ၜၚ်ကံက်၊ ဇူလာၚ် ၂၂
အဟိန်စၟဳစၟတ်အာ ထိုၚ်အာတရဴတံ နကဵု X-ray ဂှ် ယဝ်ရခယျကေတ်ကပေါတ် ဒှ်ဘဲအန္တရာဲနွံမာန်မ္ဂး ညးအာတရဴတံ ဟၟဲလေဝ် အခေါၚ်စၟဳစၟတ်ပံက်ထိုၚ်ရဲအာတရဴတံ စေဝ်ပၞောန်တၟိမွဲ ညံၚ်ဂွံနွံအာဂှ် နူကဵုဂကောံပိုင်ပြဳအဝဵု ပရေၚ်ပဝ်ယာန်ညးဍုၚ်ကွာန် (CAAT) သေံဂှ် သ္ပပ္တံဆက်အာမိတ်ရောၚ်။
တၚ်စၟတ်ပိုၚ်ခြာလဝ် ဥပဒေစေဝ်ပၞောန်ဏံ ပ္ဍဲအံက်တဝ်ဗါ ၁၆ ဂှ် လမျီုစလုပ်အာရောၚ်။
သၞောဝ်ဥပဒေတၟိ သွက်ဂွံစၟဳစၟတ်ထိုၚ်အာတရဴတံဂှ် ရန်တၟအ်ကဵုပရေၚ်ဂီုကၠီုသၞေဟ်ၜၚ်ကျာ ဒြဟတ်ဂွံခိုဟ်တိုန် အတိုၚ်သၞောတ်ဗ္ၜတ်ဂၠးကဝ်ရောၚ် ညးတာလျိုၚ်သေံတံ ဟီုရ။
အတိုၚ်သၞောတ်ဥပဒေတၟိမ္ဂး ပ္ဍဲအဟိန်စၟဳစၟတ်ထိုၚ်အာတရဴ နကဵု X-ray တံဂှ် ကပေါတ်တာဒၞာလဝ်တံ၊ ကပေါတ်ဒှ်သၠေဟ်ပၟာတံ ကေုာံ ကပေါတ်ဒှ်တင်ယုတ်ဒေက်အာကဵု ပရေၚ်ဂီုကၠီုပဝ်ယာန်တံ ယဝ်ရဆဵုမ္ဂး ညးတာလျိုၚ်ပရေၚ်ဂီုကၠီုတံ ပံက်စၟဳစၟတ်အာ ထိုၚ်အာတရဴတံရောၚ်။
ပ္ဍဲအခိၚ်ပံက်စၟဳစၟတ်ထိုၚ်အာတရဴတံမ္ဂး နကဵုအလဵုညးအာတရဴတံ ဒးနွံမံၚ်ဟွံသေၚ်ပုဟ် ညးတာလျိုၚ် CAAT တံ သ္ဂးရ။
ကြဴနူစၟဳစၟတ်တုဲဒှ်အာယျမ္ဂး ပရေၚ်ပံက်စၟဳစၟတ်လဝ်ထိုၚ်အာတရဴဂှ် သွက်ညးအာတရဴတံ ဂွံတီ လိက်ကဵုသမ္တီဂှ် ဗာန်လဝ်ကဵုရောၚ် ဂွံတီရ။
အပ္ဍဲပရေၚ်စၟဳစၟတ်တံဂှ် ကပေါတ်တာဒၞာလဝ်တံ ဟွံသေၚ်မ္ဂး ကပေါတ်ဘဲအန္တရာဲဒှ်မာန်တံ ယဝ်ရဆဵုမ္ဂး ညးတာလျိုၚ်တံ သီကေတ်တုဲ ကလေၚ်ကဵု ညးအာတရဴတံ ဟွံသေၚ်ပုဟ် ဂွံတီကေတ်ရ။
ကြဴနူ CAAT ကၠောန်လဝ်အစဳဇန် ပရေၚ်ဂီုကၠီုတၞဟ်မွဲတုဲ စပ်ကဵုပရေၚ်စၟဳစၟတ်ထိုၚ်အာတရဴဏံ စေဝ်ပၞောန်ဥပဒေတၟိ မံက်ဂတဝ်ကၠုၚ်လဝ်ရောၚ်။
ပ္ဍဲဂိတုဂျောန်မံက်တေံ သွက်ဂွံယှအ်ဖျေံဘဲအန္တရာဲဆေၚ်စပ်ကဵု ဗက်ထရဳ လဳတဳယမ် လတူၜၚ်ကျာသေံတံတုဲ ဥပဒေတၟိ မၚ်မွဲထိၚ်ဒဝ်ပရေၚ် ဖ္ဍိုက်ပလံၚ်ဗက်ထရဳပါဝါဗဏ် (Power Bank) တံမွဲဂှ် သ္ပပ္တံဆက်ကၠုၚ်လဝ်မိတ်ရ။
စေဝ်ပၞောန်ဥပဒေတၟိဂှ် သွက်ညးအာတရဴယိုက်ကေတ်နၚ်လဝ် ဗက်ထရဳ လဳတဳယမ်အပဵု ဟွံသေၚ်မ္ဂး ပါဝါဗဏ်တံ လတူၜၚ်ကျာတံဂှ် လလောၚ်တြးကဵုလဝ်ရောၚ်။
အတိုၚ်စေဝ်ပၞောန်ဥပဒေတၟိဂှ်မ္ဂး ပါဝါဗဏ်တံဂှ် ပ္ဍဲထိုၚ်အာတရဴ စုတ်လဝ်အပ္ဍဲဇကုၜၚ်ကျာဂှ်ဟေၚ် အခေါၚ်ကေတ်ဏာနွံတုဲ ပ္ဍဲထိုၚ်ခဝက်တဲတံဂှ် အခေါၚ်ကေတ်ဏာဟၟဲ တာဒၞာလဝ်ရောၚ်။
လတူၜၚ်ကျာဂှ် သွက်ညးအာတရဴတံ စုတ်ပါဝါဖုၚ်ကဵု ကပေါတ်အဳလက်ထရဝ်နိတ်တၞဟ်တံကီုဂှ် တာဒၞာလဝ်ရောၚ်။
Ref:Thaiger