မတ်မလီု၊ နိုဝမ်ပါ ၄
အပ္ဍဲတွဵုရးမန် ဍုၚ်မတ်မလီု ဟိုတ်နူဒးလဗိုတ်ကျာဂှ်တုဲ တၞံဆုကဝ် ဒေါမ်စှ်ေလဝ်ဂှ် မၞိဟ် ၃ တၠဒးအာဝပ်နွံမံၚ်ရောၚ် ဂကောံရီုဗၚ်ဟံၚ်ပြာ်မှာဇန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲနိုဝမ်ပါ ၂ စနူအခိၚ်ဇိုၚ်သဝ်တ္ၚဲဂှ် ဒးလဗိုတ်ကျာ ပ္ဍဲကဵုကွာန်ဖအံက်၊ ရောဂေါ ကဵု ကွာန်ကျာအေၚ် ပွိုၚ်ဍုၚ်မတ်မလီုရ။
ဟိုတ်နူ လဗိုတ်ကျာလပိုက်ထတ်တုဲ သ္ၚိဌာန်လ္ၚဵုကဵု သ္ၚိရေၚ်မၞိဟ်မံၚ် နွံအကြာအပ္ဍဲဗွိုၚ် တက္ကသိုလ်နဲကဲပညာ မတ်မလီုဂှ် တၞံဆုဍိုက်ဒးတုဲ မၞိဟ်ဒးအာဝပ် မဒှ်ရ။
ဟိုတ်နူတၞံဆုဍိုက်ဒးသ္ၚိတုဲ ညးတြံ ၂ တၠ၊ ညးဗြဴ ၁ တံဒးဝပ်တုဲ ပတိုန်ဝဳလွတ်မံၚ် ပ္ဍဲကဵုရုၚ်ဂဥုဲပွိုၚ်တိုက်ဖအံက်ရ။
လဗိုတ်ကျာလပိုက် သီုကဵုတၞံဆု ပိုတ်ဒေါမ်လဝ်ဂှ်ရ ဍာန်ဂၠံၚ်ကၟာတ်အာတုဲ ဒပ်ဂစိုတ်ပၟတ်ကဵု ဂကောံရီုဗၚ်ဟံၚ်ပြာ် မှာဇန်တံ ဒးကၠုၚ်ပသောၚ်သအးကဵုလဝ်ရ။
ဟိုတ်နူအသိၚ်အလိုန် လဗိုတ်ကျာသိုၚ်ကလုၚ် “မူယာသု” ဂှ် အကြာပွိုၚ် ၂၄ ဏံမ္ဂး ပ္ဍဲတွဵုရးမန်ကီု သီုကဵုတွဵုရးကဵုရးဒေသတံ ဗြဲဂူရိုပ်ဇၞော်ကဵုဇြဟတ် ဍာ်ဇၞော်တိုန်မွဲခဏဓဝ်တုဲ ပရေၚ်တိလာ်တံ ဒးဆဵုဂဗအာမာန်ရောၚ် နူကဵုဌာနပရေၚ်ဗြဲကျာ ကဵုလဝ်သတိကီုရ။
ပရိုၚ်-သြၚ်လောန်တိုၚ်မ်
Photo – Social Media