ထဝါဲ၊ အံက်တဝ်ပါ ၁
အပ္ဍဲရးတနၚ်သဳ ဒေသထဝါဲဂှ် ပရေၚ်ဒဵုလာ်သရိုဟ်ဆက်က္တဵုဒှ်မံၚ်တုဲ နွံမံၚ်ပၟိက်ကဵု ပရေၚ်အရီုဗၚ်ဟံၚ်ပြာ်နာနာ ကာမံက်တိုန်ဗွဲမပြဟ်ဂှ် နူကဵုဂကောံပံၚ်ကောံဂကူထဝါဲ TNF လလောၚ်တြးရ။
ဂိတုသိပ်တေမ်ပါ ၃၀ အခိၚ်သဝ်တ္ၚဲတေံ အတိုၚ်ပရေၚ်ၜတ်ကၞာတ် ဂွံလဝ်တၚ်နၚ်တံမ္ဂး အကြဒေသထဝါဲ ပရေၚ်ဒဵုလာ်သရိုဟ် ဆက်က္တဵုဒှ်မံၚ်ဂှ် မၞိဟ် ၃၂ တၠ ချိုတ်အာလဝ်တုဲ သ္ၚိဌာန်ဟွံအောန်နူ ၃၀၀ မ လီုလာ်အာရ။
အခိၚ်လၟုဟ် ပ္ဍဲပွိုၚ်ဍုၚ်လံၚ်လုၚ်ကဵု တယိတ်ချံၚ်တံ ဟိုတ်နူ ပရေၚ်ဍာ်ဇၞော် ဒဵုလာ်ဒှ်လဝ်တုဲ ဍာ်သုၚ်ဗွဲမဂၠိုၚ် ကၠိခန်ပပ်ပဳအာဂှ်ရ နွံမံၚ်ပၟိက်ကဵု ဍာ်သုၚ်သ္အးဇ္ၚးတံ ပြဟ်ဟ်ရောၚ် သ္ဂးရ။
တုဲပၠန် သ္ၚိဌာန်တံကဵု ပရေၚ်မံၚ်စံၚ်ဘဝမၞိဟ်တံ လီုလာ် ဟောံဗြောံအာလဝ်တုဲ နွံမံၚ်ပၟိက်ကဵု ပရေၚ်ယာတ်ဒၞာစဵု၊ ကပေါတ် ပရေၚ်သ္ၚိဌာန်သုၚ်စောဲ၊ စၞစဇွောံမံၚ်တံကဵု ပရေၚ်မၚ်မွဲရံၚ်စံၚ် ပရေၚ်ထတ်ယုက် အကာဲအရာကာမံက်တိုန် နွံမံၚ်ပၟိက်ရ။
စနူဂိတုသိပ်တေမ်ပါ ၂၈ အခိၚ်သဝ်တ္ၚဲ ပ္ဍဲကဵုခရိုၚ်ထဝါဲ ပရေၚ်ဗြဲဂူရိုပ်ထတ်တ်ဟွံမွဲ ဒၞာဲဒေသဗွဲမဂၠိုၚ် ဍာ်ကလေၚ်စှ်ေအာ ကီုလေဝ် ဒၞာဲဒေသလ္ၚဵု ပရေၚ်ဍာ်ဇၞော်ကဵု ဒဵုသရိုဟ်လာ်စှ်ေတံ ဆက်ကတဵုဒှ်မံၚ်ဏီတုဲ ပရေၚ်ကဵုအရီုဗၚ်ဟံၚ်ပြာ်ဒဒိုက်မၞိဟ်တံ ဒးဆက်ကၠောန်အာမံၚ်နွံရောၚ် နူကဵုဂကောံပံၚ်ကောံဂကူထဝါဲ ဟီုရ။
တုဲပၠန် မၞိဟ်ကၠေံမံၚ် နွံကဵုဒါဇြေန်ဏီကီု ကွဳစက်၊ ကွဳလိုန်ဓါတ်၊ စက်ယန္တရာတံကဵု တိရိစ္ဆာန်တံ ပရေၚ်လီုလာ်ဆောံဗြောံအာ လဝ်နွံတုဲ ဟိုတ်နူပရေၚ်အခက်အခုဲ ဂၠံၚ်ဍာန်ကဵုပရေၚ်ဆက်စၠောံတံ ဝါတ်ဂါတ်ဂှ် ပရေၚ်လီုလာ်ဆောံလေၚ် ပဵုဂၠိုၚ်နူဏံမာန်ရောၚ် သ္ဂးရ။
ဟိုတ်နူ ပရေၚ်ဍာ်ဇၞော်ကဵု ဒဵုလာ်သရိုဟ်က္တဵုဒှ်လဝ်တုဲ တိကသောဝ်ဆုဲအာဂှ်ကီု၊ ဂၠံၚ်ဍာ်တံဆုဲပြံၚ်အာဒၞာဲမာန်တုဲ ညံၚ်ဂွံစွံအာသတိကဵု ပရေၚ်မါၚ်တပ်တိတံကဵု ကပေါတ်လွဟ်ပၞာန် ဟွံခတိုဟ်ဏီတံညိဂှ် နူကဵုဂကောံပံၚ်ကောံဂကူထဝါဲ TNF ကဵုလဝ်သတိရ။
ပရိုၚ်-သြၚ်လောန်တိုၚ်မ်
Photo – CJ