မတ်မလီု၊ ဂျူလာၚ် ၅
တွဵုရးမန် ဍုၚ်ဇၞော်မဟာ မတ်မလီုဝွံ ပ္ဍဲလက်ထက်အလဵုအသဳပၞာန်ဏံ စပ်ကဵုကမၠောန် ပရေၚ်ကေၚ်ကာဗဂဵုလဟဵုသာယာတံ ဟွံဇၞော်မောဝ်တုဲ ပဵုတုဲဆုတ်ယောၚ်စှ်ေကၠုၚ်မံၚ်ရဂှ် ရဲဍုၚ်မတ်မလီုတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲပရေၚ်ကေၚ်ကာကမၠောန် ဂကောံဗဂဵုလဟဵုသာယာတံမ္ဂး စပ်ကဵုပရေၚ်သီဂိုၚ်ထၟိက်၊ ပရေၚ်ပလေဝ်ဂၠံၚ်ဒဒန်၊ ပရေၚ်ခါဲပလေဝ်ဗရံၚ်ဍာ်၊ ပရေၚ်ပါ်ပရအ်တြးကဵုဍာ် မပ္တံကဵု ကမၠောန်သ္အးဇ္ၚးပရေၚ်သာယာ အပ္ဍဲဍုၚ်တံဆက်တုဲ ဍိုန်လျစှ်ေကၠုၚ်မံၚ်ရောၚ်။
ဗွဲတၟေၚ် ကမၠောန်သ္အးဇ္ၚးပရေၚ်သာယာအပ္ဍဲဍုၚ် သီဂိုၚ်ပကောံထၟိက်တံမ္ဂး အကာဲအရာ နူကဵုဂကောံဗဂဵုလဟဵုသာယာ ဆက်ဖန်ဖက်ရေၚ်တၠုၚ်အာဂှ် ပဵုတုဲဍိုန်လျကၠုၚ်မံၚ်ရောၚ် ရဲဍုၚ်မတ်မလီုတံ ဟီုမံၚ်အိုတ်ရ။
အခိၚ်ကၠာတေံ ကွဳစက်သီုဂိုၚ်ထၟိက်တံ မွဲအရာပ်တှ်ေ မွဲသတ္တဟ ၜါဝါ ကၠုၚ်ဂိုၚ်ကဵုမံၚ်ကီုလေဝ် ဗွဲကြဴဏံ မွဲသတ္တဟ မွဲဝါလေဝ် ဟွံကၠုၚ်သီဂိုၚ်တုဲ အရာပ်လ္ၚဵုတံမ္ဂးမွဲဂိတု မွဲဝါလေဝ်ဟွံစိုပ်ကၠုၚ် အကာဲအရာဗီုဏံ ဒှ်မံၚ်ရောၚ်။
တုဲပၠန် စေဝ်နထၟိက်စွံကဵုလဝ်တံဂှ်လေဝ် ဂွံဆဵုညာတ်မံၚ်ပ္ဍဲဒကဲဂၠံၚ် ဇိုၚ်ၜဳသၟးနွံမံၚ်ညိညတုဲ၊ ပ္ဍဲဒၞာဲမၞိဟ်နွံ အရာပ်ဗွဲမဂၠိုၚ်တံဂှ် ပြေၚ်စွံကဵုလဝ်စေဝ်နထၟိက်တံ ညိလေဝ်ဟၟဲပုဟ်။
စပ်ကဵုအကာဲအရာ ပရေၚ်ကမၠောန်ကေၚ်ကာ ဗဂဵုလဟဵုသာယာတံဂှ်ပဵုပရေံစှ်ေအာ နူအခိၚ်ကၠာတေံတုဲ ကွဳစက်သီုဂိုၚ်ထၟိက်တံကၠုၚ်မံၚ်ဟီုဂှ် ဟွံဂွံဆဵုညာတ်ရပုဟ် ရဲဍုၚ်မတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဂကောံဗဂဵုလဟဵုတံဂှ် အကာဲအရာတံ ပဵုတုဲယောၚ်ယာစှ်ေအာ နူအခိၚ်ကၠာတေံဏီ၊ ဆဵုအာမံၚ် ပရေၚ်ယောၚ်ယာနာနာသာ်ရ။ ထၟိက်ဇကုဒးသီဂိုၚ်ပကောံဂှ်လေဝ် ဟွံကၠုၚ်ပကောံ ဒှ်မံၚ်အကာဲအရာမွဲဗီုရ။ ကွဳစက်ထၟိက် ကၠုၚ်သီဂိုၚ်ဏာဂှ် စဵုကဵုတ္ၚဲဏံ ဟွံကေၚ်ဆဵုပုဟ်။ ညိလေဝ်ဟၟဲလးလးပုဟ်” သာ်ဝွံ သ္ဂးရ။
အတိုၚ်တၚ်နၚ်ဂွံလဝ် နူစၠတ်ထဝ်မ္ဂး စရၚ်သြန်လုပ်တိတ် သၞာံပရေၚ်ဘဏ္ဍာ ၂၀၂၆-၂၀၂၇ အလဵုအသဳတွဵုရးမန် ပရေၚ်ဂကောံဗဂဵုလဟဵုသာယာမ္ဂး ဒှ်ဌာန ဂွံလဝ်သြန်ဘဏ္ဍာ ဗာတ်ဂျက် ဂၠိုၚ်အိုတ်မွဲ မဒှ်ရ။
