မတ်မလီု၊ ဂျူလာၚ် ၅
တွဵုရးမန် နွံမံၚ်သၟဝ်တဲပရေၚ်ဒပ်ပၞာန်သီအဝဵုထိၚ်ချုက်လဝ်ပေၚ်ၚ် ဍုၚ်မတ်မလီုမ္ဂး စပ်ကဵုပရေၚ်ဂီုကၠီု ကေုာံ ပရေၚ်ဥပဒေအုပ်ဓလီုသၞောဝ်ဓရ် သွက်ညးဍုၚ်ကွာန်တံဂှ် ကၠေံဗ္ဒန်ကၠုၚ်မံၚ်ရောၚ် ရဲလ္တူဍုၚ်တံဟီုဂးပါ်ပါဲမံၚ်ရ။
ပ္ဍဲဂိတုဂျူလာၚ် ၁ တုဲကၠုၚ်ဏံ ဒၞာဲဇၞောဝ်ဒဵု ပြာကတ်ဒယှ်မံၚ် လ္တူဍုၚ်မတ်မလီုမွဲဒၞာဲဂှ် သၟာဒဳတက္ကသဳ ကွဳလိုန်ဓါတ် မွဲတၠ ဒးဒုၚ်ဂစိုတ်ပၠံၚ်ၜးကွဳလိုန်ဓါတ် က္တဵုဒှ်လဝ်တုဲ ဂျူလာၚ် ၂ ဂှ် ကလေၚ်ဆဵုလဝ် ဇွဂှ်ရောၚ်။
ဌာန်ဂအုပ်ပၞာန်ရးအဂၞဲ ဖျေံသ္ဇိုၚ်နွံမံၚ်ဍုၚ်မတ်မလီုဂှ် ၜိုန်ရ ဇြဟတ်ပရေၚ်ဂီုကၠီုဂၠိုၚ် ဇၟာပ်ပ်တ္ၚဲဂေတ်ဂၚ်မံၚ် အလုံမွဲဍုၚ်ကီုလေဝ် ဟိုတ်နူဥပဒေအုပ်ဓလီုသၞောဝ်ဓရ်ဟၟဲတုဲ အကြာရဲလ္တူဍုၚ်တံဂှ် ပရေၚ်ဒှ်မံၚ်ဒွိၚ်နာနာသာ်တံ သၠုၚ်တိုန်ကၠုၚ်မံၚ်ရောၚ်။
ပရေၚ်ဥပဒေအုပ်ဓလီုသၞောဝ်ဓရ်ဂှ် လံဟဍၚ် ဟၟဲဟဍၚ် ဒှ်ကၠုၚ်မံၚ်တုဲ စိုတ်ဖေက်ဗျာပ်လုပ်ကၠုၚ်မံၚ် ညံၚ်ရဴပရေၚ်ဂီုကၠီုညိလေဝ်ဟၟဲ ပ္ဍဲဇၟာပ်စိုတ်မၞိဟ်တံရောၚ် ညးဍုၚ်ကွာန် မတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပရေၚ်ဥပဒေအုပ်ဓလီုသၞောဝ်ဓရ်ဟီုဂှ် လံဟဍၚ် ဟၟဲဟဍၚ် ဒှ်မံၚ်တုဲ စိုတ်ဖေက်ပိုဲမၞိဟ်တံ သၠုၚ်တိုန်ဗွဲမလောန်။ လၟုဟ် ဖန်ဏာလဝ် သၟာဒဳတက္ကသဳကွဳလိုန်ဓါတ် မွဲတၠတုဲ ဂတဏံ ရဲဍိုက်ကွဳလိုန်ဓါတ်ပူဂိုလ်မွဲမွဲတံလေဝ် အခိၚ်အာမွဲမွဲဒၞာဲ ယဝ်ရအာမၞိဟ်မွဲဓဝ်တှ်ေ ပရေၚ်ဂီုကၠီုဟၟဲရပုဟ် ဗီုဗီုတံဏံဂှ် ပ္ဍဲစိုတ်ပိုဲမၞိဟ်တံ ဇာပ်လုပ်အာယျ” သာ်ဝွံ သ္ဂးရ။
တုဲပၠန် ဟိုတ်နူပရေၚ်ဥပဒေအုပ်ဓလီုသၞောဝ်ဓရ် ဟၟဲမံၚ်တုဲ ပရေၚ်ဂၠာဲစသွက်ဗုၚ်ဂၞဴအရိုဟ်ဟ်တ္ၚဲဂှ်လေဝ် အခက်အခုဲနွံကၠုၚ်တုဲ၊ လတူညးကလိလောန် ကၠောန်ဗဒှ်လဝ်ဟၟဲကဵုဥပဒေတံဂှ်လေဝ် ရပ်ဂွံလဝ်ဟၟဲဏီတုဲ သွက်ဂွံဒှ်ဒွိၚ်နာနာသာ်တံ ပဵုတုဲသၠုၚ်တိုန်ကၠုၚ်မံၚ်ရောၚ် ညးဆက်ဟီုရ။
