အပ္ဍဲကျာ်ထဝ် ကရောၚ်ပၞာန်ဗမာ ဇြဟတ် ၁၀၀၀ ပြၚ်ထပက်ကၠုၚ်တုဲ ရပ်ထိၚ်လဝ်ညးဒေသ ၅၀ ပြၚ်

ကျာ်ထဝ် ၊ နိုဝမ်ပါ ၅

တွဵုရးမန် ပ္ဍဲပွိုၚ်ဍုၚ်ကျာ်ထဝ် နကဵုပရေၚ်လဝေၚ်ပၞာန်တၟေၚ် နူကဵုဒပ်ပၞာန်ဗမာ ထပက်မံၚ်ကရောၚ်ပၞာန် ဇြဟတ် ၁၀၀၀ ပြၚ်ၚ်တုဲ ရပ်ထိၚ်လဝ်ညးဒေသ ၅၀ ပြၚ်နွံမံၚ်ဂှ် ညးဒေသတံကဵုဂကောံပၠန်ဂတးတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။

ပ္ဍဲပွိုၚ်ဍုၚ်ကျာ်ထဝ် စနူကွာန်ဝါဒက်ကွေၚ် ကရောၚ်ပၞာန် ဇြဟတ်ၜိုတ် ၁၀၀၀ ပြၚ်ၚ်တံ ပ္ဍဲဂိတုနိုဝမ်ပါ ၃ စနူအခိၚ်နူဂယးဂှ် ဍိုက်လုပ်ကဵုဇြဟတ်ဂၠိုၚ်ၚ်တုဲ ထပက်လုပ်အာကရောၚ်ပၞာန် ဇရေၚ်ကွာန်ဇြဳပျံၚ်(၅) ဂှ်ရ။

အဟိန်ကရောၚ်ပၞာန် ထပက်လုပ်အာ ဇရေၚ်ကွာန်ဇြဳပျံၚ်(၁) ဂှ် နူကဵုဒပ်ပၞာန်ကျာလေဝ် ကြဳထောံဗုမ်ပံၚ် ၅၀၀ ပိမတုဲ နူကဵုတမ်ဒပ် ဖျေံသ္ဇိုၚ်ကျာ်ထဝ် ထဍိုၚ်ပန်မံၚ်ကဵု လွဟ်ဇၞော်တံကီုရ။

အခိၚ်ကရောၚ်ပၞာန် လုပ်ကၠုၚ်ဂှ် ရပ်ဏာကောန်ကွာန် ဝါဒက်ကွေၚ် ကေုာံ ကွာန်ညံၚ်ကျက် ညးဒေသညးတြုံညးဗြဴ ၅၀ ပြၚ်ၚ်နွံတုဲ ရပ်ထိၚ်စွံလဝ် ပ္ဍဲကဵုဘာလကျာ် ကွာန်ဝါဒက်ကွေၚ်တၟိဂှ် ညးဒေသ ၂ တၠ ဟီုရ။

အပ္ဍဲကဵုဒပ်ပၞာန်ဗမာ ရပ်လဝ်ညးဒေသတံဏံဂှ်တှ်ေ သၟာကမၠောန်က္တိုၚ်ထဝ်တံ၊ သၟာကမၠောန်ကၠအ်ရာဘာတံ၊ သၟာကမၠောန်ပရန်တံ ကဵု ညးဍုၚ်ကွာန်ရဲအာတရဴတံ ပါလုပ်မံၚ်ရ။

ဟိုတ်နူဒပ်ပၞာန်ဗမာ ဍိုက်လုပ်ကဵုဇြဟတ်ဂၠိုၚ်ၚ် ထပက်လုပ်ကၠုၚ် ကရောၚ်ပၞာန်ဂှ်ရ ပ္ဍဲနိုဝမ်ပါ ၃ ဂှ် ဒှ်လဝ်ပေါဲဗတိုက်ကဵု ဒပ်ကရေၚ် KNLA သ္ပက္ဍိုပ်ဒပ်ပၠန်ဂတးတံ ပ္ဍဲကဵုကရပ်ကွာန်ညံၚ်ကျက်ဂှ် ၜါဝါမဒှ်ရ။

အကာဲအရာပေါဲဗတိုက် ပရေၚ်ချိုတ်ဂျိုၚ် သီုၜါလပါ်ဂှ် ဟွံဂွံတီဏီလေဝ် ကရောၚ်ပၞာန်ဗမာတံ စိုပ်မံၚ်ကွာန်ဇြဳပျံၚ်(၅) တုဲ ကေတ်လဝ်ဒၞာဲ ဒဵုကဵုနိုဝမ်ပါ ၄ အခိၚ်နူဂယးဂှ် ဂွံတီရ။

အပ္ဍဲကရောၚ်ပၞာန်တံဏံဂှ်တှ်ေ နူကဵုဒပ်ပၠန်ဂတး တမ်ဒပ်ရးလ္ဂုၚ်ကဵု ဗဂေါ၊ သီုကဵုတမ်ဒပ်ဖျေံသ္ဇိုၚ် တိၚ်ဇယျာတ် ခမရ ၂၀၇ ကေုာံ အမတ ၃၁၀ တံ ပံၚ်ကောံလဝ်ဇြဟတ်တုဲ ထပက်ကၠုၚ် ကရောၚ်ပၞာန် မဒှ်ရ။

ဟိုတ်နူကရောၚ်ပၞာန်လုပ်ကၠုၚ်ဂှ်ရ ကွာန်ဝါဒက်ကွေၚ်၊ ကညေန်အိုၚ်၊ နူကဵုကွာန်ဇြဳပျံၚ်(၁) စိုပ်ဇြဳပျံၚ်(၆)၊ ဝေန်ကာန်၊ ကျံက်ယေတွေၚ်၊ ပျေန်ကတိုဝ်ကုၚ်၊ ပုၚ်နဲကုၚ် သီုဖအိုတ် နူကဵု ၂၀ ကွာန် ညးဍုၚ်ကွာန် ၁၅၀၀၀ တံ ဒးဂြိပ်ပါဲအာ ဒၞာဲဗၠးဘဲတံရ။

ဒပ်ပၞာန်ဗမာ စထပက်ကရောၚ်ပၞာန် ပ္ဍဲနိုဝမ်ပါ ၃ ဂှ် ဟိုတ်နူပန်လွဟ်ဇၞော်တုဲ ပ္ဍဲကဵုကွာန်အခိုၚ် ပွိုၚ်ဍုၚ်ကျာ်ထဝ်ဂှ် ညးဗြဴ ဂွံလဝ်ယဲဒိုက်မွဲတၠ ချိုတ်အာတုဲ အပါဂှ်ဒးဝပ်၊ ပ္ဍဲကွာန်ဇြဳပျံၚ်(၁) ဂှ်လေဝ် ပၞာန်ကျာကြဳဗုမ်တုဲ ညးဒေသ ၄ တၠ ဒးလဝ်ဝပ်နွံရ။

ပရိုၚ်-သြၚ်လောန်တိုၚ်မ်

Photo – CJ