ထဝါဲ၊ သိပ်တေမ်ပါ ၂၃
အပ္ဍဲရးတနၚ်သဳ ခရိုၚ်ထဝါဲ ဒပ်ချဳဒရာၚ်မံၚ်ပရေၚ်ပၞာန် နူကဵုဒပ်ပၞာန် ကဝ်တူလေ KTLA တမ်ဒပ်သာကပဝ် ကောန်ပၞာန် ၂၅ တၠ တံ ကလေၚ်လုပ်စိုပ်ကၠုၚ် ဇရေၚ်မဟာဒပ် ၄ ဒပ်ပၞာန်ဗၠးၜးကောန်ဂကူ ကရေၚ် KNLA ရဂှ် နူကဵု KNU ခရိုၚ်ဗိက်-ထဝါဲ လလောၚ်ပတိတ်လဝ်ပရိုၚ်ရ။
ပ္ဍဲဂိတုသိပ်တေမ်ပါ ၂၁ ဂှ် နူကဵု KNLA မဟာဒပ် ၄ ကၠောန်အခန်ကၞာ ဒုၚ်တၠုၚ် ဗိုလ်သဝ်အောအ်ဖိုဝ် က္ဍိုက်ပ် ကောန်ဒပ် ၂၅ တၠ ဒပ်ပၞာန်ကဝ်တူလေ KTLA တမ်ဒပ် သာကပဝ်တံဂှ်ရ။
ပ္ဍဲအခန်ကၞာဂှ် နူကဵု KNU မဟာဒပ် ၄ သ္ကိုပ်ဗျူဟာ သ္ကိုပ်ဗိုလ်ဇၞော် သဝ်လေဝ်တိၚ် ဒုၚ်တၠုၚ်ဟီုဂလာန်တၚ်ဂုဏ် ကဵုဇြဟတ်ကု က္ဍိုပ်သ္ကိုပ် တမ်ဒပ် သာကပဝ် ဒပ်ပၞာန်ကဝ်တူလေ KTLA တံဂှ်ရ။
ဟိုတ်နူကလေၚ်လုပ်ကၠုၚ် သၟဝ်ပၠတရဴ ဗော်သွးကောန်ဂကူကရေၚ် KNU ဒပ်ပၞာန် KNLA ဂှ်ရ ဖျေံလာပ်ပတိုန်ကဵုစရာဲ ကု က္ဍိုပ်သ္ကိုပ်တမ်ဒပ် သာကပဝ်တံတုဲ ကောန်ပၞာန်သီုဖအိုတ်တံဂှ် ပြံၚ်လှာဲဗာန်စုတ်ဏာကဵု တဆိပ်ပၞး တဆိပ်ဒပ် KNLA တံရ။
တုဲကၠုၚ်ဂိတုမေ တေံလေဝ် နူကဵုဒပ်ပၞာန်ကဝ်တူလေ KTLA တမ်ဒပ် ၂ သ္ကိုပ်တမ်ဒပ် သ္ကိုပ်ဗိုလ် ဖိုဝ်အေဝ် က္ဍိုက်ပ် ညးတာလျိုၚ် ၇ တၠတံ သီုဖအိုတ် ကောန်ပၞာန် ၃၀ ပြၚ် ကေတ်နၚ်သီုလွဟ်တုဲ ကၠုၚ်စိုပ်ပံၚ်တောဲလဝ်ကဵု KNU မဟာဒပ် ၄ ဂှ်ရ။
ကောန်ဒပ် KTLA ချဳဒရာၚ်မံၚ်ပရေၚ်ပၞာန် ပ္ဍဲဒေသ KNU မဟာဒပ် ၄ ဂှ် ကၠတ်အောပ်ပန်မံၚ် ဂကောံ KNLA ကဵု PDF တံ မွဲဏှမွဲဏှတုဲ လ္တူဂကောံ KTLA တံဂှ်တှ်ေ KNU လလောၚ်တြးလဝ် နဒဒှ် ဂကောံပကီုပရာတ်ရ။
နူကဵုသၟဝ်တဲ KNU သ္ကိုပ်က္ဍိုပ်ပၞာန် ဒပ် KNDO တြေံ ဒုသ္ကိုပ်ပၞာန် သဝ်နာဒါမျ ဒက်ပတန်လဝ် ဒပ်ပၞာန်ကဝ်တူလေ ပ္ဍဲကဵုသၞာံ ၂၀၂၂ ဂိတုဂျူလာၚ် ၁၆ ဂှ် မဒှ်ရ။
ပရိုၚ်-သြၚ်လောန်တိုၚ်မ်
Photo – KNLA