ်ပရိုၚ်ကီုလေဝ် လပါ်ဗော်ဍုၚ်မန်တၟိဂှ်တှ်ေ လလောၚ်တြးလဝ်ပရိုၚ် ဟၟဲဏီပုဟ်။
ကမ္မတဳဗဟဵုထမံက်ရုပ်ရဴပရေၚ်ဖောအ်ဗြဳၜိုဟ်လလမ် သမ္မတသီအဝဵု ဥူမေန်အံၚ်လှိုၚ် သ္ကိုပ်သ္ကလဝ်ဂှ် ပဋိပက္ခရပ်လွဟ်တံ သွက်ဂွံအိုတ်အာမာန် ပြသၞာပရေၚ်ဍုၚ်ကွာန်ဂှ် ညံၚ်ဂွံသောၚ်ကလးအာ နကဵုနဲကဲပရေၚ်ဍုၚ်ကွာန်ကီု သွက်ပရေၚ်ဖောအ်ဗြဳကဵု ပရေၚ်ဍုၚ်နိဂီု ဂွံညိၚ်ဝပ်အာမာန်ဂှ် နကဵုဟၟဲကဵုတၚ်ဒစးဒုၚ် စၟတ်ပိုၚ်ခြာလဝ်တုဲ သွက်ဂွံကၠောန်အာ ပေါဲသဳကၠဳပရေၚ်ၜိုဟ်လလမ် မာန်ဂှ် ပ္ဍဲဂိတုအေဗရာ ၂၁ တုဲကၠုၚ်တေံ ကော်ဘိက်လဝ်တုဲ ဒှ်ကၠုၚ်ပရေၚ်ဆဵုဂဗသဳကၠဳ ဗီုဏံရောၚ်။
ပ္ဍဲသတ္တဟဒုတိယ ဂိတုဂျောန်တုဲကၠုၚ်တေံလေဝ် အကြာဂကောံရပ်လွဟ်ကောန်ဍုၚ်အရၚ်မဟာမိတ် ၇ ဂကောံ ထ္ပက်လဝ်လိက်ကသုက်ပရေၚ်ဒေါအ်ပန်ပှော်တံကဵု ဂကောံ NSPNC တံ ဆဵုဂဗသဳကၠဳလဝ်ဗွဲအပြောံနွံတုဲ ညးစၞးဗော်ဍုၚ်မန်တၟိတံလေဝ် တိုန်စိုပ်သဳကၠဳလဝ်ကီုရ။
ပ္ဍဲကာလပရေၚ်သီလဝ်အဝဵုဏံ ပေါဲသဳကၠဳပရေၚ်ၜိုဟ်လလမ် ကံၚ်သဳပၞာန်ကော်ဘိက်လဝ်တံဂှ် နကဵုဗော်ဍုၚ်မန်တၟိလေဝ် တိုန်စိုပ်လဝ်နွံမံၚ်တုဲ ပ္ဍဲကဵုဖေဖဝ်ဝါရဳ သၞာံ ၂၀၂၄ ဂှ် ကောန်ဗော်လ္ၚဵုတံပါ်တိတ်အာ နကဵုယၟု NMSP AD သွက်ဂွံဗတိုက်သရိုဟ်သၞောတ်တၠအဝဵုပၞာန်ဂှ် ပါလုပ်မံၚ်အပ္ဍဲပရေၚ်ပၠန်ဂတးရောၚ်။
ပရိုၚ် – သြၚ်လောန်တိုၚ်မ်
Photo – MOI