ဟိုတ်နူကၠောန်မံၚ်ပွ ပရေၚ်ဥပဒေဟၟဲတုဲ ပ္ဍဲဍုၚ်မတ်မလီု ကေၚ်ဒှ်ကၠုၚ်လဝ် ဘဲအန္တရာဲလမျီုနွံမံၚ်ကီုလေဝ် အရာဂၠိုက်ဂၠာဲ ထမံက်ပတိတ်ကဵုမာန်ဟၟဲကၠုၚ်တုဲ ဒးဇီုကပိုက်မံၚ်ကဵုပရေၚ်အကာဲအရာ ‘ဇကုဒးဇကုဒုၚ်’ ကေတ်တ်ရောၚ် ညးလိၚ်ဒဳစကွဳစက်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဍုၚ်မတ်မလီုဂှ် ဇၞော်မံၚ်ဏောၚ်၊ သွက်ပိုဲညးတံ ပရေၚ်နွံကဵုဘဲအန္တရာဲလမျီုတံ ပရေၚ်ဥပဒေအုပ်ဓလီုသၞောဝ်ဓရ်လေဝ် ဗီုပြၚ်ဂၠိုက်ဂၠာဲထမံက်ပတိတ်ကဵု ချိုတ်တ်ပၠိုတ်တ်ဟၟဲတုဲ ဇကုဇကု ဒးစွံအာမံၚ်သတိညိညိညညရ။ လတူပရေၚ်က္တဵုဒှ်အာသာ်ဏံဂှ် နကဵုအဲ ညးဒဳကွဳစက်မွဲတၠမ္ဂး ပဵုဖေက်ကၠုၚ်မံၚ်ယျ။ ‘ယဝ်ရဇကုဒှ်မ္ဂး ဇကုဟေၚ်ဒးဒုၚ်’ သာ်ဏံဂှ် ဟိုတ်နူဒှ်မံၚ်အကာဲအရာ နတဲဗီုဏံတုဲ ပဵုဒးဖေက်မံၚ်” သာ်ဝွံ သ္ဂးရ။
မွဲလပါ်ပၠန်ဂှ်လေဝ် ကြဴနူကဵုဒပ်ပၞာန်သီအဝဵုတုဲ ဍုၚ်မတ်မလီုသ္ပလဝ် ကိုန်အစဳဇန် Safe City ဂှ် သုၚ်စောဲစကာလဝ် သြန်ဘဏ္ဍာ ညးဍုၚ်ကွာန် လၟိဟ်သြန်ကိုတ်ကဵုလ္ၚီတုဲ အလုံမွဲဍုၚ်စွံလဝ်ကေန်မရာ CCTV ပေၚ်ထာတ်ကၠေံမံၚ်ရောၚ်။ ၜိုန်ရဍုၚ်မတ်မလီု သ္ပလဝ် Safe City တုဲ စွံလဝ်ကေန်မရာ CCTV ပေၚ်ကၠောံဂေတ်မံၚ် အလုံဍုၚ်မွဲကီုလေဝ်၊ ပရေၚ်ကၠတ်ကွဳလိုန်ဓါတ်တံ ဒှ်မံၚ်မွဲဏှမွဲဏှတုဲ ပရေၚ်ပၠံၚ်ၜးကေုာံ ပရေၚ်ဒုဟ်စရိုဟ်တၞဟ်ဟ်တံ က္တဵုဒှ်မံၚ်ကီုလေဝ် မၞိဟ်တၠတဲတံဂှ် ရပ်ဂွံလဝ်ဟၟဲဏီပုဟ်။
လ္တူဍုၚ်မတ်မလီုဂှ် ဒပ်ပၞာန်၊ ဒပ်ဗၠာဲသၟိၚ်၊ ဒပ်မၚ်ကွာန် ပါဲနူဂှ်ပၠန် ဂကောံဂီုကၠီုညးဍုၚ်ကွာန် ကေုာံ ဂကောံဗတိုက်ပလီုပကီုပရာတ်တံဂှ် ပ္ဍဲကဵုပါၚ်ပၞော်လုပ်တိတ်ဍုၚ်တံ မင်ဂၠိုက်ဂၠာဲ စၟဳစၟတ်မံၚ်ဂှ်ကီု၊ ဗက်ကၟာတ်ဆိုအ်ဂၠာဲမံၚ်အကြာပ္ဍဲဍုၚ် နွံမံၚ်ကီုလေဝ် ပရေၚ်ဥပဒေအုပ်ဓလီုသၞောဝ်ဓရ် ညံၚ်ရဴဟၟဲ ဒှ်ကၠုၚ်မံၚ်ရောၚ် ညးဒေသတံ ဟီုမံၚ်အိုတ်ရ။
ပရိုၚ် – သြၚ်လောန်တိုၚ်မ်
Photo – Social Media