ကျာ်ထဝ်၊ နိုဝမ်ပါ ၂
အပ္ဍဲကဵုတွဵုရးမန် ညးဍုၚ်ကွာန်နွံမံၚ် ပွိုၚ်ဍုၚ်ကျာ်ထဝ်တံ ဒးဒုၚ်မံၚ်ဘဲဒဏ် အန္တရာဲလွဟ်ဇၞော်ကဵု ပၞာန်ကျာဒပ်ပၞာန်ဗမာ ပရေအ်မံၚ်ဇၞော်ကဵုဇြဟတ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဒပ်ပၞာန်ဗမာသီအဝဵု ထ္ၜးဟိုတ်ဂကောံပၠန်ဂတးတံ ဖျေံသ္ဇိုၚ် ချဳဒရာၚ်မံၚ် ပ္ဍဲပွိုၚ်ဍုၚ်ကျာ်ထဝ်တုဲ အရိုဟ်ဟ်တ္ၚဲပန်မံၚ်ကဵုလွဟ် ကြဳမံၚ်ဗုမ် ဒၞာဲညးဍုၚ်ကွာန်တံ မံၚ်စံၚ်တန်တဴမံၚ်ဂှ်ရ။
အတိုၚ်ဌာန်ပရိုၚ် သြၚ်လောန်တိုၚ်မ် ပကောံဂွံလဝ်တၚ်နၚ်တံမ္ဂး အကြာမွဲဂိတုဏံ ပ္ဍဲပွိုၚ်ဍုၚ်ကျာ်ထဝ်ဂှ် ပၞာန်ကျာကြဳလဝ်ဗုမ် ၇ ဝါ၊ ကြဳလဝ်ဗုမ်ကဵုဒရုၚ် ၅ ဝါ၊ ပန်လွဟ်ဇၞော် ဟွံအောန်နူ ၃၀ ဝါ ဒပ်ပၞာန်ဗမာတံ ကၠောန်လဝ်နွံရ။
ဟိုတ်နူကဵု ဒပ်ပၞာန်ဗမာ ပန်လွဟ်ဇၞော်ကြဳလဝ်ဗုမ်ဂှ်ရ ပ္ဍဲအကြာပွိုၚ်မွဲဂိတုဏံ ညးဍုၚ်ကွာန်ကောန်အရာပ် ချိုတ်အာ ၈ တၠ၊ ဒးဝပ် ၁၁ တၠနွံတုဲ သ္ၚိဌာန်ဟွံအောန်နူကဵု ၂၀ မတံ ဒးလီုလာ် အာလဝ်ရ။
ဟိုတ်နူ ဒးဒုၚ်မံၚ်ဘဲဒဏ် လွဟ်ဇၞော်ကဵုပၞာန်ကျာ ဒပ်ပၞာန်ဗမာတံတုဲ သွက်ဂွံစသုၚ် ကၠောန်ကမၠောန်တံဂှ် ဒးဂွိၚ်မံၚ်ကဵု ဘဲအန္တရာဲလမျီု နွံမံၚ်တုဲ တ္ၚဲဒပ်ပၞာန် ဟွံပန်လွဟ်ဇၞော်ဂှ် မွဲတ္ၚဲမှဟွံမွဲပုဟ် ညးဍုၚ်ကွာန် ကျာ်ထဝ် ၜါတၠ ဟီုရ။
ပ္ဍဲကဵုပွိုၚ်ဍုၚ်ကျာ်ထဝ်မ္ဂး ဒပ်ပၞာန်သီအဝဵု ပန်မံၚ်ကဵုလွဟ်ဇၞော် ကြဳလဝ်ဗုမ်ကဵု ပၞာန်ကျာ ပ္ဍဲကဵုကွာန် ငပျဝ်တဝ်၊ ဇြဳကုၚ်၊ ချံၚ်သံက်၊ မယျာန်ကုၚ်၊ ကျံက်ဖျာ၊ နာတ်သေၚ်၊ ခမံက်ခွေ၊ ပုၚ်နေဝ်ကုၚ် ကဵု ပျေၚ်ကတိုဝ်ကုၚ်တံဂှ် ကၠောန်လဝ်ဂၠိုၚ်အိုတ်ရ။
ဒပ်ပၞာန်ဗမာ ဟိုတ်နူပန်ကဵုလွဟ်ဇၞော် ကြဳဗုမ်ကဵုပၞာန်ကျာဂှ်တှ်ေ ညးဍုၚ်ကွာန်နူကဵု ၁၀ ကွာန် လၟိဟ်ဟွံအောန်နူကဵု ၄၀၀၀ တံ ဒးထောံသ္ၚိဌာန် ဂြိပ်ပါဲအာအိုတ်တုဲ နွံမံၚ်ပၟိက်ကဵု ပရေၚ်အရီုဗၚ် ဗစာရဏာမၞိဟ် တံရ။
အပ္ဍဲပွိုၚ်ဍုၚ်ကျာ်ထဝ် ဟိုတ်နူဘဲအန္တရာဲလွဟ်ဇၞော်၊ ပၞာန်ကျာ ဒပ်ပၞာန်ဗမာတံဂှ်ရ ပရေၚ်ဂီုကၠီု သွက်ညးဍုၚ်ကွာန်တံဟွံမွဲ ကေုာံ ဒးဆဵုဂဗမံၚ်အခက်အခုဲ ပရေၚ်အရီုဗၚ်ဗစာရဏာမၞိဟ် ပဵုတုဲ ကျာတ်ဝါတ် ကြေပ်ဂြတ်ကၠုၚ် ရဂှ် နူကဵုဗော်သွးကရေၚ် KNU လလောၚ်တြးလဝ် ပ္ဍဲကဵုအံက်တဝ်ပါ ၂၆ တေံကီုရ။
ပရိုၚ်-သြၚ်လောန်တိုၚ်မ်
Photo – Social Media