တယိတ်ချံၚ်၊ နိုဝမ်ပါ ၄
အပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ဒၞာဲဒဵုဘုတ် နွံမံၚ်ကရပ်ကွာန် ကညေန်ချံၚ်ဂှ် ဒပ်ပၞာန်ဗမာကဵု ဒပ်ပံၚ်တောဲပၠန်ဂတးတံ အကြာၜါလပါ် ပေါဲဗတိုက်သ္ကာတ်မြဟ်ဒှ်မံၚ်ဂှ် တမ်ရိုဟ်ကၞက်ပရိုၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲကၠုၚ်နိုဝမ်ပါ ၂ ၜိုတ်အခိၚ်သဝ်တ္ၚဲ ၃ နာဍဳ ဒပ်ပၞာန်ဗမာ ဇြဟတ် ၂၀၀ ပြၚ် ဍိုက်ကဵုဇြဟတ် ထပက်ကၠုၚ်ကရောၚ်ပၞာန် လ္တူဒဵုဘုတ် ဂှ်တုဲ ပေါဲဗတိုက်ၜါလပါ် ၐိုတ်ပွိုၚ်မွဲဗတမ် ဒှ်လဝ်ရ။
ဟိုတ်နူ ပေါဲဗတိုက်ဆက်ဒှ်အာလဝ် စဵုစိုပ်နိုဝမ်ပါ ၃ ဒဵုအခိၚ်နူဂယးတုဲ ပရေၚ်ဒးဝပ်၊ ချိုတ်လဝ် သီုအကြာၜါလပါ် နွံမံၚ်ရောၚ် သ္ဂးရ။
ဒၟာနူပေါဲဗတိုက် ၜါလပါ်ကီု သီုကဵုၜၚ်ကျာပန်ဗတိုက်ဂှ်တုဲ ညးဒေသ နူကွာန်ကညေန်ချံၚ်၊ တေန်ပုၚ်ချံၚ်၊ သိက်ချံၚ် ၅ ကွာန် ရဲကွာန် ၆၀၀၀ ပြၚ်ၚ်တံ ဒးဂြိပ်ပါဲအာ ဒၞာဲဗၠးဘဲတံရ။
အခိၚ်ရဲဒဴပၞာန်တံဂြိပ်ပါဲအာဂှ် နူဂကောံပၠန်ဂတးဒေသတံ သွက်ပရေၚ်ဂီုကၠီုဂးတုဲ ကၟာတ်လဝ်အခေါၚ်အာကၠုၚ် လ္တူဂၠံၚ်ကွဳစက် နူကဵုဍာန်ဍာ်ဂှ်ရ ညးဍုၚ်ကွာန်တံ ဒးဂြိပ်အာ နကဵုဂၠုၚ်တံ လေဝ်နွံမံၚ်ရောၚ် ညးပါဲဘဲပၞာန်မွဲတၠ ဟီုရ။
တုဲကၠုၚ် အံက်တဝ်ပါ ၃၀ တေံလေဝ် ဒပ်ပၞာန်ဗမာ ကြဳဗုမ်ကွာန် ကညေန်ချံၚ် ပွိုၚ်ဍုၚ်တယိတ်ချံၚ်ဂှ် ရဲသ္ၚိကၟိန်အိန်ထံၚ် ၄ တၠ ချိုတ်အာတုဲ ၃ တၠ ဒးလဝ်ဝပ်ဂှ် ဂွံတီလဝ် နူကဵုညးဒေသတံရ။
ပရိုၚ်-သြၚ်လောန်တိုၚ်မ်
Photo – Social Media