မတ်မလီု ၊ အံက်တဝ်ပါ ၃၀
အပ္ဍဲတွဵုရးမန် လ္တူဍုၚ်ဇၞော် မတ်မလီုဂှ် ရဲသၟဝ်တဲအလဵုအသဳပၞာန်တံ ဟွံဒးထေၚ်ခယျလဝ်ဂှ် ဗက်တံၚ်ရပ်ပဝ်တာ ညးဒေသတံတုဲ သွက်ယိုက်ဝန်ပၞာန် သွံစမံၚ်မၞိဟ်တံရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စပ်ကဵု မၞိဟ်မွဲဓဝ် တိတ်အာကၠုၚ်မ္ၚးဂှ်ကီု၊ မၞိဟ်တိတ်မ္ၚး အခိၚ်ဗတမ်၊ ရဲအာကမၠောန် ရဲစဴနူကမၠောန်တံသၟးဟွံက စနူကဵုရဲအာကၠုၚ်မံၚ် ဒၞာဲမၞိဟ်ပိုတ်တံဂှ်လေဝ်စွံလဝ်ပွန်တုဲ ရဲသၟဝ်တဲအလဵုအသဳပၞာန်တံ သွက်ဂွံသွံစအာ ပရေၚ်ယိုက်ဝန်ပၞာန်တံဂှ် ဗက်ဂၠာဲရပ်ကေတ်မံၚ် မၞိဟ်တံရ။
တုဲကၠုၚ်အံက်တဝ်ပါ ၂၂ တေံ ဂတမုက်ကိုန်အစဳဇန်ဍုၚ်တၟိ လှိုၚ်ရတနာ ညးကၠောန်မံၚ်ကမၠောန်မွဲတၠဂှ် အကြာပ်ဇၞော်မွဲတၠကဵု ရဲနူဒပ်ဆက်ပရိုၚ်လၟိဟ် (၅) မပါလုပ် မၞိဟ် ၃ တၠတံ သွက်ဂွံသွံစ ဇရေၚ် ပရေၚ်ယိုက်ဝန်ပၞာန်ဂှ် ပရေၚ်ဒဒှ် ရပ်ပတိုန်ဏာလ္တူကွဳစက် အတေၚ်အဓ္ဓမ က္တဵုဒှ်အာလဝ်ရ။
တုဲပၠန် ပ္ဍဲကဵုအံက်တဝ်ပါ ၂၆ ဂှ်လေဝ် သၟတ်မွဲတၠမံၚ်ဒၟံၚ် ပ္ဍဲအရာပ်သဳရိမျာၚ်ဂှ် အခိၚ်ဗတမ် ၜိုတ် ၁၀ နာဍဳဂှ်တှ်ေ ရဲသၟဝ်တဲ အလဵုအသဳပၞာန်တံ ရပ်ကၠေၚ်ကော်ပတိုန်ဏါ လ္တူကွဳစက်အတၚ်အဓ္ဓမတုဲ ရဲသၟိကၟိန်အိန်ထံၚ်တံ ဒးနုက်ကေတ်လဝ်ကဵုသြန် ၁၀၅ ကိုတ်ဒကေဝ် ဒဒှ်ဗီုတံဏံ ကေၚ်ဒှ်လဝ်နွံရ။
ပရေၚ် တံၚ်ရပ်ညးဒေသတံဗီုဏံတုဲ သွံစမံၚ်ကဵု သွက်ယိုက်ဝန်ပၞာန် တံဂှ်တှ်ေ ဒပ်ပၞာန်၊ ဗၠာဲသၟိၚ်၊ ဒပ်မၚ်ကွာန်၊ ဂကောံဂီုကၠီုညးဍုၚ်ကွာန် ကေုာံ ကောန်ဂကောံ ဂကောံဗတိုက်သရိုဟ်ပကီုပရာတ်တံကီု၊ သ္ကိုပ်ပရေၚ်အုပ်ဓုပ်အရာပ်/ကွာန်တံ စနူကဵုရဲက္ဍိုပ်အရာပ် ဆက်စပ်ပါလုပ်မံၚ် မဒှ်ရ။