ဆဂး ပရေၚ်ဂကောံဗဂဵုလဟဵုသာယာဝွံ ပရေၚ်ဒတုဲဖဵု သွက်ညးဍုၚ်ကွာန်ကမၠောန်ဗဂဵုလဟဵုသာယာ စပ်ကဵု ဒးထပ်ရာန်ကွဳစက်သီထၟိက်တံကီု၊ ဒးထပ်ဗပေၚ်ကောန်ကမၠောန် ၊ ချူအစဳဇန်ပရေၚ်ကမၠောန် သွက်ဂွံထမံက်ရုပ်ရဴ လၟေၚ်ကမၠောန်ပရေၚ်သ္အးဇ္ၚးသာယာ လ္တူဍုၚ်တံဂှ် ဟွံဆဵုလဝ်ဏီပုဟ်။
အပ္ဍဲကဵုကံက် သွက်ပရေၚ်ဗဂဵုလဟဵုသာယာတံမ္ဂး စနူပရေၚ်သိုၚ်ခၞံ သ္ၚိဌာန်၊ သွက်ဂွံဂွံဍာ်၊ သီဂိုၚ်ထၟိက်တံဂှ် ပရေၚ်ဒးထပက်မံၚ် လာဘ်ဗဇဴနွံမံၚ်ရောၚ် ရဲဍုၚ်မတ်မလီုမွဲတၠ ဟီုရ။
“လၟုဟ်တှ်ေ ဍာ်ကြုၚ်ၜဳကဍတ်ဂှ် ညးတံပါ်ပရအ်ကဵုမံၚ် ဗီုလဵုရောဂှ်လေဝ် ဟွံတီပုဟ်။ ဍာ်ဂှ် ဟွံစိုပ် ဇရေၚ်ညးဍုၚ်ကွာန် တံပုဟ်။ ရဲညးတံ ဂွံလဝ်အဆက် ကော်ဏာဖုၚ်တှ်ေ ကွဳစက်ထၟိက်စိုပ်အာ ဒၞာဲညးတံတုဲ ဂွံသြန်ရ။ သီဏာထၟိက် သွက်ဒၞာဲဂှ်မွဲဓဝ်ရ ပတိုန်ဏာထၟိက်တုဲ တိတ်အာထောံဟဂှ်ရ၊ တၟိက်ညးတၞဟ်လဵုမွဲလေဝ် ဟွံကေတ်ဏာပုဟ်။ ‘ကွဳစက်ထၟိက်ပေၚ်အာယျ’ ဟီုအာ ဗီုဏံရဏောၚ်”သာ်ဝွံ သ္ဂးရ။
မုဟိုတ် တင်ပရေၚ်ဍိုန်လျ ဌာနဗဂဵုလဟဵုပရေၚ်သာယာနွံမံၚ်ရောဟီုတှ်ေ ဟိုတ်နူ ဝန်ဇၞော်ပရေၚ်ဗဂဵုလဟဵုသာယာ ဒံက်တာအံၚ်မျာတ်ကျဝ်သိၚ်ကဵု ဥူတေန်ကိုကို သ္ကိုပ်စၞောန်ပ္ညုၚ် ဂကောံဗဂဵုလဟဵုသာယာတွဵုရးမန် အလဵုအသဳ ၄ အဆက်တံ ဟိုတ်နူစဳရေၚ်ဖန်ဖက်လဝ်ဂှ်ရောၚ် ဒးဟီုရ။
ညးကေတ်လဝ်တာလျိုၚ် ဂကောံဗဂဵုလဟဵုသာယာ ပွိုၚ်ဍုၚ်မတ်မလီု မၞိဟ်တြေံအလဵုအသဳပၞာန်တံကီု သီုညးကေတ်လဝ်တာလျိုၚ် ပြဟ်ဟ်ဏံဂှ် ကမၠောန်ဗဂဵုလဟဵုသာယာတံဂှ် စွံလဝ်ကၠာ ဗီုလဵုဂွံဂၠာဲစသြန် အကြာနူကဵုညးဍုၚ်ကွာန်တံရောဂှ် ဒှ်မံၚ်မၞိဟ်အဆံၚ်ဗီုတံဏံရောၚ် ရဲဍုၚ်မတ်မလီုတံ ပါ်ပါဲမံၚ်ရ။
ဆဂး သ္ကိုပ်ဝန်ဇၞော်တွဵုရးမန် အလဵုအသဳပၞာန် ခါန်ကၞက်ကဵုလဝ် ဒုသ္ကိုပ်ပၞာန် ဥူအံၚ်ဝေန်တာန်ဂှ်တှ်ေ အပ္ဍဲပွိုၚ် ၅ သၞာံ ညးဒးယိုက်ဂၠေၚ်တာလျိုၚ်ဏံမ္ဂး ဍုၚ်မတ်မလီု ညံၚ်ဂွံဒှ် Smart City ဂှ် ကၠောန်အာရောၚ် ဂိတုမေ ၇ တုဲကၠုၚ်တေံ ပ္ဍဲရုၚ်အလဵုအသဳတွဵုရးမန် အခန်ကၞာဆဵုဂဗပရေၚ်ဆက်လဝ်မိတ်ကဵု ညးစၞးစၠတ်ထဝ်တံဂှ် ဟီုကြီုလလောၚ်လဝ်ရ။
ပရိုၚ် – သြၚ်လောန်တိုၚ်မ်
Photo – CJ