ဝဝ်၊ ဂျူလာၚ် ၁၇
ကပေါတ်ဗၞိက်ရပ်သီဂွံလဝ် ပ္ဍဲဂိက်သၞေဟ်ကၚ်စၟဳစၟတ်လၟိုန် ညံၚ်ခါယှေ ဍုၚ်ဝဝ်ရးဗဂေါတံဂှ် နကဵုနဲကဲပြိုၚ်ပကာန် ထဗိုတ်လေလာန်တုဲသွံအာရောၚ် နူကဵုဌာနအကံက်အခေါန်အလဵုအသဳဒပ်ပၞာန် လလောၚ်တြးလဝ်ရ။
နကဵုသြန်ဘဏ္ဍာညးဍုၚ်ကွာန် နူကဵုဌာနအကံက်ခေါန် ရပ်သီဂွံလဝ်ဖုၚ်သုၚ်စောဲတုဲတုဲ (Used Phone) တံ၊ စက်ဆာဲလိက်သုၚ်စောဲတုဲတုဲ (Used Copien) ၊ ကပေါတ်စက်ယာန်အပဵု၊ တာယာကွဳစက်၊ ဗက်ထရဳ၊ ကပေါတ်မၞိဟ်ဂမၠိုၚ်စကာသုၚ်စောဲတံကေုာံ ကပေါတ်စၞစသုၚ်သ္ဇိုၚ်နာနာသာ်တံဂှ် သွံအာရောၚ်ကဵုလဝ်သမ္တီရ။
ကပေါတ်ဗၞိက်ဟွံလုပ်သၞောဝ် သီရပ်ဂွံလဝ်တံဏံဂှ် ယဝ်ရမိက်ဂွံရာန်မ္ဂး နဲကဲစေဝ်ပၞောန် လေလာန်ကေုာံ ဗီုပြၚ် လေလာန် မွဲစုံမ္ဂး သြန် ၁ ဠက်ဒကေဝ် စနူဂျူလာၚ် ၁၃ စဵုကဵု ၁၆ အပ္ဍဲအခိၚ်ရုၚ် ကၠုၚ်ရာန်ကေတ်မာန်ရောၚ် လလောၚ်တြးလဝ်ရ။
ကပေါတ်ဗၞိက်သီရပ်ဂွံလဝ်တံဂှ် စနူဂိတုဂျူလာၚ် ၁၇ အခိၚ်နူဂယး ၉ နာဍဳကဝက်မ္ဂး ပ္ဍဲဒၞာဲသၞေဟ်ကၚ်စၟဳစၟတ်လၟိုန် ညံၚ်ခါယှေဂှ် နကဵုနဲကဲ ပြိုၚ်ပကာန်ၚုဟ်မးသွံအာရောၚ်ဒှ်တုဲ ညးဍုၚ်ကွာန်တံလုပ်ပြိုၚ်ရာန်ကေတ်မာန်ရောၚ် သ္ဂးရ။
ကပေါတ်ဗၞိက်တံဏံဂှ် ရဲတၠဗၞိက် ဗွိုၚ်ကြပ်ကဵုဒပ်ပၞာန်ကေုာံ တၠဗၞိက်ဇၞော်ဇၞော်ရဲသြန်နွံတံမှ ရာန်ကေတ်မာန်တုဲ ၚုဟ်မးကပေါတ်တံထပ်သၠုၚ်တိုန်မာန်ရောၚ် တၠဗၞိက်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူလပါ်ဒပ်ပၞာန်သီအဝဵု ထ္ၜးဟိုတ်ပရေၚ်ဂီုကၠီုပံက်လဝ်ဂိက်ကဆံၚ်ၚ်တံဂှ် ထပက်လာဘ်ကဵုလဝ်သြန် ကိုတ်ကဵုလ္ၚီ တတ်ပလံၚ်ဗ္စိုပ်နၚ်လဝ်တုဲမှ ကပေါတ်တံဏံဒးဒုၚ်ရပ်သီကေတ်ဏာလဝ်ရောၚ် တၠဗၞိက်တံသ္ဂးရ။
ဍုၚ်ဗၟာဂှ် ဒးသ္ပပဓါန်စမံၚ်ကဵုကပေါတ်ဗၞိက်ထပၠုပ်နၚ်နူကဵုဍုၚ်သေံ မပ္တံကဵုကပေါတ်စသုၚ်စၞစသ္ဇိုၚ်ဗွဲမဂၠိုၚ်ကီုလေဝ် ထ္ၜးဟိုတ်ကပေါတ်ဟွံလုပ်သၞောဝ်တုဲ ရပ်ထိၚ်သီကေတ်မံၚ်တံဂှ် ကပေါတ်ပိုတ်အာမ္ဂးညးဍုၚ်ကွာန်တံ ဒးရာန်စသုၚ်အာမံၚ်နကဵုၚုဟ်မးသၠုၚ်ၚ်ရ။
ပရိုၚ် – သြၚ်လောန်တိုၚ်မ်
Photo – MOI