ဗီယေန်ကျာန်၊ ဂျူလာၚ် ၅
သမ္မတသီအဝဵု ဥူမေန်အံၚ်လှိုၚ် အာလဝ်တရဴဍုၚ်လဴဂှ် အကြာၜါဍုၚ်တံသဳကၠဳလဝ် သွက်ဂွံသၠုၚ်ပတိုန် ပရေၚ်ပံၚ်တောဲရေၚ်တၠုၚ် ပ္ဍဲကဏ္ဍပရေၚ်စဵုဒၞာကေုာံကဏ္ဍနာနာတံရောၚ် ပ္ဍဲလိက်ပရိုၚ်တြးဝါဒနိဂီုဍုၚ် အလဵုအသဳဒပ်ပၞာန် ထိၚ်ချုက်လဝ်ဂှ် ချူထမံက်လဝ်ရ။
အတိုၚ် သမ္မတဍုၚ်လဴ တောန်လောန်သဳသေတ်လေတ် ကော်ဘိက်လဝ် ဥူမေန်အံၚ်လှိုၚ် အာစိုပ်လဝ်တုဲ အဟိန်ဆဵုဂဗလဝ်ကဵု သ္ကိုပ်ဝန်ဇၞော် သောန်သာဲသဳဖာန်ဒန် ဂိတုဂျူလာၚ် ၃ ဂှ် သဳကၠဳလဝ်အကာဲအရာ ဆေၚ်စပ်ကဵုပရေၚ်ဆာန်ကၟိန် အကြာဍုၚ်ဗၟာ-ဍုၚ်လဴ ကေုာံ ပရေၚ်ပံၚ်တောဲကဏ္ဍနာနာတံရောၚ်။
အကြာနိဂီုၜါဍုၚ်ဏံ ဒှ်သ္ၚိဗ္ဒာဲဇိုၚ်ဝုတ်ဒိုဟ်ခိုဟ်ဟ်၊ နွံကဵုပရေၚ်ဆေက်ဆောံဍုက်ကေဝ်ဆာန်ကၟိန်ညးသ္ကံတုဲ အကာဲအရာပရေၚ်ပံၚ်တောဲအကြာၜါဍုၚ် ပဵုတုဲဒြဟတ်ဂွံခိုဟ်တိုန်အာ အစဳအဇန်သွက်ဂွံကၠောန်ဗဒှ်ပေါဲကောံဓရီု ကမ္မယှေန် ပရေၚ်ပံၚ်တောဲရေၚ်တၠုၚ် အကြာဗၟာ-လဴ နိဂီုၜါဍုၚ်တံလေဝ် ပါမံၚ်ကီုရ။
စပ်ကဵုပရေၚ်ပံၚ်တောဲကဏ္ဍနာနာတံမ္ဂး ပရေၚ်ပညာ၊ ပရေၚ်ထတ်ယုက်၊ ယေန်သၞာၚ်၊ ပရေၚ်စဵုဒၞာ ကေုာံ သွက်ဂွံထမံက်ရုပ်ရဴကိုန်အစဳဇန် ပရေၚ်ဓါတ်လလဳ မွဲဒမြိပ်ကြုၚ်မေဝ်ဂံၚ် သွက်ဂွံပတိတ်ဓါတ်လလဳ အကြာၜါဍုၚ်တံ မဒှ်ရ။
နူကဵုဒဒန်ပရေၚ်ဆာန်ကၟိန် ဗၟာ-လဴဂှ် မွဲအဆံၚ် သွက်ဂွံထမံက်ရုပ်ရဴဇၞော်မောဝ်တောတက် ပရေၚ်ကူသာန်သွံရာန်ဗၞိက်ဒေသပယျဵု ကေုာံ ပရေၚ်ပလံၚ်ဗ္စိုပ်ကပေါတ်ဗၞိက် တတ်ၜက်ဒေသပယျဵုတံကဵု ပရေၚ်ပံၚ်တောဲကေၚ်ကာသၟာကမၠောန်တံဂှ်လေဝ် သဳကၠဳလဝ်ကီုရ။
