လန်ဒန်၊ ဂျူလာၚ် ၁၈
ပ္ဍဲဍုၚ်အေန်ဂလာန် သွက်ကောန်ၚာ်အဝဲသၟဝ် ၁၆ သၞာံတံ အခေါၚ်ရာန် ဍာ်ဍာတ်တ်ထပေၚ်ဇြဟတ် မနွံကဵုဓါတ်ကဖိၚ်ဂၠိုၚ်တံဂှ် စနူဂိတုအေဗရာ သၞာံဂတဏံမ္ဂး စတုဲတးပါဲအာရောၚ် အလဵုအသဳ ဟီုလဝ်ရ။
ပ္ဍဲဆေၚ်ဖျာတံ၊ ဆေၚ်စသုၚ်တံ၊ ဆေၚ်ကဝ်ဖဳတံ၊ စက်စုတ်သြန်ရာန်ကပေါတ်တံ ကေုာံ နကဵုအန်လာၚ်တံမ္ဂး ဍာ်ဍာတ်တ်ထပေၚ်ဇြဟတ်မွဲလေတ် ဓါတ်ကဖိၚ်ပါလုပ် ၁၅၀ မဳလဳဂရမ်ကဵု လတူတံမ္ဂး သွံကဵုကောန်ၚာ်တံ ဟွံဂွံပုဟ်ဂှ် တးပါဲအာရောၚ်။
ဆဂး ဍာ်ဍာတ်တ် ဓါတ်ကဖိၚ်ပါလုပ်အောန် ညံၚ်ရဴ Diet Coke တံ၊ ဍာ်လက်ဖက် ကေုာံ ကဝ်ဖဳတံဂှ်လေဝ် ဟွံတးပါဲပုဟ် ဂွံတီကေတ်ရ။
ဆဂး ဍာ်ဍာတ်တ်ထပေၚ်ဇြဟတ် ဓါတ်ကဖိၚ်ပါလုပ်ဂၠိုၚ် ညံၚ်ရဴ Red Bull, Monster, Relentless ကေုာံ Prime တံဂှ် တးပါဲအာရောၚ် သ္ဂးရ။
သွက်ဂွံယှအ်ဖျေံအာ ပရေၚ်ကြောအ်ဂၠိုၚ်လောန်ကာဲ အပ္ဍဲကောန်ၚာ်တံ၊ ဟိုတ်နူဒဝိၚ်စိုတ်တုဲ ဒှ်ပရေၚ်တိက်ဟွံသၠိၚ်တံဂှ် အလဵုအသဳ ဖန်ဇန်ရေၚ်တၠုၚ်ကၠုၚ်သာ်ဏံ မဒှ်ရ။
အတိုၚ်ဂလာန်ပတိုန်ထ္ၜး လလောၚ်တြးလဝ် ပ္ဍဲသၞာံတုဲကၠုၚ်တေံမ္ဂး ညးတံရန်တၟအ်လဝ် သွက်ဂွံဒက်ပ္တန်အာ တၞောဝ်ဒတောဝ်ကောန်ၚာ် ပရေၚ်ထတ်ယုက်ခိုဟ်ဟ်မွဲရောၚ် ဝန်ဇၞော်ပရေၚ်ထတ်ယုက် ယှာရန် ဟိုတ်သေန် ဟီုရ။
ပရေၚ်တးပါဲဏံဂှ် ဒးသ္ပဒတန် စၠတ်ထဝ်ဏီတုဲ၊ ပရေၚ်ကမၠောန် ဖံက်ပကဝ်ဏာ တၚ်တးပါဲတံဏံမ္ဂး ဒးဇီုကပိုက်ကဵု ပရေၚ်ဒးတပ်သြန်ဒဏ် သၠုၚ်အာစဵုကဵုသြန် ၂၅၀၀ ပံၚ်ရောၚ်။
ပ္ဍဲဍုၚ်အေန်ဂလာန်ဂှ် ကောန်ၚာ် ၜိုတ် ၁ ကိုတ်တံ သုၚ်စောဲမံၚ် ဍာ်ဍာတ်တ်ထပေၚ်ဇြဟတ်တံ အရိုဟ်ဟ်တ္ၚဲနွံမံၚ်ရောၚ် ဂွံတီရ။
တဆိပ်ဍာ်ဍာတ်တ်မၞိဟ်စိုတ်လုပ်ဂၠိုၚ်လ္ၚဵုတံမ္ဂး ဓါတ်ကဖိၚ် ပါလုပ်ဂၠိုၚ်နူ ကဝ်ဖဳ ၂ ခေါ် ဟွံသေၚ်မ္ဂး ဍာ်ကိုလာ ၄ ဗူတံဏီရောၚ် ဂွံတီရ။
ဟိုတ်နူ ပရေၚ်သုၚ်စောဲလောန်ကာဲၜက်လဝ် ဍာ်ဍာတ်တ်ထပေၚ်ဇြဟတ်တံတုဲ ပရေၚ်တိက်ဟွံသၠိၚ်၊ ယဲက္ဍိုပ်ဂိတံ ဒှ်မာန်ရ။
သွက်ညးသုၚ်အာဒၟံၚ် ဍာ်ဇမၠိၚ်တံမ္ဂး ဒးဇီုကပိုက်ကု ဖဵုပရေံပရေၚ်ထတ်ယုက်တၞဟ်ဟ်တံမာန်ရောၚ် ညးတာလျိုၚ် ပရေၚ်ထတ်ယုက်တံ ကဵုလဝ်သတိရ။
ကောန်ၚာ်တံ ခန္ဓဇကုဍောတ်တုဲ ကၠေၚ်က္ဍဟ်တံ အကာဲအရာသွက်ဂွံဆက်ဖောအ်ဗြဳအာ နွံမံၚ်ဏီတုဲ စပ်ကဵုဓါတ်ကဖိၚ်မ္ဂး ညိဟွံဒုၚ် ပရေၚ်ဒစေၚ်ဒဝေၚ်တံပုဟ် တၠပညာတံ ဟီုရ။
ဟိုတ်နူသုၚ်ဓါတ်ကဖိၚ်ဂၠိုၚ်လောန်တုဲ အသိၚ်ကောန်တၟံယိုက်ချဳ ဟွံဍာံပြတံ၊ အသိၚ်ကောန်တၟံယိုက်ချဳ ပြဟ်လောန်အာ ကေုာံ ယဲကျာသကုတ်တံ က္တဵုဒှ်မာန်ရ။
ယဝ်ရသုၚ်ဍာ်ဍာတ်တ် သဂြာတံပါလုပ်ဂၠိုၚ်ၚ်မ္ဂး ကြောအ်လောန်တိုန် ကေုာံ အန္တရာဲၚေက်တံ လီုလာ်အာ ဒှ်ကၠုၚ်မာန်ရောၚ်။
Ref:BBC