ဗြဝတဳ၊ နိုဝမ်ပါ ၄
အပ္ဍဲကဵုဒေသပယျဵုသေံ-ဗမာ ပေါဲဗတိုက်ၜါလပါ်ဒှ်မံၚ်လၟုဟ်ဏံ ဟိုတ်နူမကမ်လွဟ်ဇၞော်တံ ဖတုံစှ်ေကၠုၚ်မံၚ် လပါ်တိသေံတံဂှ်ရ ကော်ဆဵုဂဗကဵု ညးတာလျိုၚ်ကလုတ်ပၞာန်ဗမာတုဲ သ္ကိုပ်က္ဍိုက်ပ်ပၞာန်သေံ ကဵုဏာသတိ ပ္ဍဲနိုဝမ်ပါ ၂ ဂှ်ရ။
ပေါဲဗတိုက်နူကဵုဍုၚ်ဗမာ ဒှ်မံၚ် အကြာဒေသပယျဵုသေံ-ဗမာတံဂှ် ဒၟာနူမကမ်လွဟ်ဇၞော်တံ ဖတုံပြဟ်စှ်ေခတိုဟ်မံၚ် လပါ်တိဍာ်သေံတံ တုဲ သ္ၚိဌာန်၊ လမျီုညးဍုၚ်ကွာန်တံ ဒးအာဘဲဒဏ်ကီု ဟိုတ်နူ ဒပ်ပၞာန်ဗမာကြဳဗုမ်ဂှ် လပါ်ဍုၚ်သေံလေဝ် ဒးဘဲဒဏ် ဒှ်အာပရေၚ်လီုလာ်နွံတုဲ နူကဵုလပါ်သေံတံ ဒးကော် ကဵုကၠုၚ်သတိသာ်ဏံရ။
ညးတာလျိုၚ်ကလုတ်ပၞာန်ဗမာ ဒုသ္ကိုပ်ပၞာန် ဝေၚ်တူလေန်ဏံဂှ် သ္ကိုပ်က္ဍိုက်ပ်ပၞာန် ဧကရာဇ်သေံ ဥကရေတ်ဗန်တနန် ကော်ဆဵုလဝ် ပ္ဍဲရုၚ်ဌာန်ဂအုပ်ပၞာန် ဧကရာဇ်သေံ တ္ၚဲနိုဝမ်ပါ ၂ ဂှ်တုဲ ကဵုလဝ်သတိရ။
လပါ်ဍုၚ်ဗမာ ပရေၚ်ချဳဒရာၚ်ပၞာန်ဗီုလဵုကၠောန်န် စွံသတိတုဲ ကၠောန်အာထေက်ရောၚ် နူကဵုသ္ကိုပ်က္ဍိုက်ပ်ပၞာန် ဧကရာဇ်သေံ ဥကရေတ်ဗန်တနန် ကဵုသတိဟီုလဝ်ကဵု ညးတာလျိုၚ် ကလုတ်ပၞာန်ဗမာ မဒှ်ရ။
တုဲကၠုၚ် တ္ၚဲဂိတုအံက်တဝ်ပါအိုတ်တေံ ပ္ဍဲကဵုတိဍာ် KNU မဟာဒပ် ၅ ထိၚ်ချုက်လဝ် ကရပ်ပယျဵုသေံ ဇိုၚ်ၜဳသြၚ်လောန် ကွာန်တဝ်လေဝ်ထ၊ ယာထ၊ မေဝ်နူထတံဂှ် နူကဵုပၞာန်ကျာဒပ်ပၞာန်ဗမာကြဳလဝ်ဗုမ် ပံၚ် ၅၀၀၊ ပံၚ် ၃၀၀ အကြာပွိုၚ်မွဲသတ္တဟတုဲ ညးဒေသတံ ပရေၚ်ဒးဝပ်၊ ချိုတ်အာလဝ် နွံရ။
အပ္ဍဲကဵုကြဳလဝ်ဗုမ် ကွာန်တဝ်လေဝ်ထဂှ်တှ်ေ အသိၚ်အလိုန် ဇြဟတ်ခတိုဟ်ဇၞော်လောန်တုဲ စိုပ်အာလပါ်တိသေံဂှ်တှ်ေ သ္ၚိဌာန်၊ ဘာလ္ၚောဝ်ကျာ် နွံမံၚ်ကွာန်မေဝ်သလက် ခရိုၚ်မေဝ်ဟံၚ်သံၚ်တံ လီုလာ်အာလဝ်ဂှ်ရ ညးဍုၚ်ကွာန်သေံတံ ဒှ်တိုန်ဒဝိၚ် ဇၞော်ကဵုဇြဟတ်ရ။
တုဲပၠန် ပ္ဍဲကဵုပေါဲဗတိုက် မေန်လက်ပါန် ပွိုၚ်ဍုၚ်ဗြဝတဳဒှ်မံၚ်ဂှ် မကမ်လွဟ်ဇၞော်တံ ၜက်ပယျဵု စိုပ်အာတိသေံ မွဲလပါ်တေံတုဲ ဒတုံခတိုဟ်စှ်ေလဝ် ပ္ဍဲကဵုကွာန်မဟာဝါန် ပွိုၚ်ဍုၚ်မာဆံက်၊ ခရိုၚ်တက် ဍုၚ်သေံဂှ် ညးဗြဴသေံမွဲတၠ ဒးဝပ်၊ သ္ၚိဌာန်လ္ၚဵုတံလေဝ် ဒးမကမ်လီုလာ်အာလဝ်ရောၚ်။
နူကဵုပေါဲဗတိုက်ပယျဵုဗမာ ဟိုတ်နူမကမ်ဒတုံစှ်ေ လပါ်တိသေံတုဲ နူကဵုဒပ်ပၞာန်သေံ ကလေၚ်ပန်ကဵုနၚ်သတိကီု ဖျေံလဝ်ပရေၚ်ဂီုကၠီု ဗွဲတၟေၚ်တုဲ ဂိက်သၞေဟ်ဂၠုၚ်အာကၠုၚ်တတ်ကၠောံမံၚ် အကြာပယျဵု ၜါဍုၚ်ဂှ်လေဝ် နူကဵုဒပ်ပၞာန်သေံ ကၟာတ်ထောံလဝ် ပွိုၚ်မွဲသတ္တဟရ။
ပရိုၚ်-သြၚ်လောန်တိုၚ်မ်
Photo – MOI