ရဲသၟဝ်တဲအလဵုအသဳပၞာန်ဝွံ သွက်ဂွံသွံစညးဒေသတံ ပ္ဍဲကဵုပရေၚ်ယိုက်ဝန်ပၞာန်ဂှ် ဗက်ဂေတ်ဂၠာဲရပ်ကေတ်မံၚ်တုဲ ယဝ်ရးဒုၚ်ရပ်နုက်ဂတာပ်မ္ဂး နုက်ဂွံအာတုဲ နုက်ဟွံဂတာပ်တှ်ေ ဒးသွံစကဵုသွက်ပရေၚ်ယိုက်ဝန်ပၞာန်တံ နွံမံၚ်ရဂှ် ညးဒေသဍုၚ်မတ်မလီုမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ဖျေံလဝ်ဒၞာဲတန်န်ကြန်န် ချိုတ်တ်ပၠိုတ်တ်တုဲ တံၚ်ဏာဟွံသေၚ်ပုဟ်။ ပူဂေတ်အာတုဲ ဗက်ရပ်မၞိဟ်။ စိုပ်အခိၚ်ဗတမ် ၜိုတ် ၈-၉ နာဍဳတှ်ေ နကဵုသၞောတ်ပရေၚ်ကေၚ်ကာဒမၠုက် တံၚ်မံၚ်မၞိဟ်တံရ။ ဟွံဒေါအ်လးလးပုဟ်။ နုက်ကေတ်မာန်တှ်ေ အာနုက်ကေတ်ထောံ၊ နုက်ဂတာပ်တှ်ေ နုက်။ နုက်ဟွံဂတာပ်တှ်ေ စိုပ်အာယိုက်ဝန်ပၞာန်ရောၚ်” သာ်ဝွံ သ္ဂးရ။
တုဲပၠန် သွက်ဂွံသွံစကဵုယိုက်ဝန်ပၞာန်ဂှ် ဒးဒုၚ်ရပ်တုဲ အာနုက်ကဵုသြန်မ္ဂး အာတ်သြန်ဂၠိုၚ်ၚ်တုဲ ညးဍုၚ်ကွာန်ဓမ္မတာတံဂှ်တှ်ေ သ္ပဟွံမာန်၊ ညးလ္ၚဵု သြန်ဟွံမာန်တုဲ ဒးညိၚ်အာမံၚ် သ္ၚိတ်တ်ရောၚ် ညးဆက်ဟီုရ။
အပ္ဍဲအကြာဒေသ သွက်ဂွံသွံစညးဍုၚ်ကွာန်တံဂှ် ရဲသၟဝ်တဲအလဵုအသဳပၞာန်တံ ရပ်ကၠေၚ်ကော်ပတိုန်ဏါ လ္တူကွဳစက် အတၚ်အဓ္ဓမတုဲ ညးဍုၚ်ကွာန် ဒးအေၚ်ဒုၚ်ဒးဂိလဝ်တံ ယဝ်ရ အာတေၚ်စိုပ်မ္ဂး နူကဵုဗဒိုပ်ဗၠာဲသၟိၚ်ဆေၚ်စပ်တံ ဒုၚ်တဲပံက်ကဵုအမှု ဟွံမွဲပုဟ် ဂွံတီရ။
ညးဒေသအကြာဒေသတံဂှ် သွက်ပရေၚ်ယိုက်ဝန်ပၞာန် ရပ်ကၠေၚ်ကော်ပတိုန်ဏာ လ္တူကွဳစက် ဗွဲအတေၚ်အဓ္ဓမဂှ်တှ်ေ ဒှ်အမှု တံၚ်မၞိဟ်ကေတ်သြန်၊ သွက်စမံၚ်မၞိဟ်တံ ညံၚ်ရဴကပေါတ်ဗၞိက်တံဂှ် အမှုပရေၚ် ကူသာန်မၞိဟ်တံသၟးဟွံက ပရေၚ်ဒုဟ်တၞဟ်ဟ် ဖျေံမာန်ကီုလေဝ် ပရေၚ်ကေတ်အရေဝ်တေၚ်ၚ် ဟွံမွဲဂှ်ရ အကြာညးဍုၚ်ကွာန်တံ ပရေၚ်ပါ်ပါဲ နွံကၠုၚ်ရ။
အပ္ဍဲဍုၚ်မတ်မလီု အခိၚ်လၟုဟ် အကြာအရာပ်လ္တူဍုၚ်တံဂှ် ရပ်ညးဍုၚ်ကွာန်အတေၚ်အဓ္ဓမ ပတိုန်ကွဳစက် ကေတ်မံၚ်အရေဝ်တံဂှ် အကြာသၟတ်ညးဒေသတံ ပရေၚ်ဒှ်ဒဝိၚ်သၠုၚ်မံၚ်တုဲ အာလ္တူဂၠံၚ်လေဝ် အကာဲအရာ ပရေၚ်ဂီုကၠီုဟွံမွဲ ဒှ်မံၚ်ရ။
ပရိုၚ်-သြၚ်လောန်တိုၚ်မ်
Photo – MOI