မတ်မလီု၊ အံက်တဝ်ပါ ၁
ဟိုတ်နူ ပရေၚ်ကဵုပရိုၚ် ပလံၚ်ပရိုၚ် ညးဂြိပ်တိတ်နူဒပ် ကေုာံ ရဲဖျေံလွဟ်ပြံၚ်လုပ်အာ လပါ်သၞတံတုဲ ပရေၚ်ဒးဒုၚ်ကြဳဗုမ် ကတဵုဒှ်အာလဝ်ရောၚ် နူကဵုဌာန်ဂအုပ်ရးပၞာန်တၟေၚ် အလဵုအသဳညဳသၟဟ်ကောန်ဂကူ NUG လလောၚ်ပတိတ်ပရိုၚ်ရ။
ပ္ဍဲဂိတုသိပ်တေမ်ပါ ၂၄ ဂှ် နူကဵုၜၚ်ကျာဂျက်ဖိုက်တာ ဒပ်ပၞာန်ဗမာ ၜါမ ကၠုၚ်ကြဳဖျေံဗုမ် ပန်မ ပ္ဍဲကဵုဌာန်ဂအုပ်ရးပၞာန်တၟေၚ် အလဵုအသဳညဳ NUG နွံအကြာပယျဵုဆက်စပ် တွဵုရးမန်ကဵု ဗဂေါဂှ်ရ။
ဟိုတ်နူ ၜၚ်ကျာပၞာန်ဗမာကြဳဗုမ်တုဲ အကြပ်ဇၞော် CDM အစာဇၞော် နေဝေၚ်အံၚ်၊ ကောန်သ္ဂံၚ် ဌာနပရေၚ်ဂီုကၠီု ၂ တၠ ၊ ကောန်သ္ဂံၚ်ဇဟ ၂ တၠ သီုဖအိုတ် ပြဟ်လလုဲအာ ၅ တၠတုဲ ဒးအာဝပ် ၃ တၠ နွံမံၚ် ရောၚ် ပ္ဍဲကဵုလိက်လလောၚ်တြး ချူထမံက်လဝ်ရ။
ဟိုတ်နူ ရပ်ဂြိပ်တိတ်နူဒပ်တံကီု ကောန်သ္ဂံၚ်ဒေါအ်ဇူ၊ ဒးဒုၚ်ကလေၚ်ရပ်လဝ်ကဵု ဒပ်ပၞာန်ဗမာတံတုဲ တၚ်နၚ်နူကဵု ပရေၚ်စၟဳစၟတ်လဝ်ဍေံတံကီု ရဲဖျေံလွဟ်တံကဵုပရိုၚ်ကီုတုဲ ပရေၚ်ပၞာန်ကျာကြဳဗုမ်ဏံ ဒှ်အာလဝ်ရောၚ် နူကဵု ရးပၞာန်ဒေသတၟေၚ် NUG သ္ဂးလဝ်ရ။
အကြာကောန်သ္ဂံၚ် PDF တံဒှ်ဒှ် အကြာဒပ်ပၠန်ဂတး ဂကောံမဟာမိတ်တံ ဇကုကဵုဇကု လညာတ်၊ ဆီညံၚ်ဂွံပါ်စ္ဍးခြာအာ ညးသ္ကံ နူကဵုဒပ်ပၞာန်သီအဝဵု တြးမံၚ်ဝါဒနွံတုဲ သွက်ညးဍုၚ်ကွာန်တံ ဂွံတီညာတ်အာ ပရူဒဒှ်ဍာံဍာံဂှ် နူကဵု ရးပၞာန်ဒေသတၟေၚ် NUG လလောၚ်တြးကဵုလဝ်ရောၚ် သ္ဂးရ။
ဟိုတ်နူ ပရေၚ်နူအပ္ဍဲညးတံ ဆက်စၠောံကဵုနၚ်ပရိုၚ်တုဲ နူကဵုအလဵုအသဳ ဒပ်ပၞာန်ကျာ ကြဳဖျေံလဝ်ဗုမ်ရောၚ် ပ္ဍဲဂိတုသိပ်တေမ်ပါ ၂၆ ဂှ် နူကဵုအလဵုအသဳပၞာန် ချူတြးလဝ် ပ္ဍဲကဵုလိက်ပရိုၚ်တြးဝါဒညးတံ ဗွဲမသၠဲလးရ။
အလဵုအသဳညဳသၟဟ်ကောန်ဂကူ NUG ပံက်စွံလဝ် နကဵုဌာန်ဂအုပ်ရးပၞာန် ၁၀ ဒၞာဲနွံတုဲ ဒၞာဲပရေၚ်ကြဳဗုမ် ဒှ်အာ ပ္ဍဲကဵုဌာန်ဂအုပ် ရးပၞာန်တၟေၚ်ဂှ်တှ်ေ နွံမံၚ်အကြာပယျဵုဆက်စပ် တွဵုရးမန်ကဵု ဗဂေါတံတုဲ အဓိကချဳဒရာၚ်မံၚ် ပရေၚ်ပၞာန် မဒှ်ရ။
ပရိုၚ်-သြၚ်လောန်တိုၚ်မ်
Photo – NUG