တုဲပၠန် အကာဲအရာသွက်ဂွံသၠုၚ်ပတိုန် ကဏ္ဍအာတရဴ ကေုာံသွက်ဂွံဒက်ပ္တန်ပရေၚ်ဆက်ဆောံ ဍုၚ်ဇၞော်မဟာ ကောဒေံ အကြာနေပျဳဒဝ်ကဵု ဗီုယေန်ကျာန်တံလေဝ် ပါလုပ်ရ။
မွဲလပါ်ပၠန် သွက်ဂွံဘိုၚ်ပံၚ်တောဲကၠောန်အာ ပရေၚ်ယှအ်ဖျေံ သၟုယက်လက်ကၠာ် တတ်ၜက်ပယျဵု ပိဍုၚ် ဗၟာ-သေံ-လဴတံကီု၊ ပရေၚ်ဒေသပယျဵု သွက်ဂွံညိၚ်ဝပ်ကေုာံ ပရေၚ်ဂီုကၠီု၊ ပရေၚ်ဗတိုက်သရိုဟ်ကၠေံ ဂဥုဲၜူမာဲ ကေုာံ ညံၚ်ပရေၚ်လီသြန် အန်လာၚ်တံ ဂွံအိုတ်အးအာဂှ်လေဝ် သဳကၠဳလဝ် မဒှ်ရ။
စပ်ကဵုအကာဲအရာ နူလပါ်အလဵုအသဳပၞာန် ဂိုတ်ဂစာန် ဂါံကွာ်အာမံၚ် လတူဂၠံၚ်တရဴဒဳမဝ်ကရေဇြဳ ဗော်ဇဳတံဂှ်ကီု ပရေၚ်ၜိုဟ်လလမ် အပ္ဍဲဍုၚ် သွက်ဂွံဂွံဂှ်ကီု ပရေၚ်ဇၞော်မောဝ်တောတက်ဖောအ်ဗြဳတံဂှ်လေဝ် ဥူမေန်အံၚ်လှိုၚ် ပတိုန်ထ္ၜးလဝ်ရောၚ် ပ္ဍဲလိက်ပရိုၚ်တြးဝါဒတံ ချူထမံက်လဝ်ရ။
က္ဍိုပ်သ္ကိုပ်ပၞာန်သီအဝဵု နုက်တိတ်လဝ်နူတာလျိုၚ်ဂဥုပ်ဒပ်တုဲ နကဵုအလဵုဇကု ခါန်ကၞက်ကေတ်လဝ်သမ္မတ ဥူမေန်အံၚ်လှိုၚ် အာဝေင်လဝ်ဍုၚ်လဴဏံဂှ်တှ်ေ ဒှ်တရဴတိတ်လဝ်ဍုၚ်မ္ၚး အလန်တတိယရ။
တရဴဏံဂှ် ပ္ဍဲအကြာဍုၚ်နိဂီု ကောန်ဂကောံအာသဳယာန်တံမ္ဂး ဒှ်လၟေၚ်တရဴကိုပ်ကၠာအိုတ်မွဲတုဲ ပရေၚ်ဆက်ဆောံ အမာတ်ကလုတ် အကြာဍုၚ်လဴ-ဍုၚ်ဗၟာ ပရေၚ်သ္ပစၟတ်သမ္တီပေၚ်စိုပ် ၇၀ သၞာံ ဒှ်ကီုရ။ အပ္ဍဲဂိတုတုဲကၠုၚ်တံဂှ်လေဝ် ဥူမေန်အံၚ်လှိုၚ် အာဝေၚ်လဝ် ဍုၚ်အိန္ဒိယကဵု ဍုၚ်ကြုက်တံ တုဲယျ။
ပရိုၚ် – သြၚ်လောန်တိုၚ်မ်
Photo – MOI